Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
1:1 | [Зач. 167А.] Павелъ, посланникъ Иисусъ Христовъ волею Божiею, и Тимоѳей братъ, церкви Божiей сущей въ Коринѳѣ, со святыми всѣми сущими во всей Ахаiи: |
1:2 См.: 🔗1Кор. 1:3 | благодать вамъ и миръ от Бога Отца нашего, и Господа Иисуса Христа. |
1:3 См.: 🔗Исх. 34:6 🔗1Пет. 1:3 | [Зач. 167Б.] Благословенъ Богъ и Отецъ Господа нашего Иисуса Христа, Отецъ щедротъ и Богъ всякiя утѣхи, |
1:4 См.: 🔗Пс. 33:20 | утѣшаяй насъ о всяцѣй скорби нашей, яко возмощи намъ утѣшити сущыя во всяцѣй скорби, утѣшенiемъ, имже утѣшаемся сами от Бога. |
1:5 См.: 🔗Кол. 1:24 | Зане якоже избыточествуютъ страданiя Христова въ насъ, тако Христомъ избыточествуетъ и утѣшенiе наше. |
1:6 | Аще ли же скорбимъ, о вашемъ утѣшенiи и спасенiи, дѣйствующемся въ терпѣнiи тѣхже страданiй, яже и мы страждемъ: |
1:7 | и упованiе наше извѣстно о васъ. Аще ли утѣшаемся, о вашемъ утѣшенiи и спасенiи, вѣдяще, зане якоже общницы есте страстемъ нашымъ, такожде и утѣшенiю. |
1:8 | [Зач. 168.] Не бо хощемъ васъ, братiе, не вѣдѣти о скорби нашей бывшей намъ во Асіи, яко по премногу [и] паче силы отяготихомся, яко не надѣятися намъ и жити. |
1:9 | Но сами въ себѣ осужденiе смерти имѣхомъ, да не надѣющеся будемъ на ся, но на Бога возставляющаго мертвыя, |
1:10 | иже от толикiя смерти избавилъ ны есть и избавляетъ, наньже и уповахомъ, яко и еще избавитъ, |
1:11 См.: 🔗Рим. 15:30 🔗2Кор. 4:15 | споспѣшествующымъ и вамъ по насъ молитвою, да от многихъ лицъ, еже въ насъ дарованiе, многими благодарится о васъ {въ нѣкiихъ: о насъ}. |
1:12 | [Зач. 169.] Похваленiе бо наше сiе есть, свидѣтелство совѣсти нашея, яко въ простотѣ и чистотѣ Божiей, [а] не въ мудрости плоти, но благодатiю Божiею жихомъ въ мiрѣ, множае же у васъ. |
1:13 | Не иная бо пишемъ вамъ, но яже чтете и разумѣваете: уповаю же, яко и до конца уразумѣете, |
1:14 | якоже и разумѣсте насъ от части, яко похваленiе вамъ есмы, якоже и вы намъ, въ день Господа нашего Иисуса Христа. |
1:15 См.: 🔗1Кор. 4:19 | И симъ упованiемъ хотѣхъ къ вамъ прiити прежде, да вторую благодать имате, |
1:16 | и вами проити въ Македонiю, и паки от Македонiи прiити къ вамъ, и вами проводитися во Иудею. |
1:17 См.: 🔗Мф. 5:37 | Сiе же хотя, еда что убо легкотою дѣяхъ? Или яже совѣщаваю, по плоти совѣщаваю, да будетъ у мене еже ей, ей, и еже ни, ни. |
1:18 | Вѣренъ же Богъ, яко слово наше, еже къ вамъ, не бысть ей и ни. |
1:19 | Ибо Божiй Сынъ Иисусъ Христосъ, иже у васъ нами проповѣданный, мною и Силуаномъ и Тимоѳеемъ, не бысть ей и ни, но въ Немъ Самѣмъ ей бысть: |
1:20 См.: 🔗Чис. 23:19 | елика бо обѣтованiя Божiя, въ Томъ ей и въ Томъ аминь: Богу къ славѣ нами. |
1:21 См.: 🔗1Ин. 2:20 | [Зач. 170.] Извѣствуяй же насъ съ вами во Христа и помазавый насъ, Богъ, |
1:22 | Иже и запечатлѣ насъ, и даде обрученiе Духа въ сердца наша. |
1:23 | Азъ же свидѣтеля Бога призываю на мою душу, яко щадя васъ, ктому не прiидохъ въ Коринѳъ, |
1:24 | не яко обладаемъ вѣрою вашею, но [яко] споспѣшницы есмы вашей радости: вѣрою бо стоите. |