Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 8 | |
8:1 | И прiиде месяцъ седмый, сынове же Израилевы бяху во градѣхъ своихъ: и собрашася вси людiе яко мужъ единъ на пространство, еже предъ враты водными, и рекоша ездрѣ писарю, да принесетъ книгу закона Моисеова, егоже заповѣда Господь Израилю. |
8:2 См.: 🔗Лев. 23:34 | И принесе ездра священникъ законъ предъ множество от мужей даже до женъ, и всѣмъ, иже можаху разумѣти слышаще, въ день первый месяца седмаго, |
8:3 См.: 🔗Неем. 13:1 | и чте въ немъ [явно на пространствѣ, еже предъ враты водными], от утра даже до полудне, предъ мужи и женами, и сіи бяху разумѣюще, и уши всѣхъ людій ко книзѣ закона. |
8:4 См.: 🔗Неем. 9:4 🔗Мф. 23:2 | И ста ездра писецъ на степени древянѣмъ, егоже сотвориша къ народовѣщанiю, и сташа близъ его Матѳаѳіа и самеа, и Ананіа и уріа, и хелкіа и маасіа одесную его, ошуюю же фадаіа и Мисаилъ, и Мелхіа и осамъ, и Асавадма и захарiа и Месолламъ. |
8:5 | И разгну ездра книгу предъ всѣми людьми, яко той бѣ надъ людьми, и бысть егда разгибаше ю, сташа вси людiе. |
8:6 См.: 🔗Чис. 5:22 | И благослови ездра Господа Бога великаго, и отвѣщаша вси людiе и рѣша аминь, воздвигше руцѣ свои, и преклонишася и поклонишася Господеви лицемъ на землю. |
8:7 | Иисусъ же и ванаіа и саравіа, аканъ, Саватей, камптасъ, азаріа, Иозаваданъ, Анифанесъ и левити бяху вразумляюще людій въ законѣ: людiе же стояху на стоянiи своемъ. |
8:8 | И чтоша въ книзѣ закона Божiя, и поучаше ездра и изъясняше ко разумѣнiю Господню, и разумѣша людiе чтенiе. |
8:9 | Рече же нееміа и ездра священникъ и писецъ, и левити и толкующiи людемъ, и рѣша всѣмъ людемъ: день святъ есть Господу Богу нашему, не рыдайте и не плачите. Понеже плакаша вси людiе, егда услышаша словеса закона. |
8:10 См.: 🔗Есф. 9:19 🔗Прит. 31:6 | И рече имъ: идите и ядите тучная и пійте сладкая, и послите части не имущымъ, яко святъ есть день Господеви нашему, и не печалитеся, ибо радость Господня сiя есть сила наша. |
8:11 | Левити же молчанiе творяху во всѣхъ людехъ, глаголюще: молчите, яко день святъ есть, и не тужите. |
8:12 | И отидоша вси людiе ясти и пити, и послати части, и сотворити веселiе велико, яко разумѣша словеса, имже научиша ихъ. |
8:13 | И въ день вторый собрашася князiе отечествъ со всѣми людьми, священницы и левити ко ездрѣ писцу, да протолкуетъ всѣмъ словеса законная. |
8:14 См.: 🔗Исх. 23:16 | И обрѣтоша писано въ законѣ, егоже заповѣда Господь рукою Моисеовою, да обитаютъ сынове Израилевы въ кущахъ въ праздникъ месяца седмаго, |
8:15 | и да проповѣдятъ трубами во всѣхъ градѣхъ ихъ и во Иерусалимѣ. И рече ездра: изыдите на гору, и принесите вѣтви масличны, и вѣтви древесъ кипарисныхъ, и вѣтви мирсинныя, и вѣтви финиковы, и вѣтви древесъ дубравныхъ, сотворити кущы по писаному. |
8:16 | И изыдоша людiе, и принесоша, и сотвориша себѣ кущы кійждо на кровѣ своемъ и во дворѣхъ своихъ, и во дворѣхъ дому Божiя и на пространствѣ вратъ водныхъ и на пространствѣ вратъ Ефремлихъ. |
8:17 | И сотвориша весь сонмъ возвративыйся от плѣненiя кущы, и сѣдоша въ кущахъ, яко не сотвориша от дній иисуса сына навина тако сынове Израилевы даже до дне того. И бысть веселiе велико. |
8:18 См.: 🔗Втор. 31:10 🔗Лев. 23:36 | И читаху въ книзѣ закона Божiя на всякъ день, от дне перваго даже до дне послѣдняго. И сотвориша праздникъ седмь дній, и въ день осмый собранiе по обычаю. |