|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 49 | |
| 49:1 | Память Иосіева въ сложенiе ѳимiама, и состроеное дѣломъ мироварника: |
| 49:2 | во всяцѣхъ устѣхъ яко медъ усладится, и яко мусикіа въ пирѣ вина. |
| 49:3 | Той управленъ бысть во обращенiе людій и отъятъ мерзости беззаконiя, |
| 49:4 | исправи ко Господу сердце свое, во дни беззаконныхъ укрѣпи благочестiе. |
| 49:5 | Кромѣ давида и езекіи и Иосіи, вси прегрѣшиша прегрѣшенiемъ, |
| 49:6 | оставиша бо законъ вышняго: царiе Иудины оскудѣша, |
| 49:7 | даша бо рогъ свой инѣмъ и славу свою языку чуждему, |
| 49:8 | сожгоша избранъ градъ святыни и опустошиша пути его рукою иереміиною: |
| 49:9 | озлобиша бо его, и той во чревѣ освященъ бысть пророкъ искоренити и озлобити и погубити, такожде создати и насадити. |
| 49:10 | Иезекіиль, иже видѣ видѣнiе славы, юже показа ему въ колесницѣ херувимстѣ: |
| 49:11 | помяну бо враги въ дожди, и благосотворити направляющымъ пути. |
| 49:12 | И обоюнадесяте пророковъ да процвѣтутъ кости от мѣстъ своихъ: утѣши бо Иакова и избавилъ я вѣрою надежды. |
| 49:13 | Како возвеличимъ зоровавеля? и сей яко печать на деснѣй руцѣ: |
| 49:14 | такожде иисусъ сынъ Иоседековъ: иже во дни своя создаста домъ и воздвигоста церковь святу Господеви, уготовану во славу вѣка. |
| 49:15 | И нееміи на мнозѣ [буди] память, воздвигшему намъ стѣны падшыя и поставльшему двери и заворы и воздвигшему домы падшыя нашя. |
| 49:16 | Никтоже созданъ бысть таковъ, яко Енохъ на земли: той бо взятъ бысть от земли. |
| 49:17 | Ниже яко Иосифъ бысть мужъ, вождь братiи, утвержденiе людемъ, и кости его посѣщены быша. |
| 49:18 | Симъ и Сиѳъ прославлена быста въ человѣцѣхъ, и паче всякаго животнаго въ твари Адамъ. |
