Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 22 | |
22:1 См.: 🔗Втор. 12:5 🔗1Пар. 21:26 | Рече же давидъ: се есть домъ Господа Бога, и сей олтарь на всесожженiя Израилю. |
22:2 См.: 🔗2Пар. 2:17 🔗3Цар. 5:15 | И рече давидъ собрати вся пришелцы, иже на земли Израилевѣ, и постави каменосѣчцевъ сѣщи каменiя тесаная, да созиждется домъ Божiй. |
22:3 | Желѣзо же много на гвозди дверемъ и вратомъ на спаянiе уготова давидъ, и мѣди множеству не бѣ числа: |
22:4 | и древамъ кедровымъ не бѣ числа: яко принесоша Сидоняне и тиряне древъ кедровыхъ множество давиду. |
22:5 См.: 🔗1Пар. 29:1 | И рече давидъ: соломонъ сынъ мой дѣтищь младъ, домъ же еже созидати Господеви въ величество высоко, во имя и въ славу во всю землю, уготовлю ему. И уготова давидъ [всего] множество прежде скончанiя своего. |
22:6 | И призва давидъ соломона сына своего и заповѣда ему, да созиждетъ домъ Господу Богу Израилеву. |
22:7 См.: 🔗1Пар. 17:1 | Рече же давидъ къ соломону: чадо, мнѣ бяше въ сердцы, да созижду домъ имени Господа Бога моего: |
22:8 См.: 🔗1Пар. 28:3 | и бысть слово Господне ко мнѣ, глаголющее: многи крови пролiялъ еси и многи брани сотворилъ еси, не созиждеши дому имени моему, яко многи крови пролiялъ еси на землю предо мною: |
22:9 См.: 🔗2Цар. 7:11 🔗2Цар. 12:24 | се, сынъ родится тебѣ, сей будетъ мужъ покоя, и упокою его от всѣхъ врагъ его окрестъ, зане соломонъ имя ему, и миръ и покой дамъ ему надъ Израилемъ во дни его: |
22:10 | той созиждетъ домъ имени моему, и той будетъ мнѣ въ сына, и азъ буду ему во отца: и исправлю престолъ царства его во Израили до вѣка: |
22:11 | нынѣ убо, сыне мой, будетъ Господь съ тобою и благопоспѣшитъ, и созиждеши домъ Господу Богу твоему, якоже глагола о тебѣ: |
22:12 | да дастъ же тебѣ премудрость и разумъ Господь и да укрѣпитъ тя надъ Израилемъ, еже хранити и творити законъ Господа Бога твоего: |
22:13 | тогда благопоспѣшитъ, аще сохраниши творити заповѣди и судьбы, яже повелѣ Господь Моисеови, [да учитъ] Израиля: мужайся и крѣпися, не бойся, ниже устрашися: |
22:14 См.: 🔗1Пар. 29:2 | и се, азъ по убожеству моему уготовахъ на домъ Господень злата талантовъ сто тысящъ, и сребра тысяща тысящъ талантовъ, мѣдь же и желѣзо, емуже нѣсть вѣса, понеже множество есть, и древа и каменiя уготовахъ, и къ симъ да приложиши: |
22:15 | и съ тобою Господь, и приложиши ко множеству творящихъ дѣла, художницы, и строителiе каменiй, и древодѣле, и всякъ мудрецъ во всяцѣмъ дѣлѣ, |
22:16 | въ златѣ и сребрѣ, въ мѣди и желѣзѣ нѣсть числа: востани убо и твори, и Господь съ тобою. |
22:17 | И повелѣ давидъ всѣмъ началникомъ Израилевымъ, да помогаютъ соломону сыну его, глаголя: |
22:18 | не Господь ли съ вами? и даде вамъ покой окрестъ, зане даде въ руки вашя живущихъ на земли, и покорена земля предъ Господемъ и предъ людьми его: |
22:19 | нынѣ убо дадите сердца ваша и душы вашя еже взыскати Господа Бога вашего, и востаните и созидайте святыню Господу Богу вашему, да внесется кивотъ завѣта Господня и сосуды святыя богови въ домъ созидаемый имени Господню. |