Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 7 | |
7:1 См.: 🔗Мф. 8:5 | Егда же сконча вся глаголголы Своя в слухи людем, вниде в Капернаум. |
7:2 | Сотнику же некоему раб боля зле, хотяше умрети, иже бе ему честен. |
7:3 | Слышав же о Иисусе, посла к Нему старцы Иудейския, моля Его, яко да пришед спасет раба его. |
7:4 | Они же пришедше ко Иисусови, моляху Его тощно, глаголюще, яко достоин есть, емуже даси сие: |
7:5 | любит бо язык наш, и сонмище той созда нам. |
7:6 | Иисус же идяше с ними. И уже Ему не далече сущу от храмины, посла к Нему сотник други, глаголя Ему: Господи, не движися: несмь бо достоин, да под кров мой внидеши: |
7:7 | темже ни себе достойна сотворих приити к Тебе: но рцы слово, и изцелеет отрок мой: |
7:8 | ибо и аз человек есмь под владыкою учинен, имея под собою воины: и глаголю сему: иди, и идет: и другому: прииди, и приидет: и рабу моему: сотвори сие, и сотворит. |
7:9 | Слышав же сия Иисус, чудися ему, и обращься идущему по Нем народу рече: глаголю вам, ни во Израили толики веры обретох. |
7:10 | И возвращшеся посланнии обретоша болящаго раба изцелевша. |
7:11 | И бысть посем, идяше во град, нарицаемый Наин: и с Ним идяху ученицы Его мнози и народ мног. |
7:12 | Якоже приближися ко вратом града, и се изношаху умерша, сына единородна матери своей, и та бе вдова: и народ от града мног с нею. |
7:13 | И видев ю Господь, милосердова о ней, и рече ей: не плачи. |
7:14 | И приступль коснуся во одр: носящии же сташа: и рече: юноше, тебе глаголю, востани. |
7:15 | И седе мертвый, и начат глаголати: и даде его матери его. |
7:16 | Прият же страх всех, и славляху Бога, глаголюще: яко пророк велий воста в нас, и яко посети Бог людий Своих. |
7:17 | И изыде слово сие по всей Иудеи о Нем, и по всей стране. |
7:18 См.: 🔗Мф. 11:2 | И возвестиша Иоанну ученицы его о всех сих. |
7:19 | И призвав два некая от ученик своих Иоанн, посла ко Иисусу, глаголя: Ты ли еси Грядый, или иного чаем? |
7:20 | Пришедша же к Нему мужа, реста: Иоанн Креститель посла нас к Тебе, глаголя: Ты ли еси Грядый, или иного чаем, |
7:21 | в Той же час изцели многи от недуг и ран и дух злых и многим слепым дарова прозрение. |
7:22 | И отвещав Иисус рече има: шедша возвестита Иоанну, яже видеста и слышаста: яко слепии прозирают, хромии ходят, прокаженнии очищаются, глусии слышат, мертвии востают, нищии благовествуют: |
7:23 | и блажен есть, иже аще не соблазнится о Мне. |
7:24 | Отшедшема же ученикома Иоанновома, начат глаголати к народом о Иоанне: чесо изыдосте в пустыню видети, трость ли ветром колеблему? |
7:25 | Но чесо изыдосте видети? Человека ли в мягки ризы одеяна? Се, иже во одежди славней и пищи сущии, во царствии суть. |
7:26 | Но чесо изыдосте видети? Пророка ли? Ей, глаголю вам, и лишше пророка. |
7:27 | Сей (бо) есть, о немже писано есть: се, Аз послю Ангела Моего пред лицем Твоим, иже устроит путь Твой пред Тобою. |
7:28 См.: 🔗Мф. 11:11 | Глаголю бо вам: болий в рожденных женами пророка Иоанна Крестителя никтоже есть: мний же во Царствии Божии болий его есть. |
7:29 См.: 🔗Мф. 21:31 | И вси людие слышавше и мытарие оправдиша Бога, крещшеся крещением Иоанновым: |
7:30 См.: 🔗Деян. 20:27 | фарисее же и законницы совет Божий отвергоша о себе, не крещшеся от него. |
7:31 См.: 🔗Мф. 11:16 | Рече же Господь: кому убо уподоблю человеки рода сего, и кому суть подобни? |
7:32 | Подобни суть отрочищем седящым на торжищих, и приглашающым друг друга, и глаголющым: пискахом вам, и не плясасте: рыдахом вам, и не плакасте. |
7:33 | Прииде бо Иоанн Креститель ни хлеба ядый, ни вина пия, и глаголете: беса имать. |
7:34 | Прииде Сын Человеческий ядый и пия, и глаголете: сей человек ядца и винопийца, друг мытарем и грешником. |
7:35 | И оправдися премудрость от чад своих всех. |
7:36 | Моляше же Его некий от фарисей, дабы ял с ним: и вшед в дом фарисеов, возлеже. |
7:37 | И се, жена во граде, яже бе грешница, и уведевши, яко возлежит во храмине фарисеове, принесши алавастр мира, |
7:38 | и ставши при ногу Его созади, плачущися, начат умывати нозе Его слезами, и власы главы своея отираше, и облобызаше нозе Его, и мазаше миром. |
7:39 См.: 🔗Лк. 15:2 | Видев же фарисей воззвавый Его, рече в себе, глаголя: Сей аще бы был пророк, ведел бы, кто и какова жена прикасается Ему: яко грешница есть. |
7:40 | И отвещав Иисус рече к нему: Симоне, имам ти нечто рещи. Он же рече: Учителю, рцы. |
7:41 | Иисус же рече: два должника беста заимодавцу некоему: един бе должен пятиюсот динарий, другий же пятиюдесят: |
7:42 | не имущема же има воздати, обема отда. Который убо ею, рцы, паче возлюбит его? |
7:43 | Отвещав же Симон рече: мню, яко емуже вящше отда. Он же рече ему: право судил еси. |
7:44 | И обращься к жене, Симонови рече: видиши ли сию жену? Внидох в дом твой, воды на нозе Мои не дал еси: сия же слезами облия Ми нозе и власы главы своея отре. |
7:45 | Лобзания Ми не дал еси: сия же, отнелиже внидох, не преста облобызающи Ми нозе. |
7:46 | Маслом главы Моея не помазал еси: сия же миром помаза Ми нозе. |
7:47 | Егоже ради, глаголю ти, отпущаются греси ея мнози, яко возлюби много: а емуже мало оставляется, менше любит. |
7:48 | Рече же ей: отпущаются тебе греси. |
7:49 | И начаша возлежащии с Ним глаголати в себе: кто Сей есть, иже и грехи отпущает? |
7:50 | Рече же к жене: вера твоя спасе тя: иди в мире. |