Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 9 | |
9:1 | [Зач. 40.] Созвавъ же обанадесяте, даде имъ силу и власть на вся бѣсы, и недуги цѣлити: |
9:2 | и посла ихъ проповѣдати Царствiе Божiе и исцѣлити болящыя. |
9:3 | И рече къ нимъ: ничесоже возмите на путь: ни жезла, ни пиры, ни хлѣба, ни сребра, ни по двѣма ризама имѣти: |
9:4 | и въ оньже домъ внидете, ту пребывайте и оттуду исходите: |
9:5 | и елицы аще не прiемлютъ васъ, исходяще от града того, и прахъ от ногъ вашихъ оттрясите, во свидѣтелство на ня. |
9:6 | Исходяще же прохождаху сквозѣ веси, благовѣствующе и исцѣляюще всюду. |
9:7 | [Зач. 41.] Слыша же Иродъ четвертовластникъ бывающая от Него вся и недоумѣвашеся: зане глаголемо бѣ от нѣкихъ, яко Иоаннъ воста от мертвыхъ: |
9:8 | от инѣхъ же, яко Илiа явися: от другихъ же, яко пророкъ единъ от древнихъ воскресе. |
9:9 См.: 🔗Лк. 23:8 | И рече Иродъ: Иоанна азъ усѣкнухъ: кто же есть Сей, о Немже азъ слышу таковая? И искаше видѣти Его. |
9:10 См.: 🔗Мф. 14:13 🔗Мк. 6:32 | И возвращшеся апостоли повѣдаша Ему, елика сотвориша: и поимъ ихъ, отъиде единъ {особь} на мѣсто пусто града, нарицаемаго Виѳсаида. |
9:11 | Народи же разумѣвше, по Немъ идоша: и прiемъ ихъ, глаголаше имъ о Царствiи Божiи и требующыя исцѣленiя цѣляше. |
9:12 | День же начатъ прекланятися. [Зач. 42.] Приступльше же обанадесяте рекоша Ему: отпусти народъ, да шедше во окрестныя веси и села витаютъ и обрящутъ брашно: яко здѣ въ пустѣ мѣстѣ есмы. |
9:13 | Рече же къ нимъ: дадите имъ вы ясти. Они же рѣша: нѣсть у насъ вящше, токмо пять хлѣбъ и рыбѣ двѣ, аще убо не шедше мы купимъ во вся люди сiя брашна. |
9:14 | Бѣху бо мужей яко пять тысящъ. Рече же ко ученикомъ Своимъ: посадите ихъ на купы по пятидесятъ. |
9:15 | И сотвориша тако и посадиша ихъ вся. |
9:16 | Прiимъ же пять хлѣбъ и обѣ рыбѣ, воззрѣвъ на небо, благослови ихъ, и преломи, и даяше ученикомъ предложити народу. |
9:17 | И ядоша и насытишася вси: и взяша избывшыя имъ укрухи кошя дванадесяте. |
9:18 См.: 🔗Мф. 16:13 🔗Мк. 8:27 | [Зач. 43.] И бысть егда моляшеся единъ, съ Нимъ бѣху ученицы: и вопроси ихъ, глаголя: кого Мя глаголютъ народи быти? |
9:19 | Они же отвѣщавше рѣша: Иоанна Крестителя: иніи же Илiю: друзіи же, яко пророкъ нѣкiй от древнихъ воскресе. |
9:20 См.: 🔗Ин. 6:69 | Рече же имъ: вы же кого Мя глаголете быти? Отвѣщавъ же Петръ рече: Христа Божiя. |
9:21 | Онъ же запрещь имъ, повелѣ никомуже глаголати сего, |
9:22 См.: 🔗Мф. 17:22 | рекъ, яко подобаетъ Сыну Человѣческому много пострадати, и искушену {отвержену} быти от старецъ и архiерей и книжникъ, и убiену быти, и въ третiй день востати. |
9:23 | [Зач. 44.] Глаголаше же ко всѣмъ: аще кто хощетъ по Мнѣ ити, да отвержется себе, и возметъ крестъ свой, и послѣдуетъ Ми. |
9:24 | Иже бо аще хощетъ душу свою спасти, погубитъ ю: а иже погубитъ душу свою Мене ради, сей спасетъ ю. |
9:25 См.: 🔗Мф. 16:26 🔗Мк. 8:36 | Что бо пользы имать человѣкъ, прiобрѣтъ мiръ весь, себе же погубивъ или оттщетивъ? |
9:26 | Иже бо аще постыдится Мене и Моихъ словесъ, сего Сынъ Человѣческiй постыдится, егда прiидетъ во славѣ Своей и Отчей и святыхъ Ангелъ. |
9:27 | Глаголю же вамъ воистинну: суть нѣцыи от здѣ стоящихъ, иже не имутъ вкусити смерти, дондеже видятъ Царствiе Божiе. |
9:28 | [Зач. 45.] Бысть же по словесѣхъ сихъ яко дній осмь, и поемъ Петра и Иоанна и Иакова, взыде на гору помолитися. |
9:29 | И бысть егда моляшеся, видѣнiе лица Его ино, и одѣянiе Его бѣло блистаяся. |
9:30 | И се мужа два съ Нимъ глаголюща, яже бѣста Моисей и Илiа, |
9:31 См.: 🔗Лк. 22:37 | явльшася во славѣ, глаголаста же исходъ Его, егоже хотяше скончати во Иерусалимѣ. |
