Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 | Обыдите пути Иерусалимскiя и воззрите, и познайте и поищите на стогнахъ его, аще обрящете мужа творящаго судъ и ищуща вѣры: и милосердъ буду ему, глаголетъ Господь. |
5:2 | Живетъ Господь, глаголютъ, сего ради не во лжахъ ли кленутся? |
5:3 | Господи, очи твои [зрятъ] на вѣру: билъ еси ихъ, и не поболѣша, сокрушилъ еси ихъ, и не восхотѣша прiяти наказанiя: ожесточиша лица своя паче камене и не хотѣша обратитися. |
5:4 | Азъ же рѣхъ: негли убози суть [и буiи], того ради не возмогоша, яко не увѣдаша пути Господня и суда Бога своего. |
5:5 См.: 🔗Пс. 2:3 | Пойду ко державнымъ и возглаголю имъ, тіи бо познаша путь Господень и судъ Бога своего. И се, единодушно сіи сокрушиша иго, расторгоша узы. |
5:6 | Сего ради порази ихъ левъ от дубравы, и волкъ даже до домовъ погуби ихъ, и рысь бдяше надъ градами ихъ: вси исходящiи от нихъ будутъ яти, яко умножиша нечестiя своя, укрѣпишася во отвращенiихъ своихъ. |
5:7 | О чемъ от сихъ милосердъ буду тебѣ? сынове твои оставиша мя и кляшася тѣми, иже не суть бози: насытихъ ихъ, и прелюбодѣйствоваша и въ домѣхъ блудницъ обиташа, |
5:8 См.: 🔗Иер. 13:27 🔗Иез. 22:11 | кони женонеистовни сотворишася, кійждо ко женѣ искренняго своего ржаше. |
5:9 См.: 🔗Иер. 9:9 | Еда от сихъ не посѣщу? рече Господь: или языку сицевому не мститъ душа моя? |
5:10 См.: 🔗Мф. 24:6 🔗Иер. 4:27 | Взыдите на стѣны его и разорите, окончанiя же не сотворите: оставите подпоры его, яко Господни суть. |
5:11 | Преступленiемъ бо преступилъ есть на мя домъ Израилевъ и домъ Иудинъ, глаголетъ Господь. |
5:12 См.: 🔗Ис. 28:15 | Солгаша Господу своему и рекоша: не суть сiя, ниже прiидутъ на насъ злая, и меча и глада не узримъ: |
5:13 См.: 🔗Иер. 22:22 | пророцы наши быша на вѣтръ, и слово Господне не бѣ въ нихъ, тако будетъ имъ. |
5:14 См.: 🔗Иер. 1:9 | Сего ради тако глаголетъ Господь силъ: занеже глаголали есте слово сiе, се, азъ даю словеса моя во уста твоя огнь, и люди сiя древа, и поястъ ихъ. |
5:15 См.: 🔗Втор. 28:49 🔗Иер. 1:15 | Се, азъ наведу на васъ языкъ издалеча, доме Израилевъ, рече Господь, языкъ сильный, языкъ старый, егоже языка не увѣси, [ни уразумѣеши, что глаголетъ]: |
5:16 | тулъ его яко гробъ отверстъ, *вси крѣпцыи– |
5:17 См.: 🔗Лев. 26:17 | –и поядятъ жатву вашу 17и хлѣбы вашя, и поядятъ сыновъ вашихъ и дщерей вашихъ, и снѣдятъ овецъ вашихъ и телцевъ вашихъ, и поядятъ винограды вашя и смокви вашя и масличiя ваша, и сокрушатъ грады вашя твердыя, на нихже вы уповасте, мечемъ. |
5:18 См.: 🔗Иер. 4:27 | Обаче во днехъ онѣхъ, глаголетъ Господь Богъ твой, не сотворю васъ во истребленiе. |
5:19 | И будетъ, егда речете: почто сотвори Господь Богъ нашъ намъ сiя вся? И речеши къ нимъ: яко остависте мя и послужисте богомъ чуждимъ въ земли вашей, тако послужите богомъ чуждимъ въ земли не вашей. |
5:20 | Возвѣстите сiя дому Иаковлю и слышано сотворите въ дому Иудинѣ [рекуще]: |
5:21 | слышите сiя, людiе буiи и не имущiи сердца, иже, имѣюще очи, не видите, и ушы, и не слышите: |
5:22 См.: 🔗Иов. 38:8 | мене ли не убоитеся? рече Господь: или от лица моего не устыдитеся? иже положихъ песокъ предѣлъ морю, заповѣдь вѣчну, и не превзыдетъ его, и возмутится и не возможетъ: и возшумятъ волны его, и не прейдутъ того. |
5:23 См.: 🔗Втор. 31:27 | Людемъ же симъ бысть сердце непослушно и непокориво, и уклонишася и поидоша, |
5:24 См.: 🔗Втор. 11:14 | и не рекоша въ сердцы своемъ: убоимся Господа Бога нашего, дающаго намъ дождь раннiй и поздный во время исполненiя повелѣнiя жатвы и хранящаго намъ. |
5:25 | Беззаконiя наша уклониша сiя, и грѣси наши отринуша благая от насъ. |
5:26 См.: 🔗Прит. 1:11 | Яко обрѣтошася въ людехъ моихъ нечестивiи, и сѣти поставиша, еже погубити мужы, и уловиша. |
5:27 | Аки клѣтка поставлена полна птицъ, тако домы ихъ полни лести: сего ради возвеличишася и обогатишася: |
5:28 | утыша и утолстѣша и преступиша словеса моя злѣйшiи: прю вдовицы не судиша, суда сира не управиша и суда убогимъ не судиша. |
5:29 См.: 🔗Иер. 9:9 | Еда сихъ ради не посѣщу? рече Господь: или языку сицевому не отмститъ душа моя? |
5:30 | Ужасъ и страшная содѣяшася на земли: |
5:31 См.: 🔗Иер. 23:25 🔗Иез. 13:6 | пророцы пророчествоваша неправедная, и священницы восплескаша руками своими, и людiе мои возлюбиша таковая. И что сотворите въ послѣдняя сихъ? |