Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 9 | |
9:1 См.: 🔗Втор. 7:1 🔗Втор. 11:23 | Слыши, Израилю, ты преходиши Иорданъ днесь, внити еже наслѣдити языки великiя и крѣпчайшы паче васъ, грады велики и ограждены до небесе, |
9:2 См.: 🔗Чис. 13:23 | люди велики и многи и предолги, сыны Енаковы, яже ты вѣси, и ты слышалъ еси: кто противу станетъ сыномъ Енаковымъ? |
9:3 | И увѣси днесь, яко Господь Богъ твой Сей предъидетъ предъ лицемъ твоимъ: огнь попаляяй есть: Сей потребитъ я, и Сей отвратитъ я от лица твоего, и потребитъ я вскорѣ, якоже рече тебѣ Господь. |
9:4 | Не рцы въ сердцы твоемъ, егда потребитъ Господь Богъ твой языки сiя предъ лицемъ твоимъ, глаголя: правдъ ради моихъ введе мя Господь наслѣдити землю благую сiю: |
9:5 См.: 🔗Прем. 12:3 | не ради правды твоея, ниже преподобiя ради сердца твоего ты входиши наслѣдити землю ихъ, но нечестiя ради и беззаконiя языковъ сихъ Господь от лица твоего потребитъ я, и да уставитъ завѣтъ, имже клятся Господь отцемъ вашымъ, Аврааму и Исааку и Иакову: |
9:6 | и да увѣси днесь, яко не ради правды твоея Господь Богъ твой даетъ тебѣ землю благую сiю наслѣдити: яко людiе жестоковыйнiи есте. |
9:7 | Помни, не забуди, колико разгнѣвасте Господа Бога своего въ пустыни: от негоже дне изыдосте изъ земли Египетскiя, даже внидосте въ мѣсто сiе, не покаряющеся совершасте яже противу Господа: |
9:8 См.: 🔗Исх. 32:10 | и въ Хоривѣ разгнѣвасте Господа, и разгнѣвася Господь на вы, потребити васъ, |
9:9 См.: 🔗Исх. 24:18 🔗Исх. 34:28 | восходящу мнѣ на гору, взяти скрижали каменныя, скрижали завѣта, яже завѣща Господь къ вамъ: и пребыхъ въ горѣ четыредесять дній и четыредесять нощей: хлѣба не ядохъ и воды не пихъ. |
9:10 | И даде ми Господь двѣ скрижали каменны, написаны перстомъ Божiимъ, и на нихъ бяху написана вся словеса, яже глагола Господь къ вамъ въ горѣ изъ среды огня въ день собранiя: |
9:11 См.: 🔗Исх. 31:18 | и бысть по четыредесяти днехъ и по четыредесяти нощехъ, даде ми Господь двѣ скрижали каменны, скрижали завѣта, |
9:12 См.: 🔗Исх. 32:7 | и рече Господь ко мнѣ: востани и сниди скоро отсюду, яко беззаконноваша людiе твои, яже извелъ еси изъ земли Египетски: соступиша скоро съ пути, егоже заповѣдалъ еси имъ, и сотвориша себѣ слiянiе. |
9:13 См.: 🔗Исх. 33:3 | И рече Господь ко мнѣ: глаголахъ тебѣ единою и дважды, глаголя: видѣхъ люди сiя, и се, людiе жестоковыйнiи суть: |
9:14 См.: 🔗Исх. 32:10 | остави Мя, да потреблю я, и погублю имя ихъ подъ небесемъ, и сотворю тя въ языкъ великъ и крѣпокъ и многъ паче сихъ. |
9:15 См.: 🔗Исх. 32:15 🔗Евр. 12:18 | И возвратився снидохъ съ горы, и гора горяше огнемъ: и двѣ скрижали свидѣнiй во обою руку моею: |
9:16 | и видѣвъ, яко согрѣшисте предъ Господемъ Богомъ вашимъ, и сотвористе себѣ телца слiяна, и соступисте съ пути скоро, егоже заповѣда Господь вамъ творити, |
9:17 См.: 🔗Исх. 32:19 | и вземъ обѣ скрижали, повергохъ я изъ руку моею и сокрушихъ ихъ предъ вами. |
9:18 См.: 🔗Исх. 32:31 🔗Исх. 34:28 | И молихся предъ Господемъ второе, якоже и первое, четыредесять дній и четыредесять нощей, хлѣба не ядохъ и воды не пихъ, всѣхъ ради грѣховъ вашихъ, имиже согрѣшисте, творяще злое предъ Господемъ Богомъ вашимъ, еже разгнѣвати Его: |
9:19 | и боязненъ бѣхъ гнѣва ради и ярости, яко разгнѣвася Господь на вы, да потребитъ васъ: и послуша мене Господь и въ то время. |
9:20 См.: 🔗Исх. 32:21 | И на Аарона разгнѣвася Господь зѣло, еже погубити его: и молихся и за Аарона во время оно. |
9:21 См.: 🔗Исх. 32:20 🔗4Цар. 23:12 | И грѣхъ вашъ, егоже сотвористе, телца, взяхъ его и сожгохъ его на огни, и избихъ его и сотрохъ его зѣло, даже бысть дробенъ, и бысть яко прахъ, и изсыпахъ прахъ въ водотечу сходящую съ горы. |
9:22 См.: 🔗Чис. 11:1 🔗Исх. 17:7 | И въ Запаленiи, и во Искушенiи, и во гробѣхъ Похотѣнiя разгнѣвасте Господа Бога вашего. |
9:23 См.: 🔗Чис. 13:3 🔗Чис. 14:2 | И егда посла васъ Господь от Кадисъ-Варни, глаголя: взыдите и наслѣдите землю, юже Азъ даю вамъ: и сопротивистеся глаголу Господа Бога вашего, и не вѣровасте Ему, и не послушасте гласа Его: |
9:24 | и не покаряющеся бысте Господу от дне, въ оньже познася вамъ. |
9:25 См.: 🔗Исх. 32:11 | И молихся предъ Господемъ четыредесять дній и четыредесять нощей, въ няже молихся: рече бо Господь погубити васъ. |
9:26 См.: 🔗Чис. 14:13 | И молихся Богу и рекохъ: Господи, Господи Царю боговъ, не погуби людій Твоихъ и наслѣдiя Твоего, еже избавилъ еси крѣпостiю Твоею великою, яже извелъ еси изъ земли Египетскiя крѣпостiю Твоею великою и рукою сильною и мышцею Твоею высокою: |
9:27 См.: 🔗Исх. 32:13 | помяни Авраама и Исаака и Иакова, рабы Твоя, имже клялся еси Собою: не призирай на жестокость людій сихъ, и на нечестiе ихъ и на грѣхи ихъ: |
9:28 См.: 🔗Чис. 14:16 | да не когда рекутъ живущiи на земли, отнюдуже извелъ еси насъ, глаголюще: не могій Господь ввести ихъ въ землю, юже имъ обѣща, и ненавидя ихъ Господь, изведе погубити ихъ въ пустыни: |
9:29 См.: 🔗Исх. 19:5 🔗Исх. 32:11 | и сіи людiе Твои и жребiй Твой, ихже извелъ еси изъ земли Египетскiя крѣпостiю Твоею великою и мышцею Твоею высокою. |