Откровение Иоанна Богослова (Апокалипсис), глава 12

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Рус. (еп. Кассиан) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 12
12:1	И знаменiе велiе явися на небеси: жена облечена въ солнце, и луна подъ ногама ея, и на главѣ ея вѣнецъ от­ звѣздъ двою­на­де­ся­те:
12:2	и во чревѣ имущи, вопiетъ болящи и страждущи родити.
12:3 См.: 🔗Отк. 13:1 🔗Отк. 17:3 🔗Отк. 20:2	И явися ино знаменiе на небеси: и се, змій великъ черменъ, имѣя главъ седмь и роговъ десять, и на главахъ его седмь вѣнецъ:
12:4	и хоботъ его от­торже третiю часть звѣздъ небесныхъ и положи я въ землю {поверже я на землю}. И змій стояше предъ женою хотящею родити, да, егда родитъ, снѣсть чадо ея.
12:5 См.: 🔗Пс. 2:9 🔗1Кор. 15:25 🔗Отк. 2:27	И роди сына мужеска, иже имать упасти вся языки жезломъ желѣзнымъ: и восхищено бысть чадо ея къ Богу и престолу Его.
12:6 См.: 🔗Отк. 11:3	А жена бѣжа въ пустыню, идѣже имѣ мѣсто уготовано от­ Бога, да тамо питает­ся дній тысящу двѣстѣ шестьдесятъ.
12:7 См.: 🔗Дан. 10:13 🔗Дан. 12:1	И бысть брань на небеси: Михаилъ и Ангели его брань сотвориша со зміемъ, и змій брася и аггели его,
12:8	и не воз­могоша, и мѣста не обрѣтеся имъ ктому на небеси.
12:9 См.: 🔗Лк. 10:18	И вложенъ {поверженъ} бысть змій великiй, змій древнiй, нарицаемый дiаволъ и сатана, льстяй вселен­ную всю, и вложенъ {поверженъ} бысть на землю, и аггели его съ нимъ низвержени быша.
12:10 См.: 🔗Зах. 3:1	И слышахъ гласъ велiй на небеси, глаголющь: нынѣ бысть спасенiе и сила и цар­ст­во Бога на­шего и область Христа Его, яко низложенъ бысть клеветникъ братiи на­шея, оклевещая ихъ предъ Богомъ нашимъ день и нощь.
12:11 См.: 🔗Рим. 8:37	И тіи побѣдиша его кровiю Агнчею и словомъ свидѣтел­ст­ва сво­его, и не воз­любиша душъ сво­ихъ даже до смерти.
12:12 См.: 🔗Ис. 49:13	Сего ради веселитеся, небеса и живущiи на нихъ. Горе живущымъ на земли и мори, яко сниде дiаволъ къ вамъ, имѣя ярость великую, вѣдый, яко время мало имать.
12:13	И егда видѣ змій, яко низложенъ бысть на землю, гоняше жену, яже роди мужеска.
12:14 См.: 🔗Дан. 7:25 🔗Дан. 12:7	И дана быша женѣ два крила орла великаго, да паритъ въ пустыню въ мѣсто свое, идѣже препитана бяше ту время и временъ и полъ времене, от­ лица змiина.
12:15	И испусти змій за женою изъ устъ сво­ихъ воду яко рѣку, да ю въ рѣцѣ потопитъ.
12:16	И поможе земля женѣ, и от­верзе земля уста своя, и пожре рѣку, юже изведе змій от­ устъ сво­ихъ.
12:17	И разгнѣвася змій на жену и иде сотворити брань со остав­шимъ сѣменемъ ея, иже соблюдаютъ заповѣди Божiя и имѣютъ свидѣтел­ст­во Иисусъ Христово.