Евангелие от Иоанна, глава 16

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 16
16:1	Сия глаголах вам, да не соблазнитеся.
16:2	От сонмищ ижденут вы: но приидет час, да всяк, иже убиет вы, возмнится службу приносити Богу:
16:3 См.: 🔗Ин. 15:21	и сия сотворят, яко не познаша Отца, ни Мене.
16:4 См.: 🔗Мф. 9:15 🔗Ин. 14:29	Но сия глаголах вам, да, егда приидет час, воспомянете сия, яко Аз рех вам: сих же вам исперва не рех, яко с вами бех.
16:5 См.: 🔗Ин. 7:33	Ныне же иду к Пославшему Мя, и никтоже от вас вопрошает Мене: камо идеши?
16:6	Но яко сия глаголах вам, скорби исполних сердца ваша.
16:7 См.: 🔗Ин. 15:26	Но Аз истину вам глаголю: уне есть вам, да Аз иду: аще бо не иду Аз, Утешитель не приидет к вам: аще (ли) же иду, послю Его к вам,
16:8	и пришед Он обличит мир о гресе и о правде и о суде:
16:9	о гресе убо, яко не веруют в Мя:
16:10	о правде же, яко ко Отцу Моему иду, и ктому не видите Мене:
16:11 См.: 🔗Ин. 12:31 🔗Ин. 14:30 🔗Кол. 2:15	о суде же, яко князь мира сего осужден бысть.
16:12	Еще много имам глаголати вам, но не можете носити ныне:
16:13 См.: 🔗Мф. 10:19	егда же приидет Он, Дух истины, наставит вы на всяку истину: не от Себе бо глаголати имать, но елика аще услышит, глаголати имать, и грядущая возвестит вам:
16:14	Он Мя прославит, яко от Моего приимет и возвестит вам.
16:15 См.: 🔗Ин. 17:10	Вся, елика имать Отец, Моя суть: сего ради рех, яко от Моего приимет и возвестит вам.
16:16	Вмале, и (ктому) не видите Мене: и паки вмале, и узрите Мя, яко иду ко Отцу.
16:17	Реша же от ученик Его к себе: что есть сие, еже глаголет нам: вмале, и не видите Мене: и паки вмале, и узрите Мя: и: яко Аз иду ко Отцу?
16:18	Глаголаху убо: что сие есть, еже глаголет: вмале? Не вемы, что глаголет.
16:19	Разуме же Иисус, яко хотяху Его вопрошати, и рече им: о сем ли стязаетеся между собою, яко рех: вмале, и не видите Мене: и паки вмале, и узрите Мя?
16:20	Аминь, аминь глаголю вам, яко восплачетеся и возрыдаете вы, а мир возрадуется: вы же печальни будете, но печаль ваша в радость будет:
16:21	жена егда раждает, скорбь имать, яко прииде год ея: егда же родит отроча, ктому не помнит скорби за радость, яко родися человек в мир:
16:22 См.: 🔗Лк. 24:41 🔗Ин. 20:20 🔗1Пет. 1:8	и вы же печаль имате убо ныне: паки же узрю вы, и возрадуется сердце ваше, и радости вашея никтоже возмет от вас:
16:23 См.: 🔗Мф. 7:7 🔗Мк. 11:24 🔗Лк. 11:9 🔗Ин. 14:13 🔗Ин. 15:7 🔗Иак. 1:6	и в той день Мене не воспросите ничесоже. Аминь, аминь глаголю вам, яко елика аще (чесо) просите от Отца во имя Мое, даст вам:
16:24	доселе не просисте ничесоже во имя Мое: просите, и приимете, да радость ваша исполнена будет.
16:25	Сия в притчах глаголах вам: но приидет час, егда ктому в притчах не глаголю вам, но яве о Отце возвещу вам.
16:26 См.: 🔗Рим. 8:34	В той день во имя Мое воспросите, и не глаголю вам, яко Аз умолю Отца о вас:
16:27 См.: 🔗Ин. 17:25	Сам бо Отец любит вы, яко вы Мене возлюбисте и веровасте, яко Аз от Бога изыдох.
16:28	Изыдох от Отца и приидох в мир: (и) паки оставляю мир и иду ко Отцу.
16:29	Глаголаша Ему ученицы Его: се, ныне не обинуяся глаголеши, а притчи ни коеяже не глаголеши:
16:30	ныне вемы, яко веси вся и не требуеши, да кто Тя вопрошает: о сем веруем, яко от Бога изшел еси.
16:31	Отвеща им Иисус: ныне ли веруете?
16:32 См.: 🔗Мф. 26:31 🔗Мк. 14:27	Се, грядет час, и ныне прииде, да разыдетеся кийждо во своя и Мене единаго оставите: и несмь един, яко Отец со Мною есть:
16:33 См.: 🔗1Ин. 4:4 🔗1Ин. 5:4 🔗1Кор. 15:57	сия глаголах вам, да во Мне мир имате: в мире скорбни будете: но дерзайте, (яко) Аз победих мир.