Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 23 | |
23:1 | [Зач. 93.] Тогда Иисусъ глагола къ народомъ и ученикомъ Своимъ, |
23:2 | глаголя: на Моисеовѣ сѣдалищи сѣдоша книжницы и фарисее: |
23:3 | вся убо, елика аще рекутъ вамъ блюсти, соблюдайте и творите: по дѣломъ же ихъ не творите: глаголютъ бо, и не творятъ: |
23:4 См.: 🔗Лк. 11:46 🔗Деян. 15:10 | связуютъ бо бремена тяжка и бѣднѣ носима, и возлагаютъ на плеща человѣческа, перстомъ же своимъ не хотятъ двигнути ихъ. |
23:5 См.: 🔗Чис. 15:38 🔗Втор. 22:12 | Вся же дѣла своя творятъ, да видими будутъ человѣки: разширяютъ же хранилища своя и величаютъ воскрилiя ризъ своихъ: |
23:6 | любятъ же преждевозлеганiя на вечеряхъ, и преждесѣданiя на сонмищихъ, |
23:7 | и цѣлованiя на торжищихъ, и зватися от человѣкъ: учителю, учителю. |
23:8 См.: 🔗Иак. 3:1 🔗1Кор. 3:4 | Вы же не нарицайтеся учителiе: единъ бо есть вашъ Учитель, Христосъ: вси же вы братiя есте: |
23:9 См.: 🔗Мал. 1:6 | и отца не зовите себѣ на земли: единъ бо есть Отецъ вашъ, Иже на небесѣхъ: |
23:10 | ниже нарицайтеся наставницы: единъ бо есть Наставникъ вашъ, Христосъ. |
23:11 | Болiй же въ васъ да будетъ вамъ слуга: |
23:12 См.: 🔗Лк. 14:11 | иже бо вознесется, смирится: и смиряяйся вознесется. |
23:13 См.: 🔗Иез. 22:26 🔗Лк. 11:52 | [Зач. 94.] Горе вамъ, книжницы и фарисее, лицемѣри, яко затворяете Царствiе Небесное предъ человѣки: вы бо не входите, ни входящихъ оставляете внити. |
23:14 См.: 🔗Мк. 12:40 🔗Лк. 20:47 | Горе вамъ, книжницы и фарисее, лицемѣри, яко снѣдаете домы вдовицъ, и виною далече молитвы творяще {и лицемѣрно на долзѣ молитвы творите}: сего ради лишшее прiимете осужденiе. |
23:15 | Горе вамъ, книжницы и фарисее, лицемѣри, яко преходите море и сушу, сотворити единаго пришелца: и егда будетъ, творите его сына геенны сугубѣйша васъ. |
23:16 | Горе вамъ, вожди слѣпіи, глаголющiи: иже аще кленется церковiю, ничесоже есть: а иже кленется златомъ церковнымъ, долженъ есть. |
23:17 | Буи и слѣпіи, что бо болѣе есть, злато ли, или церковь, святящая злато? |
23:18 | И: иже аще кленется олтаремъ, ничесоже есть: а иже кленется даромъ, иже верху его, долженъ есть. |
23:19 См.: 🔗Исх. 29:37 | Буи и слѣпіи, что бо болѣе, даръ ли, или олтарь, святяй даръ? |
23:20 | Иже убо кленется олтаремъ, кленется имъ и сущимъ верху его: |
23:21 См.: 🔗2Пар. 6:2 🔗Пс. 25:8 | и иже кленется церковiю, кленется ею и Живущимъ въ ней: |
23:22 | и кленыйся небесемъ кленется Престоломъ Божiимъ и Сѣдящимъ на немъ. |
23:23 | [Зач. 95.] Горе вамъ, книжницы и фарисее, лицемѣри, яко одесятствуете мятву и копръ и киминъ, и остависте вящшая закона, судъ и милость и вѣру: сiя [же] подобаше творити, и онѣхъ не оставляти. |
23:24 | Вожди слѣпіи, оцѣждающiи комары, велблуды же пожирающе. |
23:25 | Горе вамъ, книжницы и фарисее лицемѣри, яко очищаете внѣшнее сткляницы и блюда, внутрьуду же суть полни хищенiя и неправды: |
23:26 | фарисее слѣпый, очисти прежде внутреннее сткляницы и блюда, да будетъ и внѣшнее има чисто. |
23:27 См.: 🔗Лк. 11:44 🔗Деян. 23:3 | Горе вамъ, книжницы и фарисее, лицемѣри, яко подобитеся гробомъ повапленымъ, иже внѣуду убо являются красны, внутрьуду же полни суть костей мертвыхъ и всякiя нечистоты: |
23:28 | тако и вы, внѣуду убо являетеся человѣкомъ праведни, внутрьуду же есте полни лицемѣрiя и беззаконiя. |
23:29 | [Зач. 96.] Горе вамъ, книжницы и фарисее, лицемѣри, яко зиждете гробы пророческiя, и красите раки праведныхъ, |
23:30 | и глаголете: аще быхомъ были во дни отецъ нашихъ, не быхомъ убо общницы имъ были въ крови пророкъ: |
23:31 | тѣмже сами свидѣтелствуете себѣ, яко сынове есте избившихъ пророки: |
23:32 | и вы исполните мѣру отецъ вашихъ. |
23:33 См.: 🔗Мф. 3:7 | Змiя, порожденiя ехиднова, како убѣжите от суда [огня] геенскаго? |
23:34 См.: 🔗2Пар. 36:15 🔗Лк. 11:49 | Сего ради, се, Азъ послю къ вамъ пророки и премудры и книжники: и от нихъ убiете и распнете, и от нихъ бiете на сонмищихъ вашихъ, и изженете от града во градъ: |
23:35 | яко да прiидетъ на вы всяка кровь праведна, проливаемая на земли, от крове Авеля праведнаго до крове Захарiи сына Варахіина, егоже убисте между церковiю и олтаремъ. |
23:36 | Аминь глаголю вамъ: [яко] прiидутъ вся сiя на родъ сей. |
23:37 См.: 🔗Втор. 32:11 🔗Лк. 13:34 | Иерусалиме, Иерусалиме, избивый пророки и каменiемъ побиваяй посланныя къ тебѣ, колькраты восхотѣхъ собрати чада твоя, якоже собираетъ кокошъ птенцы своя подъ крилѣ, и не восхотѣсте? |
23:38 См.: 🔗Лк. 13:35 | Се, оставляется вамъ домъ вашъ пустъ. |
23:39 См.: 🔗Пс. 117:26 🔗Мф. 21:9 | Глаголю бо вамъ: [яко] не имате Мене видѣти отселѣ, дондеже речете: благословенъ Грядый во имя Господне. |