Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 9 | |
9:1 | О службѣ бо, яже ко святымъ, лишше ми есть писати вамъ, |
9:2 | вѣмъ бо усердiе ваше, имже о васъ хвалюся Македоняномъ, яко Ахаiа приготовися от мимошедшаго лѣта: и яже от васъ ревность раздражи множайшихъ. |
9:3 | Послахъ же братiю, да не похваленiе наше, еже о васъ, испразднится въ части сей, но да, якоже глаголахъ, приготовани будете: |
9:4 | да не како, аще прiидутъ со мною Македоняне и обрящутъ васъ неприготованныхъ, постыдимся мы, да не глаголемъ вы, въ части сей похваленiя. |
9:5 | Потребно убо умыслихъ умолити братiю, да прежде прiидутъ къ вамъ и предуготовятъ прежде возвѣщенное благословенiе ваше, сiе готово быти тако, якоже благословенiе, а не яко лихоимство. |
9:6 См.: 🔗Прит. 19:7 🔗Прит. 22:9 | [Зач. 188.] Се же глаголю: сѣяй скудостiю, скудостiю и пожнетъ: а сѣяй о благословенiи, о благословенiи и пожнетъ. |
9:7 | Кійждо якоже изволенiе имать сердцемъ, не от скорби, ни от нужды: доброхотна бо дателя любитъ Богъ. |
9:8 См.: 🔗1Тим. 6:6 | Силенъ же Богъ всяку благодать изобиловати въ васъ, да о всемъ всегда всяко доволство имуще, избыточествуете во всяко дѣло благо, |
9:9 См.: 🔗Пс. 111:9 | якоже есть писано: расточи, даде убогимъ: правда его пребываетъ во вѣкъ вѣка. |
9:10 См.: 🔗Ис. 55:10 | Даяй же сѣмя сѣющему и хлѣбъ въ снѣдь, да подастъ и умножитъ сѣмя ваше, и да возраститъ жита правды вашея, |
9:11 | да о всемъ богатящеся во всяку простоту, яже содѣваетъ нами благодаренiе Богу. |
9:12 | [Зач. 189.] Яко работа сего служенiя не токмо есть исполняющая лишенiя святыхъ, но и избыточествующая многими благодареньми Богови: |
9:13 | искушенiемъ служенiя сего славяще Бога о покоренiи исповѣданiя вашего въ Благовѣствованiи Христовѣ, и о простотѣ сообщенiя къ нимъ и ко всѣмъ, |
9:14 | и о тѣхъ молитвѣ о васъ, возжелѣющихъ васъ за премногую благодать Божiю на васъ. |
9:15 | Благодаренiе же Богови о неисповѣдимѣмъ Его дарѣ. |