Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 15 | |
15:1 | [Зач. 50.] Азъ есмь лоза истинная, и Отецъ Мой дѣлатель есть: |
15:2 См.: 🔗Мф. 15:13 🔗Гал. 5:22 | всяку розгу о Мнѣ не творящую плода, изметъ ю: и всяку творящую плодъ, отребитъ ю, да множайшiй плодъ принесетъ. |
15:3 См.: 🔗Ин. 13:10 🔗1Ин. 2:7 | Уже вы чисти есте за слово, еже глаголахъ вамъ. |
15:4 | Будите во Мнѣ, и Азъ въ васъ. Якоже розга не можетъ плода сотворити о себѣ, аще не будетъ на лозѣ, тако и вы, аще во Мнѣ не пребудете. |
15:5 См.: 🔗Деян. 4:12 | Азъ есмь лоза, вы [же] рождiе: [и] иже будетъ во Мнѣ, и Азъ въ немъ, той сотворитъ плодъ многъ, яко безъ Мене не можете творити ничесоже: |
15:6 | аще кто во Мнѣ не пребудетъ, извержется вонъ, якоже розга, и изсышетъ: и собираютъ ю и во огнь влагаютъ, и сгараетъ: |
15:7 | аще пребудете во Мнѣ и глаголы Мои въ васъ пребудутъ, егоже аще хощете, просите, и будетъ вамъ: |
15:8 | о семъ прославися Отецъ Мой, да плодъ многъ сотворите, и будете Мои ученицы. |
15:9 | [Зач. 51.] Якоже возлюби Мя Отецъ, и Азъ возлюбихъ васъ: будите въ любви Моей: |
15:10 | аще заповѣди Моя соблюдете, пребудете въ любви Моей, якоже Азъ заповѣди Отца Моего соблюдохъ, и пребываю въ Его любви. |
15:11 | Сiя глаголахъ вамъ, да радость Моя въ васъ будетъ и радость ваша исполнится. |
15:12 | Сiя есть заповѣдь Моя, да любите другъ друга, якоже возлюбихъ вы: |
15:13 | болши сея любве никтоже имать, да кто душу свою положитъ за други своя. |
15:14 | Вы друзи Мои есте, аще творите, елика Азъ заповѣдаю вамъ: |
15:15 | не ктому васъ глаголю рабы, яко рабъ не вѣсть, что творитъ господь его: васъ же рекохъ други, яко вся, яже слышахъ от Отца Моего, сказахъ вамъ. |
15:16 См.: 🔗Мк. 16:15 | Не вы Мене избрасте, но Азъ избрахъ васъ, и положихъ васъ, да вы идете и плодъ принесете, и плодъ вашъ пребудетъ, да, егоже аще просите от Отца во имя Мое, дастъ вамъ. |
15:17 | [Зач. 52.] Сiя заповѣдаю вамъ, да любите другъ друга. |
15:18 См.: 🔗1Ин. 3:13 | Аще мiръ васъ ненавидитъ, вѣдите, яко Мене прежде васъ возненавидѣ: |
15:19 | аще от мiра бысте были, мiръ убо свое любилъ бы: якоже от мiра нѣсте, но Азъ избрахъ вы от мiра, сего ради ненавидитъ васъ мiръ. |
15:20 | Поминайте слово, еже Азъ рѣхъ вамъ: нѣсть рабъ болiй господа своего: аще Мене изгнаша, и васъ изженутъ: аще слово Мое соблюдоша, и ваше соблюдутъ: |
15:21 См.: 🔗Ин. 16:3 | но сiя вся творятъ вамъ за имя Мое, яко не вѣдятъ Пославшаго Мя. |
15:22 | Аще не быхъ пришелъ и глаголалъ имъ, грѣха не быша имѣли: нынѣ же вины {извиненiя} не имутъ о грѣсѣ своемъ: |
15:23 | ненавидяй Мене, и Отца Моего ненавидитъ: |
15:24 | аще дѣлъ не быхъ сотворилъ въ нихъ, ихже инъ никтоже сотвори, грѣха не быша имѣли: нынѣ же и видѣша, и возненавидѣша Мене и Отца Моего: |
15:25 См.: 🔗Пс. 68:5 🔗Пс. 34:19 | но да сбудется слово, писанное въ законѣ ихъ, яко возненавидѣша Мя туне. |
15:26 См.: 🔗Лк. 24:49 🔗Ин. 14:26 | Егда же прiидетъ Утѣшитель, Егоже Азъ послю вамъ от Отца, Духъ истины, Иже от Отца исходитъ, Той свидѣтелствуетъ о Мнѣ: |
15:27 | и вы же свидѣтелствуете, яко искони со Мною есте. |