Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 36 | |
36:1 | Помилуй ны, Владыко, Боже всѣхъ, и воззри, |
36:2 | и наложи страхъ твой на вся языки: |
36:3 См.: 🔗Иер. 10:25 | воздвигни руку твою на языки чужды, и да узрятъ силу твою. |
36:4 См.: 🔗4Цар. 19:19 | Якоже предъ ними освятился еси въ насъ, такожде предъ нами возвеличися на нихъ: |
36:5 | и да познаютъ тя, якоже и мы познахомъ тя, яко нѣсть Бога развѣ тебе, Господи. |
36:6 | Обнови знаменiя и измѣни чудеса, |
36:7 | прослави руку и мышцу десную [твою], воздвигни ярость и излій гнѣвъ, |
36:8 | изми сопостата и сотри врага, |
36:9 | поспѣши время и помяни клятву, и да повѣдятъ величiя твоя. |
36:10 | Гнѣвомъ огня пояденъ да будетъ спасаяйся, и озлобляющiи людій твоихъ да обрящутъ пагубу. |
36:11 | Сокруши главы князей вражiихъ, глаголющихъ: нѣсть развѣ насъ. |
36:12 См.: 🔗Исх. 4:22 | Собери вся колѣна Иаковля и наслѣдствуй ихъ якоже от начала. |
36:13 | Помилуй люди, Господи, нарѣченныя именемъ твоимъ, и Израиля, егоже первенцемъ нареклъ еси. |
36:14 | Ущедри градъ святыни твоея, Иерусалимъ, мѣсто покоища твоего. |
36:15 | Исполни Сiона взяти словеса твоя, и от славы твоея люди твоя. |
36:16 | Даждь свидѣтелство сущымъ от начала тваремъ твоимъ и воздвигни пророчествiя сущая о имени твоемъ: |
36:17 | даждь мзду терпящымъ тебе, и пророцы твои да увѣрятся. |
36:18 См.: 🔗Чис. 6:23 | Услыши, Господи, мольбы молитвенникъ твоихъ, по благословенiю Аароню о людехъ твоихъ, |
36:19 | и уразумѣютъ вси сущiи на земли, яко ты Господь еси, Богъ вѣковъ. |
36:20 | Всяко брашно ястъ чрево: есть же брашно брашна добрѣе. |
36:21 | Гортань вкушаетъ брашна от лова, тако сердце разумиво словеса ложна. |
36:22 | Сердце строптиво дастъ печаль, и человѣкъ многоискусный воздастъ ему. |
36:23 | Всякаго мужеска полу прiиметъ жена: есть же дщерь дщере лучше. |
36:24 См.: 🔗2Езд. 4:18 | Доброта женска веселитъ лице и надъ все желанiе человѣческо предуспѣваетъ: |
36:25 | аще есть на языцѣ ея милость и кротость, нѣсть мужъ ея точенъ сыномъ человѣческимъ. |
36:26 | Стяжавый жену начинаетъ имѣти стяжанiе, помощника по себѣ и столпа покою. |
36:27 | Идѣже нѣсть ограды, расхищено будетъ имѣнiе, и идѣже нѣсть жены, воздохнетъ скитаяся: |
36:28 | кто бо повѣритъ вооружену разбойнику преходящу от града во градъ? |
36:29 | Такожде и человѣку не имущу гнѣзда и обитающу, идѣже обвечеряетъ. |