Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 6 | |
6:1 См.: 🔗Неем. 13:21 | Бысть же егда услыша санаваллатъ и товіа и гисамъ Аравійскiй и прочiи врази наши, яко создахъ стѣну, и не остася въ нихъ скважня: и азъ даже до времене онаго дверiй не поставихъ во вратѣхъ: |
6:2 | и посла санаваллатъ и гисамъ ко мнѣ, глаголюща: прiиди, и соберемся вкупѣ въ весехъ на поли оно [глаголемѣмъ]. Тіи же помышляста мнѣ сотворити злое. |
6:3 | И послахъ къ нима пословъ, глаголя: дѣло велико азъ творю и не могу снити, да не престанетъ дѣло: егда же совершу е, взыду къ вама. |
6:4 | И посласта ко мнѣ, якоже глаголъ сей, четырижды, и послахъ къ нима по симъ. |
6:5 | И присла ко мнѣ санаваллатъ пятое отрока своего, и посланiе отверсто въ руку его, и бѣ написано въ немъ: |
6:6 | во языцѣхъ услышано есть, и гисамъ рече, яко ты и Иудее мыслите отступити, сего ради ты созидаеши стѣну, и ты да будеши имъ въ царя: |
6:7 | и къ симъ пророки поставилъ еси себѣ, да будеши во Иерусалимѣ царемъ надъ Иудою: и нынѣ возвѣстятся царю словеса сiя: и сего ради нынѣ прiиди, да сотворима совѣтъ вкупѣ. |
6:8 | И послахъ къ нему, глаголя: не сотворися по словесемъ симъ, якоже ты глаголеши, зане от сердца твоего ты лжеши въ сихъ: |
6:9 | яко вси страшатъ насъ, глаголюще: ослабѣютъ руцы ихъ от дѣла сего, и не сотворится: и нынѣ укрѣпихъ руки моя. |
6:10 | И азъ внидохъ въ домъ семеа сына далаіева, сына метавеилева, и той заключенъ, и рече: да соберемся въ домъ Божiй посредѣ его и заключимъ двери его, яко приходятъ нощiю, да убiютъ тя. |
6:11 См.: 🔗Чис. 18:7 | И рекохъ: кто есть мужъ, яковъ азъ, и убѣжитъ? или кто яко азъ, иже внидетъ въ домъ, и живъ будетъ? не вниду. |
6:12 | И уразумѣхъ, и се, Богъ не посла его: яко пророчествова слово на мя. |
6:13 | И товіа и санаваллатъ наяста на мя народъ, да устрашуся, и сотворю тако, и согрѣшу, и да буду имъ во имя зло, яко да поносятъ ми. |
6:14 | Помяни, Боже, товію и санаваллата по дѣломъ ихъ симъ, и ноадіа пророка и прочихъ пророкъ, иже страшаху мя. |
6:15 | И совершися стѣна въ двадесять пятый месяца Елула въ пятьдесятъ и два дни. |
6:16 См.: 🔗Исх. 8:19 | И бысть егда услышаша вси врази наши, и убояшася вси языцы, иже окрестъ насъ, и нападе страхъ великъ предъ очи ихъ, и познаша, яко от Господа Бога нашего совершено бысть дѣло сiе. |
6:17 | И во дни оны от многихъ державныхъ Иудиныхъ посланiя прихождаху къ товіи, и товіина [посланiя] прихождаху къ нимъ. |
6:18 | Мнози бо во Иудеи кляшася ему, яко зять бѣ сехеніи сына Ираева: и Ионаѳанъ сынъ его поя дщерь месулама сына Варахіина въ жену. |
6:19 | И словеса его быша глаголющiи ко мнѣ, и словеса моя быша износящiи ему. И посланiе посла товіа, да устрашитъ мене. |