Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
1:1 См.: 🔗Чис. 12:6 🔗1Пет. 1:10 | [Зач. 303.] Многочастнѣ и многообразнѣ древле Богъ глаголавый отцемъ во пророцѣхъ, |
1:2 | въ послѣдокъ дній сихъ глагола намъ въ Сынѣ, Егоже положи наслѣдника всѣмъ, Имже и вѣки сотвори. |
1:3 | Иже сый сiянiе славы и образъ ипостаси Его, нося же всяческая глаголомъ силы Своея, Собою очищенiе сотворивъ грѣховъ нашихъ, сѣде одесную престола величествiя на высокихъ, |
1:4 См.: 🔗Флп. 2:9 | толико лучшiй бывъ Ангеловъ, елико преславнѣе паче ихъ наслѣдствова имя. |
1:5 | Кому бо рече когда от Ангелъ: Сынъ Мой еси Ты, Азъ днесь родихъ Тя? И паки: Азъ буду Ему во Отца, и Той будетъ Мнѣ въ Сына? |
1:6 См.: 🔗Пс. 96:7 | Егда же паки вводитъ Первороднаго во вселенную, глаголетъ: и да поклонятся Ему вси Ангели Божiи. |
1:7 См.: 🔗Пс. 103:4 | И ко Ангеломъ убо глаголетъ: творяй Ангелы Своя духи и слуги Своя огнь палящь. |
1:8 См.: 🔗Лк. 1:32 | Къ Сыну же: престолъ Твой, Боже, въ вѣкъ вѣка: жезлъ правости жезлъ Царствiя Твоего: |
1:9 | возлюбилъ еси правду и возненавидѣлъ еси беззаконiе: сего ради помаза Тя, Боже, Богъ Твой елеемъ радости паче причастникъ Твоихъ. |
1:10 | [Зач. 304.] И [паки]: въ началѣ Ты, Господи, землю основалъ еси, и дѣла руку Твоею суть небеса: |
1:11 | та погибнутъ, Ты же пребываеши: и вся, якоже риза, обетшаютъ, |
1:12 См.: 🔗Пс. 101:26 | и яко одежду свiеши ихъ, и измѣнятся: Ты же тойжде еси, и лѣта Твоя не оскудѣютъ. |
1:13 | Кому же от Ангелъ рече когда: сѣди о десную Мене, дондеже положу враги Твоя подножiе ногъ Твоихъ? |
1:14 | Не вси ли суть служебнiи дуси, въ служенiе посылаеми за хотящихъ наслѣдовати спасенiе? |