Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 См.: 🔗Прит. 4:4 | И призва Моисей всего Израиля и рече къ нимъ: слыши, Израилю, оправданiя и суды, елика азъ глаголю во ушы ваши во днешнiй день, и научитеся ихъ, и сохраните творити я. |
5:2 См.: 🔗Исх. 19:5 | Господь Богъ вашъ завѣща вамъ завѣтъ въ Хоривѣ: |
5:3 См.: 🔗Быт. 17:2 | не отцемъ вашымъ завѣща Господь завѣтъ сей, но токмо вамъ: вы же здѣ вси живи днесь. |
5:4 | Лицемъ къ лицу глагола Господь къ вамъ на горѣ изъ среды огня, |
5:5 См.: 🔗Гал. 3:19 | и азъ стояхъ между Господемъ и вами во время оно возвѣстити вамъ глаголы Господня, яко убоястеся от лица огня и не взыдосте на гору, глаголя: |
5:6 См.: 🔗Исх. 20:2 🔗Пс. 80:11 | Азъ есмь Господь Богъ твой, изведый тя изъ земли Египетскiя, от дому работы: |
5:7 | да не будутъ тебѣ бози инiи предъ лицемъ Моимъ. |
5:8 | Да не сотвориши себѣ кумiра, ни всякаго подобiя, елика на небеси горѣ, и елика на земли низу, и елика въ водахъ подъ землею, |
5:9 | да не поклонишися имъ, ниже послужиши имъ: яко Азъ есмь Господь Богъ твой, Богъ ревнивъ, отдаяй грѣхи отцевъ на чада до третiяго и четвертаго рода ненавидящымъ Мене, |
5:10 | и творяй милость въ тысящахъ любящымъ Мене и хранящымъ повелѣнiя Моя. |
5:11 | Да не прiимеши имене Господа Бога твоего всуе: не очиститъ бо Господь Богъ твой прiемлющаго имя Его всуе. |
5:12 | Снабди день субботный святити его, якоже заповѣда тебѣ Господь Богъ твой: |
5:13 См.: 🔗Исх. 20:9 🔗Лев. 23:3 | шесть дній дѣлай, и да сотвориши вся дѣла твоя, |
5:14 См.: 🔗Исх. 20:10 🔗Евр. 4:4 | въ день же седмый суббота Господу Богу твоему: да не сотвориши въ онь всякаго дѣла, ты и сынъ твой и дщерь твоя, рабъ твой и раба твоя, волъ твой и оселъ твой и всякъ скотъ твой, и пришлецъ обитаяй у тебе, да почіетъ рабъ твой и раба твоя, и оселъ твой, якоже и ты: |
5:15 См.: 🔗Втор. 16:12 🔗Иер. 21:5 | и да помянеши, яко [и ты] рабъ былъ еси въ земли Египетстѣй и изведе тя Господь Богъ твой оттуду рукою крѣпкою и мышцею высокою: сего ради повелѣ тебѣ Господь Богъ твой, еже хранити день субботный и святити его. |
5:16 | Чти отца твоего и матерь твою, якоже заповѣда тебѣ Господь Богъ твой, да благо ти будетъ и да долголѣтенъ будеши на земли, юже Господь Богъ твой даетъ тебѣ. |
5:17 | Не убій. |
5:18 | Не прелюбодѣйствуй. |
5:19 | Не укради. |
5:20 | Не послушествуй на ближняго твоего свидѣтелства ложна. |
5:21 | Не пожелай жены ближняго твоего, не пожелай дому ближняго твоего, ни села его, ни раба его, ни рабыни его, ни вола его, ни осляте его, ни всякаго скота его, ниже всѣхъ, елика ближняго твоего суть. |
5:22 См.: 🔗Исх. 20:1 | Сiя словеса глагола Господь ко всему сонму вашему на горѣ изъ среды огня: тма, мракъ, буря, гласъ великъ, и не приложи: и написа я на двоихъ скрижалехъ каменныхъ, и даде мнѣ. |
5:23 См.: 🔗Исх. 20:18 | И бысть яко услышасте гласъ изъ среды огня, и гора горяше огнемъ, и прiидосте ко мнѣ вси началницы племенъ вашихъ и старѣйшины ваши, |
5:24 См.: 🔗Исх. 33:20 | и рѣсте: се, показа намъ Господь Богъ нашъ славу Свою, и гласъ Его слышахомъ изъ среды огня: во днешнiй день видѣхомъ, яко возглаголетъ Богъ человѣку, и живъ будетъ: |
5:25 См.: 🔗Исх. 20:19 🔗Суд. 13:22 | и нынѣ да не измремъ, яко потребитъ насъ огнь великiй сей, аще приложимъ мы слышати гласъ Господа Бога нашего ктому, и умремъ: |
5:26 | кая бо плоть, яже слыша гласъ Бога жива, глаголюща изъ среды огня, якоже мы, и жива будетъ? |
5:27 См.: 🔗Исх. 19:8 | Приступи ты, и послушай вся, елика къ тебѣ речетъ Господь Богъ нашъ, и ты речеши къ намъ вся, елика речетъ Господь Богъ нашъ къ тебѣ, и услышимъ, и сотворимъ. |
5:28 См.: 🔗Прем. 1:6 🔗Втор. 18:17 | И услыша Господь гласъ словесъ вашихъ, глаголющымъ вамъ ко мнѣ, и рече Господь ко мнѣ: слышахъ гласъ словесъ людій сихъ, елика глаголаша къ тебѣ: право вся, елика глаголаша: |
5:29 См.: 🔗Пс. 80:14 🔗Ис. 48:18 | кто дастъ еже быти тако сердцу ихъ въ нихъ, яко боятися Мене и хранити заповѣди Моя во вся дни, да благо будетъ имъ и сыномъ ихъ во вѣки? |
5:30 | Гряди, рцы имъ: возвратитеся вы въ домы своя: |
5:31 | ты же здѣ стани со Мною, и возглаголю къ тебѣ вся заповѣди и оправданiя и суды, еликимъ научиши ихъ: и да сотворятъ сице въ земли, юже Азъ даю имъ въ жребiй: |
5:32 См.: 🔗Втор. 17:11 🔗Втор. 28:14 | и сохраните творити, якоже заповѣда тебѣ Господь Богъ твой: не совратитеся ни на десно, ни на лѣво, |
5:33 См.: 🔗Быт. 18:19 🔗3Цар. 3:2 | по всему пути, егоже заповѣда тебѣ Господь Богъ твой ходити въ немъ, да тя упокоитъ, и благо тебѣ будетъ: и многи дни будете на земли, юже наслѣдите. |