Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 10 | |
10:1 | Маккавей же и иже съ нимъ бяху, Господу ихъ защищающу, храмъ убо и градъ воспрiяша: |
10:2 | капища же от иноплеменниковъ на торжищи устроенная, еще же и требища раскопаша, |
10:3 | и очистивше храмъ, инъ олтарь сотвориша, и разжегше каменiе и вземше огнь от нихъ, принесоша жертву по двою лѣту и шести месяцѣхъ, и ѳимiамъ и свѣщники, и хлѣбовъ предложенiе сотвориша. |
10:4 | Сiя же сотворше, моляху Господа падше ницъ, да не ктому въ сицевая злая впадутъ, но аще когда и согрѣшатъ, от него съ кротостiю да наказуются, а не варваромъ и хульнымъ языкомъ предадятся. |
10:5 | И въ онъ же день храмъ от иноплеменникъ осквернися, случися въ той же день очищенiю быти храма, двадесять пятаго дне месяца, иже есть хаслевъ. |
10:6 | И съ веселiемъ праздноваху дній осмь по образу сѣней, поминающе, яко прежде малаго времене праздникъ сѣнницъ въ горахъ и въ пещерахъ звѣринымъ образомъ бяху провождающе. |
10:7 | Сего ради Ѳирси {вѣнцы изъ цвѣтовъ} и вѣтви зеленыя, еще же и финики имѣюще, пѣсни приношаху благопоспѣшившему очистити мѣсто свое. |
10:8 | И узакониша общимъ повелѣнiемъ и уставленiемъ всему языку Иудейску по вся лѣта праздновати дни сiя. |
10:9 | И Антiохъ убо, иже проименовашеся епифанъ, кончину тако имѣ. |
10:10 | Нынѣ же яже о Евпаторѣ Антiохѣ, сынѣ нечестиваго бывшемъ, речемъ, сокращающе злая, яже во бранехъ сотворена суть. |
10:11 | Сей бо воспрiявъ царствiе, постави надъ дѣлами царскими лисію нѣкоего, килисиріи же и Финикіи воеводу первоначальнаго. |
10:12 | Птоломей бо нарицаемый макронъ правду соблюдати произволивъ ко Иудеомъ бывшая ради къ нимъ обиды, покушашеся яже къ нимъ мирно препроводити. |
10:13 | Тѣмже оклеветанъ от друговъ ко Евпатору и часто нарицаемь акибы предатель, понеже кипръ ввѣренный от филомитора остави и ко Антiоху епифану отъиде, ниже честныя власти имущь, от печали отравивъ себе животъ сконча. |
10:14 | Горгіа же бывъ воевода надъ мѣстами, собираше чуждихъ воевъ и непрестанно на иудеи ратоваше. |
10:15 | Съ нимъ же купно и Идумеане обдержаще крѣпкiя твердыни обучаху Иудеовъ, и изгоняемыхъ изъ Иерусалима прiемлюще, ратовати начинаху. |
10:16 | Сущiи же со маккавеомъ сотворше молитву и моливше Бога споборника имъ быти, на Идумейскiя твердыни устремишася. |
10:17 | Къ нимъ же и приступивше мужественно одержаша мѣста, всѣмъ же на стѣнѣ ратующымъ отмстиша и срѣтающихся закалаху, убиша же не меньше двадесяти тысящъ. |
10:18 | Избѣгшымъ же нѣкiимъ не меньши девяти тысящъ въ двѣ пирги крѣпки зѣло и вся, яже противу облеженiя, имущыя, |
10:19 | маккавей оставивъ Симона и Иосифа, еще же и закхеа и иже съ нимъ довольныхъ ко облеженiю ихъ, на нуждная мѣста самъ отъиде. |
10:20 | Сущiи же съ Симономъ сребролюбивiи от нѣкiихъ, иже въ пиргахъ, сребромъ прельщени, и седмьдесятъ тысящъ драхмъ вземше, оставиша нѣкiихъ избѣжати. |
10:21 | Егда же возвѣстися маккавею о бывшемъ, собравъ начальники людій, порицаше, яко за сребро продаша братiю, супостатовъ на нихъ отпустивше. |
10:22 | Сихъ убо предателей бывшихъ уби и внезапу двѣ пирги разруши. |
10:23 | Оружiемъ же во всѣхъ и руками благоуспѣвая, погуби въ дву твердынехъ болѣе двадесяти тысящъ. |
10:24 См.: 🔗1Мак. 5:37 | Тимоѳей же, иже прежде от иудей бысть пораженъ, собравъ воевъ странныхъ множество, и во Асіи бывшихъ конниковъ собравъ не мало, прiиде аки оружiемъ Иудею хотящь взяти. |
10:25 | Маккавей же и сущiи съ нимъ, приближающуся тому, ко молитвѣ Божiй обратишася, главы землею посыпавше и чресла вретищами препоясавше, |
10:26 | предъ олтарнымъ прагомъ ницъ падше, моляху милостива имъ быти, враждовати же враждующымъ на нихъ и супостатомъ противитися яко законъ глаголетъ. |
10:27 | Бывше же по молитвѣ, воспрiемше оружiя далече изъ града изыдоша: приближшежеся къ супостатомъ, о себѣ сташа. |
10:28 | Солнцу же возсiявающу, обои сразишася: сіи убо споручника имуще благополучiя и побѣды съ добродѣтелiю ко Господу прибѣжище, они же воеводу браней учиниша ярость. |
10:29 | Пребывающей же крѣпцей брани, явишася супостатомъ от небесе мужiе пять на конехъ златы узды имущихъ, благолѣпни, и правяще Иудеовъ два: |
10:30 | и маккавеа средѣ себе вземше и защищающе своимъ всеоружiемъ невредима сохраняху, на супостаты же стрѣлы и молнiи метаху: тѣмже смѣсившеся невидѣнiемъ сѣчахуся мятежа исполнени. |
10:31 | Убiенныхъ же бысть двадесять тысящъ и пять сотъ, конныхъ же шесть сотъ. |
10:32 | Самъ же тимоѳей побѣже въ газару глаголемую твердыню, зѣло крѣпкую, воеводствующу тамо херею. |
10:33 | Маккавей же и сущiи съ нимъ весело обсѣдоша крѣпость дни четыри. |
10:34 | сущiи же внутрь на твердость мѣста уповающе, паче мѣры хуляху и словеса беззаконная изношаху. |
10:35 | Явльшужеся пятому дню двадесять юношей, иже съ маккавеемъ бѣху, разжегшеся яростiю хуленiя ради, приближившеся ко стѣнѣ, мужественно и звѣрообразною яростiю прилучившихся разсѣцаху. |
10:36 | Иніи же подобнѣ возшедше съ нуждею къ сущымъ внутрь, зажигаху пирги, и возжегше огнища, живыхъ хульниковъ сожгоша. |
10:37 | Иніи же врата разсѣкоша, и впустивше прочiй полкъ, взяша градъ, и тимоѳеа скрывшагося въ нѣкоемъ рвѣ заклаша, и брата его хереа и аполлофана. |
10:38 | Сiя же сотворше съ пѣсньми и исповѣданьми благословляху Господа благодѣтеля великаго Израилю и побѣду имъ давшаго. |