Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 9 | |
9:1 | И мимоидый виде человека слепа от рождества. |
9:2 | И вопросиша Его ученицы Его, глаголюще: Равви, кто согреши, сей ли, или родителя его, яко слеп родися? |
9:3 | Отвеща Иисус: ни сей согреши, ни родителя его, но да явятся дела Божия на нем: |
9:4 См.: 🔗Ин. 4:34 🔗Ин. 12:35 | мне подобает делати дела Пославшаго Мя, дондеже день есть: приидет нощь, егда никтоже может делати: |
9:5 | егда в мире есмь, свет есмь миру. |
9:6 См.: 🔗Ин. 11:37 | Сия рек, плюну на землю, и сотвори брение от плюновения, и помаза очи брением слепому, |
9:7 См.: 🔗Неем. 3:15 | и рече ему: иди, умыйся в купели Силоамсте, еже сказается послан. Иде убо и умыся, и прииде видя. |
9:8 | Соседи же и иже бяху видели его прежде, яко слеп бе, глаголаху: не сей ли есть седяй и просяй? |
9:9 | Овии глаголаху, яко сей есть: инии же (глаголаху), яко подобен ему есть. Он (же) глаголаше, яко аз есмь. |
9:10 | Глаголаху же ему: како ти отверзостеся очи? |
9:11 | Отвеща он и рече: Человек нарицаемый Иисус брение сотвори и помаза очи мои и рече ми: иди в купель Силоамлю и умыйся. Шед же и умывся, прозрех. |
9:12 | Реша убо ему: кто Той есть? Глагола: не вем. |
9:13 | Ведоша (же) его к фарисеом, иже бе иногда слеп. |
9:14 | Бе же суббота, егда сотвори брение Иисус и отверзе ему очи. |
9:15 | Паки же вопрошаху его и фарисее, како прозре. Он же рече им: брение положи мне на очи, и умыхся, и вижу. |
9:16 См.: 🔗Ин. 7:43 | Глаголаху убо от фарисей нецыи: несть Сей от Бога Человек, яко субботу не хранит. Овии глаголаху: како может человек грешен сицева знамения творити? И распря бе в них. |
9:17 | Глаголаху (убо) слепцу паки: ты что глаголеши о Нем, яко отверзе очи твои? Он же рече, яко пророк есть. |
9:18 | Не яша убо веры Иудее о нем, яко слеп бе и прозре, дондеже возгласиша родителя того прозревшаго |
9:19 | и вопросиша я, глаголюще: сей ли есть сын ваю, егоже вы глаголете, яко слеп родися? Како убо ныне видит? |
9:20 | Отвещаста (же) им родителя его и реста: вемы, яко сей есть сын наю и яко слеп родися: |
9:21 | како же ныне видит, не вемы, или кто отверзе ему очи, мы не вемы: сам возраст имать, самого вопросите, сам о себе да глаголет. |
9:22 См.: 🔗Ин. 12:42 | Сия рекоста родителя его, яко боястася Жидов: уже бо бяху сложилися Жидове, да, аще кто Его исповесть Христа, отлучен от сонмища будет: |
9:23 | сего ради родителя его рекоста, яко возраст имать, самого вопросите. |
9:24 | Возгласиша же вторицею человека, иже бе слеп, и реша ему: даждь славу Богу: мы вемы, яко Человек Сей грешен есть. |
9:25 | Отвеща убо он и рече: аще грешен есть, не вем: едино вем, яко слеп бех, ныне же вижу. |
9:26 | Реша же ему паки: что сотвори тебе? Како отверзе очи твои? |
9:27 | Отвеща им: рекох вам уже, и не слышасте: что паки хощете слышати? Еда и вы ученицы Его хощете быти? |
9:28 | Они же укориша его и реша (ему): ты ученик еси Того: мы же Моисеовы есмы ученицы: |
9:29 См.: 🔗Исх. 3:6 | мы вемы, яко Моисеови глагола Бог, Сего же не вемы, откуду есть. |
9:30 | Отвеща человек и рече им: о сем бо дивно есть, яко вы не весте, откуду есть, и отверзе очи мои: |
9:31 | вемы же, яко грешники Бог не послушает, но аще кто Богочтец есть и волю Его творит, того послушает: |
9:32 См.: 🔗Ис. 42:7 | от века несть слышано, яко кто отверзе очи слепу рождену: |
9:33 | аще не бы был Сей от Бога, не могл бы творити ничесоже. |
9:34 | Отвещаша и реша ему: во гресех ты родился еси весь, и ты ли ны учиши? И изгнаша его вон. |
9:35 | Услыша Иисус, яко изгнаша его вон, и обрет его, рече ему: ты веруеши ли в Сына Божия? |
9:36 | Отвеща он и рече: и кто есть, Господи, да верую в Него? |
9:37 | Рече же ему Иисус: и видел еси Его, и Глаголяй с тобою Той есть. |
9:38 | Он же рече: верую, Господи. И поклонися Ему. |
9:39 См.: 🔗Мф. 11:25 🔗2Кор. 3:14 | И рече Иисус: на суд Аз в мир сей приидох, да невидящии видят, и видящии слепи будут. |
