|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
| 1:1 | [Зач. 302В.] Павелъ юзникъ Иисусъ Христовъ, и Тимоѳей братъ, Филимону возлюбленному и споспѣшнику нашему, |
| 1:2 | и Апфіи сестрѣ возлюбленнѣй, и Архиппу совоинственнику нашему, и домашней твоей церкви: |
| 1:3 | благодать вамъ и миръ от Бога Отца нашего, и Господа Иисуса Христа. |
| 1:4 | Благодарю Бога моего, всегда память о тебѣ творя въ молитвахъ моихъ, |
| 1:5 | слышавъ любовь твою и вѣру, юже имаши ко Господу Иисусу и ко всѣмъ святымъ, |
| 1:6 | яко да общенiе твоея вѣры дѣйственно будетъ въ разумѣ всякаго блага, еже въ васъ, о Христѣ Иисусѣ. |
| 1:7 | Радость бо имамъ многу и утѣшенiе о любви твоей, яко утробы святыхъ почиша тобою, брате. |
| 1:8 | Сего ради многое дерзновенiе имѣя во Христѣ повелѣвати тебѣ, еже потребно есть, |
| 1:9 | любве же ради паче молю, таковъ сый якоже Павелъ старецъ, нынѣ же и узникъ Иисуса Христа: |
| 1:10 | молю тя о моемъ чадѣ, егоже родихъ во узахъ моихъ Онисима, |
| 1:11 | иногда тебѣ непотребнаго, нынѣ же тебѣ и мнѣ благопотребна, егоже возпослахъ тебѣ, |
| 1:12 | ты же его, сирѣчь мою утробу, прiими. |
| 1:13 | Егоже азъ хотѣхъ у себе держати, да вмѣсто тебе послужитъ ми во узахъ благовѣствованiя: |
| 1:14 | безъ твоея же воли ничтоже восхотѣхъ сотворити, да не аки по нужди благое твое будетъ, но по воли. |
| 1:15 | Негли бо ради сего разлучися на часъ, да вѣчна того прiимеши, |
| 1:16 | не ктому аки раба, но выше раба, брата возлюбленна, паче же мнѣ, кольми же паче тебѣ, и по плоти и о Господѣ. |
| 1:17 | Аще убо имаши мене общника, прiими сего якоже мене. |
| 1:18 | Аще же въ чесомъ обидѣ тебе, или долженъ есть, мнѣ сiе вмѣни. |
| 1:19 | Азъ Павелъ написахъ рукою моею: азъ воздамъ: да не реку тебѣ, яко и самъ себе ми еси долженъ. |
| 1:20 | Ей, брате, азъ да получу еже прошу у тебе [да пользуюся тобою] о Господѣ: упокой мою утробу о Господѣ. |
| 1:21 | Надѣявся на послушанiе твое написахъ тебѣ, вѣдый, яко и паче, еже глаголю, сотвориши. |
| 1:22 | Купно же и уготови ми обитель: уповаю бо, яко молитвами вашими дарованъ буду вамъ. |
| 1:23 | Цѣлуетъ тя Епафрасъ, сплѣнникъ мой о Христѣ Иисусѣ, |
| 1:24 | Марко, Аристархъ, Димасъ, Лука, споспѣшницы мои. |
| 1:25 | Благодать Господа нашего Иисуса Христа со духомъ вашимъ. Аминь. Конецъ посланiю еже къ Филимону: имать въ себѣ главу 1. |