9:32 См.: 🔗2Пет. 1:16 | Петръ же и сущiи съ нимъ бяху отягчени сномъ: убуждшеся же видѣша славу Его, и оба мужа стояща съ Нимъ. |
9:33 | И бысть егда разлучистася от Него, рече Петръ ко Иисусу: Наставниче, добро есть намъ здѣ быти: и сотворимъ сѣни три, едину Тебѣ, и едину Моисеови, и едину Илiи: не вѣдый, еже глаголаше. |
9:34 | Се же ему глаголющу, бысть облакъ, и осѣни ихъ: убояшася же, вшедше во облакъ. |
9:35 | И гласъ бысть изъ облака, глаголя: Сей есть Сынъ Мой Возлюбленный, Того послушайте. |
9:36 | И егда бысть гласъ, обрѣтеся Иисусъ единъ. И тіи умолчаша, и никомуже возвѣстиша въ тыя дни ничесоже от тѣхъ, яже видѣша. |
9:37 | [Зач. 46.] Бысть же въ прочiй день, сшедшымъ имъ съ горы, срѣте Его народъ многъ. |
9:38 См.: 🔗Мф. 17:14 🔗Мк. 9:17 | И се мужъ изъ народа возопи, глаголя: Учителю, молютися, призри на сына моего, яко единороденъ ми есть: |
9:39 | и се духъ емлетъ его, и внезапу вопiетъ, и пружается {терзаетъ его} съ пѣнами, и едва отходитъ от него, сокрушая его: |
9:40 | и молихся ученикомъ Твоимъ, да ижденутъ его: и не возмогоша. |
9:41 | Отвѣщавъ же Иисусъ рече: о, роде невѣрный и развращенный, доколѣ буду въ васъ и терплю вы? Приведи [Ми] сына твоего сѣмо. |
9:42 | Еще же грядущу ему, поверже его бѣсъ и стрясе. Запрети же Иисусъ духови нечистому, и исцѣли отрока, и вдаде его отцу его. |
9:43 | Дивляхуся же вси о величiи Божiи. [Зач. 47.] Всѣмъ же чудящымся о всѣхъ, яже творяше Иисусъ, рече ко ученикомъ Своимъ: |
9:44 См.: 🔗Мф. 17:22 🔗Мк. 9:31 | вложите вы во ушы ваши словеса сiя: Сынъ бо Человѣческiй имать предатися въ руцѣ человѣчестѣ. |
9:45 См.: 🔗Лк. 2:50 | Они же не разумѣша глагола сего, бѣ бо прикровенъ от нихъ, да не ощутятъ его: и бояхуся вопросити Его о глаголѣ семъ. |
9:46 | Вниде же помышленiе въ нихъ, кто ихъ вящшiй бы былъ. |
9:47 | Иисусъ же вѣдый помышленiе сердецъ ихъ, прiемъ отроча, постави е у Себе |
9:48 | и рече имъ: иже аще прiиметъ сiе отроча во имя Мое, Мене прiемлетъ: и иже аще Мене прiемлетъ, прiемлетъ Пославшаго Мя: иже бо меншiй есть въ васъ, сей есть великъ. |
9:49 См.: 🔗Мк. 9:38 | [Зач. 48.] Отвѣщавъ же Иоаннъ рече: Наставниче, видѣхомъ нѣкоего о имени Твоемъ изгоняща бѣсы: и возбранихомъ ему, яко вослѣдъ не ходитъ съ нами. |
9:50 См.: 🔗Флп. 1:18 | И рече къ нему Иисусъ: не браните: иже бо нѣсть на вы, по васъ есть. |
9:51 См.: 🔗Мк. 16:19 🔗Деян. 1:2 | Бысть же егда скончавахуся дніе восхожденiю Его, и Той утверди лице Свое ити во Иерусалимъ: |
9:52 | и посла вѣстники предъ лицемъ Своимъ: и изшедше внидоша въ весь Самарянску, яко да уготовятъ Ему: |
9:53 См.: 🔗Ин. 4:9 | и не прiяша Его, яко лице Его бѣ грядущее во Иерусалимъ. |
9:54 См.: 🔗4Цар. 1:10 | Видѣвша же ученика Его Иаковъ и Иоаннъ, рѣста: Господи, хощеши ли, речема, да огнь снидетъ съ небесе и потребитъ ихъ, якоже и Илiа сотвори? |
9:55 | Обращься же запрети има, и рече: не вѣста, коего духа еста вы: |
9:56 См.: 🔗Мф. 18:11 🔗Ин. 3:17 | Сынъ бо Человѣческiй не прiиде душъ человѣческихъ погубити, но спасти: и идоша во ину весь. |
9:57 См.: 🔗Мф. 8:19 | [Зач. 49.] Бысть же идущымъ имъ по пути, рече нѣкiй къ Нему: иду по Тебѣ, аможе аще идеши, Господи. |
9:58 | И рече ему Иисусъ: лиси язвины имутъ, и птицы небесныя гнѣзда: Сынъ же Человѣческiй не имать гдѣ главу подклонити. |
9:59 | Рече же ко другому: ходи вслѣдъ Мене. Онъ же рече: Господи, повели ми, [да] шедъ прежде погребу отца моего. |
9:60 См.: 🔗Мф. 8:22 | Рече же ему Иисусъ: остави мертвыя погребсти своя мертвецы: ты же шедъ возвѣщай Царствiе Божiе. |
9:61 | Рече же и другій: иду по Тебѣ, Господи: прежде же повели ми отвѣщатися, иже суть {попроститися съ сущими} въ дому моемъ. |
9:62 | Рече же къ нему Иисусъ: никтоже возложь руку свою на рало и зря вспять, управленъ есть въ Царствiи Божiи. |