9:40 | И слышаша от фарисей сия сущии с Ним и реша Ему: еда и мы слепи есмы? |
9:41 См.: 🔗Ин. 15:22 | Рече им Иисус: аще бысте слепи были, не бысте имели греха: ныне же глаголете, яко видим, грех убо ваш пребывает. |
Глава 3 | |
3:1 См.: 🔗Ин. 7:50 🔗Ин. 19:39 | Бе же человек от фарисей, Никодим имя ему, князь Жидовский: |
3:2 | сей прииде ко Иисусу нощию и рече Ему: Равви, вем, яко от Бога пришел еси учитель: никтоже бо может знамений сих творити, яже Ты твориши, аще не будет Бог с ним. |
3:3 | Отвеща Иисус и рече ему: аминь, аминь глаголю тебе: аще кто не родится свыше, не может видети Царствия Божия. |
3:4 | Глагола к Нему Никодим: како может человек родитися стар сый? Еда может второе внити во утробу матере своея и родитися? |
3:5 | Отвеща Иисус: аминь, аминь глаголю тебе: аще кто не родится водою и Духом, не может внити во Царствие Божие: |
3:6 См.: 🔗Рим. 8:5 | рожденное от плоти плоть есть, и рожденное от Духа дух есть. |
3:7 | Не дивися, яко рех ти: подобает вам родитися свыше. |
3:8 См.: 🔗Кол. 3:3 | Дух, идеже хощет, дышет, и глас его слышиши, но не веси, откуду приходит и камо идет: тако есть всяк (человек) рожденный от Духа. |
3:9 | Отвеща Никодим и рече Ему: како могут сия быти? |
3:10 | Отвеща Иисус и рече ему: ты еси учитель Израилев, и сих ли не веси? |
3:11 | Аминь, аминь глаголю тебе, яко, еже вемы, глаголем, и еже видехом, свидетелствуем, и свидетелства Нашего не приемлете: |
3:12 | аще земная рекох вам, и не веруете: како, аще реку вам небесная, уверуете? |
3:13 См.: 🔗Прит. 30:4 🔗Ин. 6:62 | И никтоже взыде на небо, токмо сшедый с небесе Сын Человеческий, сый на небеси: |
3:14 См.: 🔗Чис. 21:9 🔗Ин. 12:32 | и якоже Моисей вознесе змию в пустыни, тако подобает вознестися Сыну Человеческому, |
3:15 | да всяк веруяй в Онь не погибнет, но имать живот вечный. |
3:16 | Тако бо возлюби Бог мир, яко и Сына Своего Единороднаго дал есть, да всяк веруяй в Онь не погибнет, но имать живот вечный. |
3:17 | Не посла бо Бог Сына Своего в мир, да судит мирови, но да спасется Им мир. |
3:18 | Веруяй в Онь не будет осужден: а не веруяй уже осужден есть, яко не верова во имя Единороднаго Сына Божия. |
3:19 | Сей же есть суд, яко свет прииде в мир, и возлюбиша человецы паче тму, неже свет: беша бо их дела зла. |
3:20 | Всяк бо делаяй злая ненавидит света и не приходит к свету, да не обличатся дела его, яко лукава суть: |
3:21 | творяй же истину грядет к свету, да явятся дела его, яко о Бозе суть соделана. |
3:22 | По сих (же) прииде Иисус и ученицы Его в Жидовскую землю: и ту живяше с ними и крещаше. |
3:23 | Бе же Иоанн крестя во Еноне близ Салима, яко воды многи бяху ту: и прихождаху и крещахуся: |
3:24 | не у бо бе всажден в темницу Иоанн. |
3:25 | Бысть же стязание от ученик Иоанновых со Иудеи о очищении: |
3:26 См.: 🔗Ин. 1:27 | и приидоша ко Иоанну и рекоша ему: равви, Иже бе с тобою об он пол Иордана, Емуже ты свидетелствовал еси, се, Сей крещает, и вси грядут к Нему. |
3:27 См.: 🔗Ин. 6:65 | Отвеща Иоанн и рече: не может человек приимати ничесоже, аще не будет дано ему с небесе. |
3:28 См.: 🔗Ин. 1:20 🔗Деян. 13:25 | Вы сами мне свидетелствуете, яко рех: несмь аз Христос, но яко послан есмь пред Ним. |
3:29 | Имеяй невесту жених есть: а друг женихов, стоя и послушая его, радостию радуется за глас женихов: сия убо радость моя исполнися: |
3:30 | оному подобает расти, мне же малитися. |
3:31 | Грядый свыше над всеми есть: сый от земли от земли есть и от земли глаголет: Грядый с небесе над всеми есть, |
3:32 См.: 🔗Ин. 8:26 | и еже виде и слыша, сие свидетелствует: и свидетелства Его никтоже приемлет. |
3:33 См.: 🔗1Ин. 5:10 🔗Рим. 3:4 | Приемый Его свидетелство верова, яко Бог истинен есть. |
3:34 | Егоже бо посла Бог, глаголголы Божия глаголет: не в меру бо Бог дает Духа. |
3:35 См.: 🔗Дан. 7:14 🔗Мф. 28:18 | Отец (бо) любит Сына и вся даде в руце Его. |
3:36 См.: 🔗Авв. 2:4 | Веруяй в Сына имать живот вечный: а иже не верует в Сына, не узрит живота, но гнев Божий пребывает на нем. |