Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 2 | |
2:1 | Во днехъ тѣхъ воста маттаѳіа сынъ Иоанновъ, сына Симеоня, священникъ от сыновъ Иоаривлихъ от Иерусалима, и сѣде во модинѣ. |
2:2 | И имяше сыновъ пять: Иоанна, иже проименовашеся гаддисъ, |
2:3 | и Симона, иже проименовашеся Ѳассисъ, |
2:4 | Иуду, иже звашеся маккавей, |
2:5 | Елеазара, иже проименовашеся аваранъ, и Ионаѳана, иже проименовашеся апфусъ. |
2:6 | И видѣ хуленiя бывающая во Иудеи и во Иерусалимѣ, |
2:7 | и рече: увы мнѣ! почто рожденъ есмь видѣти сотренiе людій моихъ и сотренiе града святаго, и сѣдѣти здѣ, внегда предаватися ему въ руцѣ враговъ и святыни въ руки чуждихъ? |
2:8 | бысть храмъ его яко человѣкъ безчестенъ, |
2:9 | сосуды славы его плѣнени отнесени суть, побiени суть младенцы его на стогнахъ, и юношы его падоша мечемъ вражiимъ: |
2:10 | кій языкъ не наслѣдова царства его и не одержа корыстей его? |
2:11 | вся утварь его взята есть, вмѣсто свободнаго бысть въ раба: |
2:12 | и се, святая наша и красота наша и слава наша опустѣ, и оскверниша я языцы: |
2:13 | почто убо намъ еще жити? |
2:14 | И растерза ризы своя маттаѳіа и сынове его, и облекошася во вретища, и плакаша зѣло. |
2:15 | И прiидоша от царя принуждающiи ко отступленiю во градъ модинъ, да пожрутъ. |
2:16 | И мнози от Израиля приложишася къ нимъ: маттаѳіа же и сынове его собрашася. |
2:17 | И отвѣщаша посланнiи от царя и рѣша маттаѳіи глаголюще: князь и преславный и велiй еси во градѣ семъ, и утвержденъ въ сынѣхъ и братiихъ: |
2:18 | нынѣ убо приступи первый и сотвори повелѣнiе царево, якоже сотвориша вси языцы и мужiе Иудины и оставшiи во Иерусалимѣ, и будеши ты и домъ твой посредѣ друговъ царевыхъ: и ты и сынове твои прославитеся въ сребрѣ и златѣ и въ дарѣхъ мнозѣхъ. |
2:19 | И отвѣща маттаѳіа и рече гласомъ велiимъ: аще и вси языцы въ дому царствiя царя слушаютъ его, еже отступити комуждо от служенiя отецъ своихъ, и соизволиша въ заповѣдехъ его: |
2:20 | но азъ и сынове мои и братiя моя повинуемся закону отецъ нашихъ: |
2:21 | милостивъ намъ [буди, Боже], еже оставити законъ и оправданiя: |
2:22 | словесъ царевыхъ не послушаемъ, еже преступити служенiе наше на десно или на шуее. |
2:23 | И яко преста глаголати словеса сiя, приступи мужъ Иудеанинъ предъ очима всѣхъ жрети въ капищи, еже въ модинѣ, по повелѣнiю цареву. |
2:24 | И видѣ маттаѳіа и возревнова, и вострепеташа внутренняя его, и возжжеся ярость его по суду [закона], и наскочивъ разсѣче его въ капищи. |
2:25 | И мужа, егоже царь посла, иже принуждаше жрети, уби во время оно и капище разори. |
2:26 См.: 🔗Чис. 25:7 | И возревнова о законѣ, якоже же сотвори Финеесъ замврію сыну Саломлю. |
2:27 | И возопи маттаѳіа во градѣ гласомъ велiимъ глаголя: всякъ ревнуяй о законѣ и стояй въ завѣтѣ да изыдетъ вслѣдъ мене. |
2:28 | И отбѣжа самъ и сынове его въ горы, и оставиша, елика имѣяху во градѣ. |
2:29 | Тогда снидоша мнози ищуще суда и правды въ пустыню, |
2:30 | и сѣдоша ту сами, и сынове ихъ и жены ихъ, и скоти ихъ, яко умножишася на нихъ злая. |
2:31 | И возвѣщено бысть мужемъ царевымъ и силамъ, иже бяху во Иерусалимѣ градѣ давидовѣ, яко отидоша мужiе нѣцыи, иже разориша заповѣдь царску, въ мѣста тайная въ пустыню. |
2:32 | И текоша вслѣдъ ихъ мнози, и постигше ихъ ополчишася на нихъ, и составиша противу ихъ брань въ день субботный, |
2:33 | и рекоша къ нимъ: донынѣ доволно, изыдите и сотворите по слову цареву, и живи будете. |
2:34 | И рѣша: не изыдемъ, ни сотворимъ по слову цареву, еже осквернити день субботный. |
