Деяния святых Апостолов, главы 2–24

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1 См.: 🔗Лев. 23:16 🔗Втор. 16:9	И егда скончавашася дние Пятьдесятницы, беша вси Апостоли единодушно вкупе.
2:2 См.: 🔗Мф. 3:11 🔗Деян. 1:5 🔗Деян. 11:15 🔗Деян. 19:6	И бысть внезапу с небесе шум, яко носиму дыханию бурну, и исполни весь дом, идеже бяху седяще:
2:3	и явишася им разделени языцы яко огненни, седе же на единем коемждо их.
2:4 См.: 🔗Мк. 16:17 🔗1Кор. 12:10	И исполнишася вси Духа Свята и начаша глаголати иными языки, якоже Дух даяше им провещавати.
2:5	Бяху же во Иерусалиме живущии Иудее, мужие благоговейнии, от всего языка, иже под небесем.
2:6	Бывшу же гласу сему, снидеся народ и смятеся, яко слышаху един кийждо их своим языком глаголющих их.
2:7	Дивляхуся же вси и чудяхуся, глаголюще друг ко другу: не се ли, вси сии суть глаголющии Галилеане?
2:8	И како мы слышим кийждо свой язык наш, в немже родихомся,
2:9	Парфяне и Мидяне и Еламите, и живущии в Месопотамии, во Иудеи же и Каппадокии, в Понте и во Асии,
2:10	во Фригии же и Памфилии, во Египте и странах Ливии, яже при Киринии, и приходящии Римляне, Иудее же и пришелцы,
2:11	критяне и аравляне, слышим глаголющих их нашими языки величия Божия?
2:12	Ужасахуся же вси и недоумевахуся, друг ко другу глаголюще: что убо хощет сие быти?
2:13	Инии же ругающеся глаголаху, яко вином исполнени суть.
2:14	Став же Петр со единонадесятьми, воздвиже глас свой и рече им: мужие Иудейстии и живущии во Иерусалиме вси, сие вам разумно да будет, и внушите глаголы моя:
2:15	не бо, якоже вы непщуете, сии пияни суть, есть бо час третий дне:
2:16	но сие есть реченное пророком Иоилем:
2:17 См.: 🔗Ис. 44:3 🔗Зах. 12:10 🔗Ин. 7:39 🔗Деян. 11:28 🔗Деян. 16:9 🔗Деян. 21:9	и будет в последния дни, глаголет Господь, излию от Духа Моего на всяку плоть, и прорекут сынове ваши и дщери вашя, и юноши ваши видения узрят, и старцы ваши сония видят:
2:18	ибо на рабы Моя и на рабыни Моя во дни оны излию от Духа Моего, и прорекут:
2:19	и дам чудеса на небеси горе и знамения на земли низу, кровь и огнь и курение дыма:
2:20	солнце преложится во тму, и луна в кровь, прежде даже не приити дню Господню великому и просвещенному:
2:21 См.: 🔗Иоил. 2:28 🔗Рим. 10:13	и будет, всяк, иже аще призовет имя Господне, спасется.
2:22	Мужие Израилстии, послушайте словес сих: Иисуса Назореа, Мужа от Бога извествованна в вас силами и чудесы и знамении, яже сотвори Тем Бог посреде вас, якоже и сами весте,
2:23	Сего нарекованным советом и проразумением Божиим предана приемше, руками беззаконных пригвождше убисте:
2:24 См.: 🔗Ин. 10:18 🔗Деян. 3:15 🔗Деян. 4:10	Егоже Бог воскреси, разрешив болезни смертныя, якоже не бяше мощно держиму быти Ему от нея.
2:25	Давид бо глаголет о Нем: предзрех Господа предо мною выну, яко о десную мене есть, да не подвижуся:
2:26	сего ради возвеселися сердце мое, и возрадовася язык мой: еще же и плоть моя вселится на уповании,
2:27	яко не оставиши души моея во аде, ниже даси преподобному Твоему видети истления:
2:28 См.: 🔗Пс. 15:8	сказал ми еси пути живота: исполниши мя веселия с лицем Твоим.
2:29 См.: 🔗3Цар. 2:10 🔗Деян. 13:36	Мужие братие, достоит рещи с дерзновением к вам о патриарсе Давиде, яко и умре и погребен бысть, и гроб его есть в нас даже до дне сего:
2:30 См.: 🔗2Цар. 7:12 🔗Пс. 131:11 🔗2Цар. 7:19 🔗2Цар. 23:2 🔗Лк. 1:69	пророк убо сый и ведый, яко клятвою клятся ему Бог от плода чресл его по плоти воздвигнути Христа и посадити Его на престоле его,
2:31 См.: 🔗Пс. 15:10 🔗Деян. 13:37	предвидев глагола о воскресении Христове, яко не оставися душа Его во аде, ни плоть Его виде истления.
2:32 См.: 🔗Ин. 15:27 🔗Деян. 3:15	Сего Иисуса воскреси Бог, емуже вси мы есмы свидетелие.
2:33 См.: 🔗Ин. 14:16	Десницею убо Божиею вознесеся, и обетование Святаго Духа приемь от Отца, излия сие, еже вы ныне видите и слышите.
2:34 См.: 🔗Мф. 22:44	Не бо Давид взыде на небеса, глаголет бо сам: рече Господь Господеви моему: седи о десную Мене,
2:35 См.: 🔗Пс. 109:1	дондеже положу враги Твоя подножие ног Твоих.
2:36 См.: 🔗Мф. 28:18	Твердо убо да разумеет весь дом Израилев, яко и Господа и Христа его Бог сотворил есть, Сего Иисуса, Егоже вы распясте.
