Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 16 | |
16:1 См.: 🔗Исх. 15:21 | И рече Иудиѳъ: начните Богу моему въ тимпанѣхъ, пойте Господеви моему въ кимвалѣхъ, красно воспойте ему пѣснь нову, возносите и призывайте имя его: |
16:2 | яко Богъ сокрушаяй брани Господь, яко во ополченiихъ его посредѣ людій изъятъ мя изъ руки гонящихъ мя: |
16:3 | прiиде Ассуръ изъ горъ от сѣвера, прiиде во тмахъ силы своея, ихже множество загради источники, и конница ихъ покры холмы: |
16:4 | рече пожещи предѣлы моя, и юношы моя убити мечемъ, и ссущыя моя положити въ помостъ, и младенцы моя дати въ расхищенiе, и дѣвы моя плѣнити: |
16:5 | Господь Вседержитель опроверже ихъ рукою жены, |
16:6 | не бо паде сильный ихъ от юношъ, ниже сынове титановы поразиша его, ниже высоцы исполини нападоша на него, но Иудиѳъ дщи Мерарина добротою лица своего разслаби его: |
16:7 | совлечеся бо одѣянiя вдовства своего на возвышенiе бѣдствующихъ во Израили, помаза лице свое умащенiемъ |
16:8 | и увѣнча власы своя увясломъ и прiятъ одежду льняну въ прельщенiе его: |
16:9 | сандалiя ея похити око его, и доброта ея плѣни душу его, пройде мечь выю его: |
16:10 | устрашишася персы державы ея, и миды дерзновенiемъ ея разсѣдошася: |
16:11 | тогда воскликнуша смиреннiи мои и возопиша немощніи мои, и устрашишася: вознесоша гласъ свой, и побѣждени быша: |
16:12 | сынове отроковицъ бодоша ихъ и яко рабовъ бѣглецовъ уязвляху ихъ, погибоша от ополченiя Господа моего: |
16:13 | воспою Господеви моему пѣснь нову: Господи, велiй еси и славенъ, дивенъ въ крѣпости, непреборимый, |
16:14 См.: 🔗Пс. 103:30 🔗Пс. 148:5 | тебѣ да работаетъ всяка тварь твоя: яко реклъ еси, и быша: послалъ еси Духа твоего, и созда: и нѣсть, иже противостанетъ гласу твоему: |
16:15 | горы бо от основанiи съ водами подвигнутся, каменiе же от лица твоего яко воскъ растаетъ: надъ боящимися же тебе ты умилостивляешися, |
16:16 | яко мало всяка жертва въ воню благоуханiя, и малѣйшiй всякъ тукъ во всесожженiе тебѣ: бояйся же Господа великъ выну: |
16:17 | горе языкомъ востающымъ на родъ мой: Господь Вседержитель отмститъ имъ въ день судный, дати огнь и червiе на плоти ихъ, и восплачутся въ чувствѣ даже до вѣка. |
16:18 | Егда же внидоша во Иерусалимъ, поклонишася Богу: и егда очистишася людiе, принесоша всесожегаемая своя и произвольная своя и дары своя. |
16:19 | И возложи Иудиѳъ вся сосуды Олоферновы, елики дадоша людiе ей, и завѣсу, юже взя она от ложницы его, въ даръ Господу даде. |
16:20 | И бяху людiе веселящеся во Иерусалимѣ предъ лицемъ святыхъ месяцы три, и Иудиѳъ съ ними пребысть. |
16:21 | По днехъ же сихъ возвратися кійждо во наслѣдiе свое: и Иудиѳъ отъиде во ветилую, и пребываше надъ стяжанiемъ своимъ, и бысть во время свое славна во всей земли. |
16:22 | И мнози желаша ея, и не позна мужъ ея вся дни живота ея, от негоже дне умре Манассіа мужъ ея и приложися къ людемъ своимъ. |
16:23 | И произыде велика зѣло, и состарѣся въ дому мужа своего лѣтъ ста пяти, и отпусти рабыню свою свободну, и умре во ветилуи, и погребоша ю въ пещерѣ мужа ея Манассіи. |
16:24 | И плакася ея домъ Израилевъ дній седмь. И раздѣли имѣнiя своя прежде смерти своея всѣмъ ближнимъ Манассіи мужа своего и ближнимъ рода своего. |
16:25 | И не бяше ктому устрашаяй сыновъ Израилевыхъ во дни Иудиѳы и по смерти ея дни многи. |