Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 18 | |
18:1 | Глаголаше же и притчу къ нимъ, како подобаетъ всегда молитися и не стужати [си], |
18:2 | глаголя: [Зач. 88.] судiя бѣ нѣкiй въ нѣкоемъ градѣ, Бога не бояся и человѣкъ не срамляяся. |
18:3 | Вдова же нѣкая бѣ во градѣ томъ: и прихождаше къ нему, глаголющи: отмсти мене от соперника моего. |
18:4 | И не хотяше на долзѣ времени. Послѣди же рече въ себѣ: аще и Бога не боюся, и человѣкъ не срамляюся: |
18:5 | но зане творитъ ми труды вдовица сiя, отмщу ея: да не до конца приходящи застоитъ {трудитъ} мене. |
18:6 | Рече же Господь: слышите, что судiя неправды глаголетъ? |
18:7 | Богъ же не имать ли сотворити отмщенiе избранныхъ Своихъ, вопiющихъ къ Нему день и нощь, и долготерпя о нихъ? |
18:8 | Глаголю вамъ, яко сотворитъ отмщенiе ихъ вскорѣ. Обаче Сынъ Человѣческiй пришедъ убо обрящетъ ли [си] вѣру на земли? |
18:9 См.: 🔗Лк. 16:15 | Рече же и ко другимъ уповающымъ собою, яко суть праведницы, и уничижающымъ прочихъ, притчу сiю: |
18:10 | [Зач. 89.] человѣка два внидоста въ церковь помолитися: единъ фарисей, а другій мытарь. |
18:11 См.: 🔗Ис. 58:3 🔗Отк. 3:17 | Фарисей же ставъ, сице въ себѣ моляшеся: Боже, хвалу Тебѣ воздаю, яко нѣсмь якоже прочiи человѣцы, хищницы, неправедницы, прелюбодѣе, или якоже сей мытарь: |
18:12 | пощуся двакраты въ субботу, десятину даю всего елико притяжу. |
18:13 | Мытарь же издалеча стоя, не хотяше ни очiю возвести на небо: но бiяше перси своя, глаголя: Боже, милостивъ буди мнѣ грѣшнику. |
18:14 | Глаголю вамъ, яко сниде сей оправданъ въ домъ свой паче онаго: яко всякъ возносяйся смирится, смиряяй же себе вознесется. |
18:15 См.: 🔗Мф. 19:13 🔗Мк. 10:13 | [Зач. 90.] Приношаху же къ Нему и младенцы, да ихъ коснется: видѣвше же ученицы запретиша имъ. |
18:16 | Иисусъ же призвавъ ихъ, глагола: оставите дѣтей приходити ко Мнѣ и не браните имъ: таковыхъ бо есть Царствiе Божiе. |
18:17 | Аминь бо глаголю вамъ: иже аще не прiиметъ Царствiя Божiя яко отроча, не имать внити въ не. |
18:18 См.: 🔗Мф. 19:16 🔗Мк. 10:17 | [Зач. 91.] И вопроси Его нѣкiй князь, глаголя: Учителю благій, что сотворивъ, животъ вѣчный наслѣдствую? |
18:19 | Рече же ему Иисусъ: что Мя глаголеши блага, никтоже благъ, токмо единъ Богъ. |
18:20 См.: 🔗Исх. 20:12 🔗Втор. 5:17 | Заповѣди вѣси: не прелюбы твори: не убій: не укради: не лжесвидѣтелствуй: чти отца твоего и матерь твою. |
18:21 | Онъ же рече: вся сiя сохранихъ от юности моея. |
18:22 См.: 🔗1Тим. 6:18 | Слышавъ же сiя, Иисусъ рече ему: еще единаго не докончалъ еси: вся, елика имаши, продаждь, и раздай нищымъ: и имѣти имаши сокровище на небеси: и гряди вослѣдъ Мене. |
18:23 | Онъ же слышавъ сiе, прискорбенъ бысть: бѣ бо богатъ зѣло. |
18:24 | Видѣвъ же его Иисусъ прискорбна бывша, рече: како не удобь имущiи богатство въ Царствiе Божiе внидутъ: |
18:25 | удобѣе бо есть велбуду сквозѣ иглинѣ ушы проити, неже богату въ Царствiе Божiе внити. |
18:26 | Рѣша же слышавшiи: то кто можетъ спасенъ быти? |
18:27 | Онъ же рече: невозможная у человѣкъ возможна суть у Бога. |
18:28 См.: 🔗Мф. 19:27 🔗Мк. 10:28 | Рече же Петръ: се мы оставихомъ вся и по Тебѣ идохомъ. |
18:29 | Онъ же рече имъ: аминь глаголю вамъ, яко никтоже есть, иже оставитъ домъ, или родители, или братiю, или сестры, или жену, или чада, Царствiя ради Божiя, |
18:30 | иже не прiиметъ множицею во время сiе, и въ вѣкъ грядущiй животъ вѣчный. |
18:31 | [Зач. 92.] Поемь же обанадесяте ученики Своя, рече къ нимъ: се восходимъ во Иерусалимъ, и скончаются вся писанная пророки о Сынѣ Человѣчестѣ: |
18:32 См.: 🔗Ис. 53:7 | предадятъ бо Его языкомъ, и поругаются Ему, и укорятъ Его, и оплюютъ Его, |
18:33 | и бивше убiютъ Его: и въ третiй день воскреснетъ. |
18:34 | И тіи ничесоже от сихъ разумѣша: и бѣ глаголъ сей сокровенъ от нихъ, и не разумѣваху глаголемыхъ. |
18:35 См.: 🔗Мф. 20:29 🔗Мк. 10:46 | [Зач. 93.] Бысть же егда приближишася во Иерихонъ, слѣпецъ нѣкiй сѣдяше при пути прося: |
18:36 | слышавъ же народъ мимоходящь, вопрошаше: что убо есть се? |
18:37 | Повѣдаша же ему, яко Иисусъ Назарянинъ мимоходитъ. |
18:38 | И возопи, глаголя: Иисусе Сыне Давидовъ, помилуй мя. |
18:39 | И предъидущiи прещаху ему, да умолчитъ: онъ же паче множае вопiяше: Сыне Давидовъ, помилуй мя. |
18:40 | Ставъ же Иисусъ повелѣ привести его къ Себѣ: приближшуся же ему къ Нему, вопроси его, |
18:41 | глаголя: что хощеши, да ти сотворю? Онъ же рече: Господи, да прозрю. |
18:42 | Иисусъ же рече ему: прозри: вѣра твоя спасе тя. |
18:43 | И абiе прозрѣ, и вслѣдъ Его идяше, славя Бога. И вси людiе видѣвше воздаша хвалу Богови. |