2:37	Слышавше же умилишася сердцем и реша к Петру и прочым Апостолом: что сотворим, мужие братие?
2:38	Петр же рече к ним: покайтеся, и да крестится кийждо вас во имя Иисуса Христа во оставление грехов: и приимете дар Святаго Духа:
2:39 См.: 🔗Иер. 31:34 🔗Деян. 3:25	вам бо есть обетование и чадом вашым и всем дальним, елики аще призовет Господь Бог наш.
2:40	И иными словесы множайшими засвидетелствоваше и моляше я, глаголя: спаситеся от рода строптиваго сего.
2:41	Уже убо любезно прияша слово его, крестишася: и приложишася в день той душ яко три тысящы:
2:42	бяху же терпяще во учении Апостол и во общении и в преломлении хлеба и в молитвах.
2:43	Бысть же на всякой души страх: многа бо чудеса и знамения Апостолы быша во Иерусалиме.
2:44 См.: 🔗Деян. 4:32	Страх же велий бяше на всех их. Вси же веровавшии бяху вкупе и имяху вся обща:
2:45	и стяжания и имения продаяху, и раздаяху всем, егоже аще кто требоваше:
2:46 См.: 🔗Лк. 24:53 🔗Деян. 20:11	по вся же дни терпяще единодушно в церкви и ломяще по домом хлеб, приимаху пищу в радости и в простоте сердца,
2:47 См.: 🔗Деян. 5:14 🔗Деян. 11:21	хваляще Бога и имуще благодать у всех людий. Господь же прилагаше по вся дни Церкви спасающыяся.

	Глава 24
24:1	По пятих же днех сниде архиерей Ананиа со старцы и с ритором некиим Тертиллом, иже сказаша игемону о Павле.
24:2	Призвану же бывшу ему, начат клеветати Тертилл, глаголя:
24:3	мног мир улучающе тобою, и исправления бываемая языку сему твоим промышлением, всяким же образом и везде приемлем, державный Филиксе, со всяким благодарением:
24:4	но да не множае стужаю тебе, молю тя послушати нас вкратце твоею кротостию:
24:5 См.: 🔗Деян. 28:22	обретохом бо мужа сего губителя и движуща противление всем иудеем живущым по вселенней и предстателя (суща) Назорейстей ереси,
24:6 См.: 🔗Деян. 21:28	иже и церковь покусися осквернити, егоже и яхом и по закону нашему хотехом судити ему:
24:7	пришед же Лисиа тысящник, многою силою от рук наших исхити его и к тебе посла,
24:8	повелев (и нам) поемлющым нань ити к тебе: от негоже возможеши сам разсудив о всех сих познати, о нихже мы поемлем нань.
24:9	Сложишася же и Иудее, глаголюще сим тако быти.
24:10	Отвеща же Павел, поманувшу ему игемону глаголати: от многих лет суща тя судию праведна языку сему сведый, благодушнее яже о мне отвещаю,
24:11	могущу ти разумети, яко не множае ми есть дний дванадесятих, отнележе взыдох поклонитися во Иерусалим:
24:12	и ни в церкви обретоша мя к кому глаголюща или разврат творяща народу, ни в сонмищих, ни во граде,
24:13	ниже довести могут, елика тебе ныне на мя глаголют:
24:14	исповедую же тебе сие, яко в пути, егоже сии глаголют ересь, тако служу отеческому Богу, веруя всем сущым в законе и пророцех писаным,
24:15 См.: 🔗Дан. 12:2 🔗Ин. 5:28	упование имый на Бога, яко воскресение хощет быти мертвым, праведником же и грешником, егоже и сами сии чают:
24:16 См.: 🔗Деян. 23:1	о сем же и аз подвизаюся, непорочну совесть имети всегда пред Богом же и человеки:
24:17 См.: 🔗Деян. 11:29 🔗Рим. 15:25	по летех же многих приидох сотворити милостыни во язык мой и приношения:
24:18 См.: 🔗Деян. 21:26	в нихже обретоша мя очищенна в церкви, ни с народом, ниже с молвою,
24:19	нецыи от Асии Иудее, имже подобаше пред тя приити и глаголати, аще имут что на мя:
24:20	или сами тии да глаголют, аще кую обретоша во мне неправду, ставшу ми в сонмищи,
24:21 См.: 🔗Деян. 23:6	разве единаго сего гласа, имже возопих стоя в них, яко о воскресении мертвых аз суд приемлю днесь от вас.
24:22	Слышав же сия Филикс отвеща им, известнее уведев яже о пути сем, глаголя: егда Лисиа тысящник приидет, разсужду яже о вас.
24:23 См.: 🔗Деян. 27:3	Повеле же сотнику стрещи Павла, и имети ослабу, и ни единому же возбраняти от своих ему служити или приходити к нему.
24:24	По днех же некиих пришед Филикс со Друсиллиею женою своею сущею Иудеанынею, призва Павла, да слышит от него веру, яже во Христа Иисуса.
24:25	Глаголющу же ему о правде и о воздержании и о суде хотящем быти, пристрашен быв Филикс отвеща: ныне убо иди, время же получив призову тя.
24:26	Вкупе же и надеяся, яко мзда дастся ему от Павла, яко да отпустит его: темже и часто призывая его, беседоваше с ним.
24:27 См.: 🔗Деян. 21:11 🔗Деян. 25:9	Двема же летома скончавшемася прият изменение Филикс Поркиа Фиста: хотя же угодное сотворити Иудеем Филикс, остави Павла связана.