|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 10 | |
| 10:1 | Просите от Господа дождя во время ранняго и поздняго: Господь сотвори привидѣнiя, и дождь зименъ дастъ имъ, комуждо злакъ на селѣ. |
| 10:2 | Зане провѣщающiи глаголаша труды, и вражбителiе видѣнiя ложна и сонiя лжива глаголаху, суетными утѣшаху: сего ради изсхоша яко овцы, и озлоблени быша, понеже не бѣ изцѣленiя. |
| 10:3 | На пастырей прогнѣвася ярость моя, и на агнцы посѣщу: и посѣтитъ Господь Богъ Вседержитель стадо свое, домъ Иудинъ, и учинитъ я аки коня благолѣпна своего во брани. |
| 10:4 | И от него призрѣ, и от него учини, и от него лукъ въ дусѣ ярости, и от него изыдетъ всякъ изгоняяй въ томъ. |
| 10:5 | И будутъ яко ратницы попирающе бренiе на путехъ во брани, и ополчатся, яко Господь съ ними, и постыдятся всадницы коннiи. |
| 10:6 | И укрѣплю домъ Иудовъ и домъ Иосифовъ спасу, и вселю я, понеже возлюбихъ я, и будутъ аки бы не отвратихъ ихъ: зане азъ Господь Богъ ихъ и услышу я. |
| 10:7 | И будутъ яко ратницы Ефремовы, и возрадуется сердце ихъ аки от вина: и чада ихъ увидятъ и возвеселятся, и возрадуется сердце ихъ о Господѣ. |
| 10:8 | Возвѣщу имъ и прiиму я, зане искуплю ихъ, и умножатся, якоже бяху мнози: |
| 10:9 | и всѣю я въ людехъ, и дальнiи помянутъ мя, и воспитаютъ чада своя, и обратятся: |
| 10:10 | и возвращу я от земли Египетскiя и от Ассиріанъ прiиму я, и въ Галаадитъ и въ Ливанъ введу я, и не имать остати от нихъ ни единъ. |
| 10:11 | И пройдутъ моремъ узкимъ и поразятъ въ мори волны, и изсякнутъ вся глубины рѣчныя, и отъимется всяко досажденiе Ассирійско, и скиптръ Египетскъ отъимется. |
| 10:12 | И укрѣплю я о гдѣ Бозѣ ихъ, и о имени его восхвалятся, глаголетъ Господь. |
