Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Псалом 9 | |
9:1 | Въ конецъ, о тайныхъ сына, псаломъ Давиду, 9. |
9:2 | Исповѣмся Тебѣ, Господи, всѣмъ сердцемъ моимъ, повѣмъ вся чудеса Твоя. |
9:3 См.: 🔗Пс. 30:8 | Возвеселюся и возрадуюся о Тебѣ, пою имени Твоему, Вышнiй. |
9:4 | Внегда возвратитися врагу моему вспять, изнемогутъ и погибнутъ от лица Твоего. |
9:5 | Яко сотворилъ еси судъ мой и прю мою: сѣлъ еси на престолѣ, судяй правду. |
9:6 | Запретилъ еси языкомъ, и погибе нечестивый: имя его потребилъ еси въ вѣкъ и въ вѣкъ вѣка. |
9:7 | Врагу оскудѣша оружiя въ конецъ, и грады разрушилъ еси: погибе память его съ шумомъ. |
9:8 | И Господь во вѣкъ пребываетъ, уготова на судъ престолъ Свой: |
9:9 См.: 🔗Пс. 95:13 🔗Деян. 17:31 | и Той судити имать вселеннѣй въ правду, судити имать людемъ въ правотѣ. |
9:10 См.: 🔗Пс. 31:7 | И бысть Господь прибѣжище убогому, помощникъ во благовременiихъ, въ скорбехъ. |
9:11 | И да уповаютъ на Тя знающiи имя Твое, яко не оставилъ еси взыскающихъ Тя, Господи. |
9:12 | Пойте Господеви, живущему въ Сiонѣ, возвѣстите во языцѣхъ начинанiя Его: |
9:13 См.: 🔗Быт. 4:9 🔗Втор. 32:43 | яко взыскаяй крови ихъ помяну, не забы званiя убогихъ. |
9:14 | Помилуй мя, Господи, виждь смиренiе мое от врагъ моихъ, возносяй мя от вратъ смертныхъ: |
9:15 | яко да возвѣщу вся хвалы Твоя во вратѣхъ дщере Сiони: возрадуемся о спасенiи Твоемъ. |
9:16 См.: 🔗Пс. 7:16 | Углѣбоша языцы въ пагубѣ, юже сотвориша: въ сѣти сей, юже скрыша, увязе нога ихъ. |
9:17 | Знаемь есть Господь судьбы творяй: въ дѣлѣхъ руку своею увязе грѣшникъ. |
9:18 | Да возвратятся грѣшницы во адъ, вси языцы забывающiи Бога. |
9:19 См.: 🔗Пс. 33:7 | Яко не до конца забвенъ будетъ нищiй, терпѣнiе убогихъ не погибнетъ до конца. |
9:20 | Воскресни, Господи, да не крѣпится человѣкъ, да судятся языцы предъ Тобою. |
9:21 См.: 🔗Ис. 31:3 | Постави, Господи, законоположителя надъ ними, да разумѣютъ языцы, яко человѣцы суть. |
9:22 | Вскую, Господи, отстоя далече, презираеши во благовременiихъ, въ скорбехъ? |
9:23 | Внегда гордитися нечестивому, возгарается нищiй: увязаютъ въ совѣтѣхъ, яже помышляютъ. |
9:24 | Яко хвалимь есть грѣшный въ похотехъ души своея, и обидяй благословимь есть. |
9:25 | Раздражи Господа грѣшный: по множеству гнѣва своего не взыщетъ: нѣсть Бога предъ нимъ. |
9:26 | Оскверняются путiе его на всяко время: отъемлются судьбы Твоя от лица его: всѣми враги своими обладаетъ. |
9:27 | Рече бо въ сердцы своемъ: не подвижуся от рода въ родъ безъ зла: |
9:28 См.: 🔗Рим. 3:14 | егоже клятвы уста его полна суть, и горести и льсти: подъ языкомъ его трудъ и болѣзнь. |
9:29 См.: 🔗Деян. 23:15 | Присѣдитъ въ ловителствѣ съ богатыми въ тайныхъ, еже убити неповиннаго: очи его на нищаго призираетѣ. |
9:30 См.: 🔗Пс. 16:12 | Ловитъ въ тайнѣ яко левъ во оградѣ своей, ловитъ еже восхитити нищаго, внегда привлещи и въ сѣти своей. |
9:31 См.: 🔗Ис. 3:15 | Смиритъ его: преклонится и падетъ, внегда ему обладати убогими. |
9:32 См.: 🔗Иов. 22:13 | Рече бо въ сердцы своемъ: забы Богъ, отврати лице Свое, да не видитъ до конца. |
9:33 См.: 🔗Мк. 4:38 | Воскресни, Господи Боже мой, да вознесется рука Твоя, не забуди убогихъ Твоихъ до конца. |
9:34 | Чесо ради прогнѣва нечестивый Бога? Рече бо въ сердцы своемъ: не взыщетъ. |
9:35 См.: 🔗Пс. 67:6 | Видиши, яко Ты болѣзнь и ярость смотряеши, да преданъ будетъ въ руцѣ Твои: Тебѣ оставленъ есть нищiй, сиру Ты буди помощникъ. |
9:36 См.: 🔗Иез. 30:24 | Сокруши мышцу грѣшному и лукавому: взыщется грѣхъ его и не обрящется. |
9:37 См.: 🔗Иер. 10:10 🔗Дан. 6:26 | Господь Царь во вѣкъ и въ вѣкъ вѣка: погибнете, языцы, от земли Его. |
9:38 | Желанiе убогихъ услышалъ еси, Господи, уготованiю сердца ихъ внятъ ухо Твое. |
9:39 | Суди сиру и смирену, да не приложитъ ктому величатися человѣкъ на земли. |