Послание апостола Павла к Римлянам, глава 2

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 2
2:1 См.: 🔗2Цар. 12:5 🔗Мф. 7:1 🔗Лк. 6:37 🔗1Кор. 4:5	Сего ради безот­вѣтенъ еси, о, человѣче всякъ судяй: имже бо судомъ судиши друга, себе осуждаеши, таяжде бо твориши судяй.
2:2	Вѣмы же, яко судъ Божiй есть по­истин­нѣ на творящихъ таковая.
2:3	Помышляеши ли же сiе, о, человѣче, судяй таковая творящымъ и творя самъ таяжде, яко ты избѣжиши ли суда Божiя,
2:4 См.: 🔗Ис. 30:18 🔗Иер. 3:12 🔗2Пет. 3:15	или о богат­ст­вѣ благости Его и кротости и долготерпѣнiи нерадиши, не вѣдый, яко благость Божiя на покаянiе тя ведетъ?
2:5 См.: 🔗Иак. 5:3	По жестокости же тво­ей и непокаян­ному сердцу, собираеши себѣ гнѣвъ въ день гнѣва и от­кровенiя праведнаго суда Божiя,
2:6 См.: 🔗Прит. 24:12 🔗Мф. 16:27	Иже воз­дастъ ко­емуждо по дѣломъ его:
2:7 См.: 🔗Мф. 25:46	овымъ убо, по терпѣнiю дѣла благаго, славы и чести и нетлѣнiя ищущымъ, животъ вѣчный:
2:8 См.: 🔗Иер. 23:19 🔗Евр. 10:27	а иже по рвенiю противляют­ся убо истинѣ, повинуют­ся же неправдѣ, ярость и гнѣвъ.
2:9	Скорбь и тѣснота на всяку душу человѣка творящаго злое, Иудеа же прежде и Еллина.
2:10	[Зач. 81Б.] Слава же и честь и миръ всякому дѣла­ю­щему благое, Иудееви же прежде и Еллину.
2:11 См.: 🔗Втор. 10:17 🔗2Пар. 19:7	Нѣсть бо на лица зрѣнiя у Бога.
2:12 См.: 🔗Лк. 12:47	Елицы бо беззакон­но {безъ закона} согрѣшиша, беззакон­но {безъ закона} и погибнутъ: и елицы въ законѣ согрѣшиша, закономъ судъ прiимутъ:
2:13 См.: 🔗Мф. 7:21 🔗Иак. 1:22	не слышателiе бо закона праведни предъ Богомъ, но творцы закона, сіи оправдят­ся:
2:14	[Зач. 82.] егда бо языцы, не имуще закона, есте­с­т­вомъ закон­ная творятъ, сіи, закона не имуще, сами себѣ суть законъ:
2:15	иже являютъ дѣло закон­ное написано въ сердцахъ сво­ихъ, спослуше­ст­ву­ю­щей имъ совѣсти, и между собою помысломъ осуждающымъ или от­вѣщающымъ,
2:16 См.: 🔗Еккл. 12:14 🔗Мф. 25:31 🔗Ин. 5:22 🔗Деян. 10:42 🔗1Кор. 4:5	въ день, егда судитъ Богъ тайная человѣкомъ, по благовѣстiю мо­ему, Иисусомъ Христомъ.
2:17 См.: 🔗Мих. 3:11	Се, ты Иудей именуешися, и почиваеши на законѣ, и хвалишися о Бозѣ,
2:18	и разумѣеши волю, и разсуждаеши лучшая, научаемь от­ закона,
2:19 См.: 🔗Ис. 42:19 🔗Мф. 15:14	уповая же себе вожда быти слѣпымъ, свѣта сущымъ во тмѣ,
2:20	наказателя безумнымъ, учителя младенцемъ, имуща образъ разума и истины въ законѣ:
2:21 См.: 🔗Пс. 49:16	научая убо инаго, себе ли не учиши,
2:22	проповѣдая не красти, крадеши: глаголяй не прелюбы творити, прелюбы твориши: гнушаяся идолъ, святая крадеши:
2:23	иже въ законѣ хвалишися, преступленiемъ закона Бога безче­ст­вуеши.
2:24 См.: 🔗Ис. 52:5 🔗Иез. 36:20	Имя бо Божiе вами хулит­ся во языцѣхъ, якоже есть писано.
2:25 См.: 🔗Лев. 26:41 🔗Иер. 4:4 🔗1Кор. 7:19 🔗Гал. 6:15	Обрѣзанiе бо пользуетъ, аще законъ твориши: аще же закона преступникъ еси, обрѣзанiе твое необрѣзанiе бысть.
2:26 См.: 🔗Деян. 10:35	Аще убо необрѣзанiе оправданiе закона сохранитъ, не необрѣзанiе ли его во обрѣзанiе вмѣнит­ся,
2:27 См.: 🔗Мф. 12:41	и осудитъ еже от­ есте­ст­ва необрѣзанiе, законъ совершающее, тебе, иже Писанiемъ и обрѣзанiемъ еси преступникъ закона.
2:28 См.: 🔗Рим. 9:6	[Зач. 83.] Не бо иже явѣ, Иудей есть, ни еже явѣ во плоти, обрѣзанiе:
2:29 См.: 🔗Втор. 30:6 🔗Рим. 4:12 🔗Кол. 2:11	но иже въ тайнѣ Иудей, и обрѣзанiе сердца духомъ, [а] не писанiемъ: емуже похвала не от­ человѣкъ, но от­ Бога.