Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 6 | |
6:1 | Слышите убо, царiе, и разумѣйте: научитеся, судiи концевъ земли: |
6:2 | внушите, содержащiи множества и гордящiися о народѣхъ языковъ: |
6:3 | яко дана есть от Господа держава вамъ и сила от вышняго, иже истяжетъ дѣла ваша и помышленiя испытаетъ: |
6:4 См.: 🔗Рим. 13:4 | яко слузи суще царства его не судисте право, ни сохранисте закона, ниже по воли Божiей ходисте. |
6:5 См.: 🔗Ис. 2:17 | Страшно и скоро явится вамъ: яко судъ жесточайшiй преимущымъ бываетъ, |
6:6 | ибо малый достоинъ есть милости, сильнiи же сильнѣ истязани будутъ. |
6:7 | Не щадитъ бо лица всѣхъ Владыка, ниже усрамится вельможи, яко мала и велика сей сотвори, подобнѣ же проразумѣваетъ о всѣхъ: |
6:8 | державнымъ же крѣпко настоитъ испытанiе. |
6:9 | Къ вамъ убо, О, царiе, словеса моя, да научитеся премудрости и не падете: |
6:10 | ибо сохраняющiи преподобнѣ преподобная преподобни будутъ, и иже научившiися симъ, обрящутъ отвѣтъ. |
6:11 | Возжелѣйте убо словесъ моихъ, возлюбите и накажитеся. |
6:12 См.: 🔗Прит. 8:17 🔗Сир. 24:23 | Свѣтла и не увядаема есть премудрость, и удобно видится от любящихъ ю, и обрящется от ищущихъ ю: |
6:13 | предваряетъ желающымъ предувѣдѣтися. |
6:14 См.: 🔗Прит. 1:20 🔗Рим. 10:6 | Утреневавый къ ней не утрудится: присѣдящую бо обрящетъ при вратѣхъ своихъ. |
6:15 | Еже бо мыслити о ней, разума [есть] совершенство, и бдяй ея ради вскорѣ безъ печали будетъ: |
6:16 См.: 🔗Мф. 4:18 🔗Мф. 10:11 | яко достойныхъ ея сама обходитъ ищущи, и на стезяхъ показуется имъ благопрiятно, и во всемъ провидѣнiи срѣтаетъ ихъ. |
6:17 См.: 🔗Прит. 4:7 | Начало бо ея истиннѣйшее наказанiя возжелѣнiе, |
6:18 См.: 🔗Ин. 14:15 | попеченiе же наказанiя любы, любы же храненiе законовъ ея, |
6:19 См.: 🔗Иак. 4:8 | храненiе же законовъ утвержденiе нерастлѣнiя [есть], нерастлѣнiе же творитъ близъ быти Бога: |
6:20 | возжелѣнiе убо премудрости возводитъ къ царству [вѣчному]. |
6:21 | Аще убо наслаждаетеся престолами и скиптры, О, царiе людій, почтите премудрость, да во вѣки царствуете. |
6:22 | Что же есть премудрость, и како бысть, возвѣщу, |
6:23 См.: 🔗Прит. 4:11 | и не утаю от васъ таинъ, но от начала рожденiя изслѣжду, |
6:24 | и положу на свѣтъ разумъ ея и не преминую истины, |
6:25 См.: 🔗Иак. 3:16 | ниже завистiю тающему спутьствую, яко сей не будетъ причастникъ премудрости. |
6:26 См.: 🔗Прит. 11:14 | Множество же премудрыхъ спасенiе мiру, и царь премудръ утвержденiе людемъ. |
6:27 | Сего ради прiимите наказанiе по словесемъ моимъ, и полезно будетъ вамъ. |