2:35 | И ускориша на нихъ брань. |
2:36 | И не отвѣщаша имъ, ниже камене вергоша на нихъ, ниже заградиша мѣстъ тайныхъ, рекуще: |
2:37 | умремъ вси въ простотѣ нашей, свидѣтеле будутъ на насъ небо и земля, яко неправо погубляете насъ. |
2:38 | И восташа на нихъ въ брани въ субботы, и умроша сіи и жены ихъ, и сынове ихъ и скоти ихъ, даже до тысящи душъ человѣкъ. |
2:39 | И позна маттаѳіа и друзи его, и плакашася о нихъ зѣло. |
2:40 | И рече мужъ искреннему своему: аще вси сотворимъ, якоже братiя наша сотвориша, и не воополчимся на языки о душахъ нашихъ и оправданiихъ нашихъ, нынѣ насъ скоро искоренятъ от земли. |
2:41 | И умыслиша въ день онъ глаголюще: всякъ человѣкъ, иже аще прiидетъ къ намъ на брань въ день субботный, ополчимся противу его, и не умремъ вси, якоже умроша братiя наша въ тайныхъ. |
2:42 | Тогда собрася къ нимъ сонмище Иудейское крѣпцыи въсилѣ от Израиля, всякъ соизволяяй закону: |
2:43 | и вси иже бѣжаша от злыхъ, приложишася имъ и быша имъ во утвержденiе. |
2:44 | И собраша воевъ и побиша грѣшныхъ во гнѣвѣ своемъ и мужей беззаконныхъ въ ярости своей: прочiи же бѣжаша во языки спастися. |
2:45 | И обыде маттаѳіа и друзи его, и разориша капища, |
2:46 | и обрѣзаша отроки необрѣзаныя, еликихъ обрѣтоша въ предѣлѣхъ Израилевыхъ въ силѣ, |
2:47 | и погнаша сыновъ гордыни, и успѣ дѣло въ руку ихъ: |
2:48 | и удержаша законъ от руки языковъ и от руки царей, и не даша рога грѣшнику. |
2:49 | И приближишася дніе маттаѳіи умрети, и рече сыномъ своимъ: нынѣ укрѣпися гордыня и обличенiе, и время низвращенiя и гнѣвъ ярости: |
2:50 | и нынѣ, чада, возревнуйте закону и дадите душы вашя за завѣтъ отцевъ нашихъ. |
2:51 | Помяните дѣла отецъ нашихъ яже сотвориша въродѣхъ своихъ, и прiимете славу велiю и имя вѣчное. |
2:52 | Авраамъ не во искушенiи ли обрѣтенъ есть вѣренъ, и вмѣнися ему въ правду? |
2:53 См.: 🔗Быт. 41:10 🔗Деян. 7:10 | Иосифъ во время тѣсноты своея сохрани заповѣдь и бысть господинъ Египту. |
2:54 См.: 🔗Чис. 25:7 🔗Сир. 45:28 | Финеесъ отецъ нашъ внегда возревнова ревностiю, прiятъ завѣтъ священства вѣчнаго. |
2:55 | Иисусъ, егда исполни слово, бысть судiя во Израили. |
2:56 См.: 🔗Чис. 14:24 🔗Нав. 14:13 | Халевъ, егда засвидѣтелствова въ церкви, воспрiя земли наслѣдiе. |
2:57 См.: 🔗2Цар. 2:4 | Давидъ во своей милости наслѣдова престолъ царствiя во вѣкъ вѣка. |
2:58 См.: 🔗4Цар. 2:11 | Илiа, егда возревнова ревностiю закона, взяся даже на небо. |
2:59 См.: 🔗Дан. 3:19 | Ананiа, азарiа, Мисаилъ вѣрующе спасошася от пламене. |
2:60 См.: 🔗Дан. 6:22 | Данiилъ въ простотѣ своей изъятся от устъ львовыхъ. |
2:61 | И тако помышляйте по роду и роду, яко вси уповающiи нань не изнемогутъ. |
2:62 | И от словесъ мужа грѣшна не убойтеся, понеже слава его въ мотыла и въ червiе: |
2:63 | днесь вознесется, а утрѣ не обрящется, яко обратися въ персть свою, и помышленiе его погибе. |
2:64 | и вы, сынове, укрѣпитеся и мужайтеся въ законѣ, яко въ немъ прославитеся. |
2:65 | И се, Симеонъ братъ вашъ, вѣмъ, яко мужъ совѣта есть, того послушайте вся дни, той будетъ вамъ во отца. |
2:66 | И Иуда маккавей, сей крѣпокъ въ силѣ от юности своея, сей будетъ вамъ началникъ воинства и сотворитъ брань людемъ. |
2:67 | И вы приведите къ себѣ вся творцы закона и отмстите мщенiе людій вашихъ: |
2:68 | воздайте воздаянiе языкомъ и внемлите въ заповѣди закона. |
2:69 | И благослови ихъ: и приложися ко отцемъ своимъ. |
2:70 | И умре въ лѣто сто четыредесять шестое: и погребоша его сынове его во гробѣхъ отецъ его въ модинѣ, и плакаша его весь Израиль плачемъ велiимъ. |