Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 33 | |
33:1 См.: 🔗Иер. 32:2 | И бысть слово Господне ко иереміи вторицею, тойже бяше еще связанъ во дворѣ темничнѣмъ, глаголя: |
33:2 См.: 🔗Исх. 15:3 🔗Пс. 82:19 | тако рече Господь, творяй землю и устрояяй ю, еже исправити ю, Господь имя ему: |
33:3 | возопій ко мнѣ, и отвѣщаю ти и возвѣщу тебѣ великая и крѣпкая, ихже не разумѣлъ еси. |
33:4 См.: 🔗Иер. 22:10 | Яко тако рече Господь Богъ Израилевъ о домѣхъ града сего и о храмѣхъ царя Иудина, растерзанныхъ на остроги и на забрала, |
33:5 См.: 🔗Втор. 31:17 | еже противитися ко халдеемъ, и наполню его мертвыми человѣки, ихже поразихъ во гнѣвѣ моемъ и въ ярости моей, и отвратихъ лице мое от нихъ всѣхъ ради злобъ ихъ. |
33:6 См.: 🔗Иер. 30:17 | Се, азъ наведу на ня срастѣнiе язвы и исцѣленiе, и изврачую я и явлю имъ, еже слушати, и исцѣлю я и сотворю имъ миръ и вѣру: |
33:7 | и обращу преселенiе Иудино и преселенiе Израилево, и согражду я, якоже и прежде, |
33:8 См.: 🔗Иер. 31:34 | и очищу я от всѣхъ неправдъ ихъ, имиже согрѣшиша ми, и милостивъ буду всѣмъ неправдамъ ихъ, имиже отступиша от мене. |
33:9 См.: 🔗Втор. 26:19 | И будетъ въ веселiе и во хвалу и въ величiе всѣмъ людемъ земли, иже услышатъ вся благоты, яже азъ сотворю имъ, и убоятся, и огорчатся о всѣхъ благотахъ и о всемъ мирѣ, егоже азъ сотворю имъ. |
33:10 См.: 🔗Иер. 32:43 | Тако рече Господь: еще услышится въ семъ мѣстѣ, о немже вы глаголете: пусто есть от человѣкъ и от скотъ, во градѣхъ Иудиныхъ и внѣ Иерусалима, опустѣвшихъ, понеже нѣсть человѣка, ни скота, |
33:11 См.: 🔗Пс. 135:1 | гласъ веселiя и гласъ радости, гласъ жениха и гласъ невѣсты, гласъ глаголющихъ: исповѣдайтеся Господеви Вседержителю, яко благъ Господь, яко въ вѣкъ милость его: и принесутъ дары похваленiя въ домъ Господень, яко возвращу все преселенiе земли тоя по прежнему, рече Господь. |
33:12 | Тако глаголетъ Господь силъ: еще будутъ на семъ мѣстѣ пустѣмъ, за еже не быти человѣку, ни скоту, во всѣхъ градѣхъ его обиталища пастуховъ пасущихъ овцы, |
33:13 | во градѣхъ горнихъ и во градѣхъ польныхъ, и во градѣхъ нагевъ и въ земли Венiамини, и во окрестныхъ Иерусалима и во градѣхъ Иудиныхъ, еще пойдутъ овцы къ руцѣ исчисляющаго, глаголетъ Господь. |
33:14 См.: 🔗Иер. 23:5 | Се, дніе грядутъ, рече Господь, и возставлю слово благо, еже глаголахъ къ дому Израилеву и къ дому Иудину. |
33:15 См.: 🔗Ис. 11:1 🔗Иер. 23:5 | Во днехъ онѣхъ и въ то время произрастити сотворю давиду отрасль правды, и сотворитъ судъ и правду на земли. |
33:16 См.: 🔗Втор. 33:28 🔗Иер. 23:6 | Во днехъ онѣхъ спасенъ будетъ Иуда, и Иерусалимъ пребудетъ въ надежди: и сiе есть имя, имже нарекутъ его: Господь праведенъ нашъ. |
33:17 | Тако бо рече Господь: не оскудѣетъ от давида мужъ сѣдяй на престолѣ дому Израилева: |
33:18 | и от жерцевъ и от левитовъ не погибнетъ мужъ от лица моего, приносяй всесожженiя и даръ и творяй жертвы по вся дни. |
33:19 | И бысть слово Господне ко иереміи глаголя: |
33:20 См.: 🔗Иер. 31:37 | тако глаголетъ Господь: можетъ ли разоритися завѣтъ мой со днемъ и завѣтъ мой съ нощiю, еже не быти дню и нощи во время свое? |
33:21 | то и завѣтъ мой разорится съ давидомъ рабомъ моимъ, еже не быти от него сыну царствующу на престолѣ его, и съ Левиты и священники рабы моими. |
33:22 | Якоже сочтены быти не могутъ звѣзды небесныя, ни измѣренъ быти песокъ морскій, тако умножу сѣмя раба моего давида и левиты служители моя. |
33:23 | И бысть слово Господне ко иереміи глаголя: |
33:24 | еда не видѣлъ еси, что рекоша людiе сіи, глаголюще: два народа, ихже избра Господь, и се, отверже я: и преогорчиша людій моихъ, [сего ради] яко да не будетъ ктому народъ предъ ними? |
33:25 См.: 🔗Иер. 31:36 🔗Иер. 33:20 | Тако рече Господь: не положихъ ли убо завѣта моего между днемъ и нощiю и законовъ небеси и земли? |
33:26 | Тогда и сѣмя Иаковле и давида раба моего отвергу, еже не прiяти от сѣмене его князей сѣмене Авраама и Исаака и Иакова: яко паки возвращу плѣнъ ихъ и помилую ихъ. |