Вторая книга Маккавейская, глава 15 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 15
15:1	Никаноръ же увѣдавъ, яко Иуда въ мѣстѣхъ самарійскихъ, умысли со всѣмъ устремленiемъ въ день субботный на нихъ напасти.
15:2	По нужди же послѣду­ю­щiи ему Иудее глаголаху: никакоже сице звѣрски и варварски да погубляеши, но славу воз­даждь предпочтен­ному от­ всевидящаго со святынею дневи.
15:3	Нечестивый же вопроси: еда есть сильный на небеси, иже повелѣ праздновати день субботный?
15:4	Онѣмъ же от­вѣщав­шымъ: есть Господь живый сей на небеси силенъ, иже повелѣ праздновати седмый день.
15:5	Онъ же рече: и азъ силенъ есмь на земли, повелѣваяй взимати оружiя и царскiя потребы исполняти. Обаче не одержа и совершити окаян­наго сво­его совѣта.
15:6	И никаноръ убо великою гордынею воз­движенъ умысли общую побѣду составити на Иуду.
15:7	Маккавей же всегда надѣяшеся со всѣмъ упованiемъ заступленiе от­ Господа получити
15:8	и утѣша­ше сво­ихъ, да не убоят­ся при­­ше­ст­вiя языковъ, да имѣютъ же во умѣ преждебыв­шую имъ от­ небесе помощь, и нынѣ да чаютъ от­ Вседержителя быти себѣ побѣдѣ и помощи:
15:9	и наказавъ ихъ от­ закона и пророковъ, воспомянувъ же имъ преждебыв­шыя подвиги, усерднѣйшихъ ихъ сотвори:
15:10	и душами воз­двигнувъ ихъ, увѣщава­ше, вкупѣ показавъ имъ языческая льщенiя и клятвопреступленiе:
15:11	и ко­егождо ихъ вооруживъ не тако щитовъ и копiй утвержденiемъ, яко словесъ благихъ утѣшенiемъ, и сказавъ сонъ достовѣренъ, утробы всѣхъ воз­весели.
15:12	Бысть же его сицево видѣнiе: онію быв­шаго архiереа, мужа добраго и благаго, благоговѣйна видѣнiемъ, кротка же нравомъ и бесѣдою благолѣпна, и от­ дѣт­ст­ва обучив­шагося всѣмъ добродѣтелемъ, сего руцѣ воз­дѣюща и молящася за вся люди иудейскiя [видѣ].
15:13	И яко посемъ явися инъ мужъ сѣдинами и славою дивенъ, чудно же нѣкое и великолѣпнѣйшее окрестъ его преизяще­с­т­во.
15:14	Отвѣщавъ же оніа рече: сей есть братолюбецъ, иже много молит­ся о людехъ и о святѣмъ градѣ, иереміа Божiй пророкъ.
15:15	Простеръ же иереміа десницу, даяше Иудѣ мечь златъ, дающь же воз­гласи сiя:
15:16	прiими святый мечь даръ от­ Бога, имже сокрушиши супостаты.
15:17	Укрѣпив­шежеся Иудиными словесы преблагими и могущими къ муже­ст­ву устремити и душы юношъ исправити, умыслиша не ополчатися, но храбро напасти и со всякою доблестiю сшедшымся сразитися за вещы святыя, понеже и градъ и святая и святилище бѣд­ст­вуютъ.
15:18	Бѣ бо о женахъ и чадѣхъ еще же и о братiи и ужикахъ меньшiй имъ подвигъ, величайшiй же и первый страхъ о освящен­нѣмъ храмѣ.
15:19	Такожде и во градѣ оставлен­нымъ не малая печаль, мятущымся о сраженiи на поли хотящемъ быти.
15:20	И всѣмъ уже чающымъ имущаго быти сраженiя и супостатомъ уже смѣсив­шымся, и воин­ству чин­но расположен­ну сущу и звѣремъ въ при­­личнѣй странѣ поставленымъ и кон­ницѣ по угламъ учинен­нѣй,
15:21	разсуждая маккавей множе­ст­ва при­­ше­ст­вiе и оружiя различное уготовленiе и свирѣп­ст­во звѣрей, простеръ руцѣ на небо, при­­зыва­ше чудотворящаго и при­­зирающаго Господа, вѣдая, яко не оружiемъ побѣда, но якоже угодно ему, достойнымъ даетъ одолѣнiе.
15:22 См.: 🔗2Мак. 8:19	Рече же при­­зывая симъ образомъ: ты, Владыко, послалъ еси ангела тво­его при­­ езекіи цари Иудинѣ и убилъ еси от­ воевъ сен­нахиримовыхъ сто осмьдесятъ пять тысящъ:
15:23	и нынѣ, Владыко сильный на небесѣхъ, посли ангела тво­его благаго предъ нами въ страхъ и трепетъ имъ:
15:24	величе­с­т­вомъ мышцы тво­ея да убоят­ся иже съ хуленiемъ при­­шедшiи на святыя люди твоя. И сей убо сице помолися.
15:25	Никаноръ же и иже съ нимъ съ трубами и пѣсньми при­­ближахуся.
15:26	Иуда же и сущiи съ нимъ въ при­­зыванiи и молитвахъ смѣсишася съ супостаты:
15:27	и руками убо борющеся, сердцами же къ Богу молящеся, постлаша не меньши тридесяти пяти тысящъ, явленiемъ Божiимъ зѣло воз­радовав­шеся.
15:28	Престав­ше же от­ битвы и съ радостiю воз­вращающеся, познаша никанора падша со всеоружiи [сво­ими].
15:29	Быв­шу же воплю и смятенiю, благословляху сильнаго отеческимъ гласомъ.
15:30	И повелѣ, иже весьма тѣломъ и душею первоподвижникъ за гражданъ, иже возраста благопрiят­ст­во къ сво­ему народу сохранивый Иуда, никанорову главу и руку со рамомъ от­сѣщи и при­­нести во Иерусалимъ.
15:31	Пришедъ же тамо и созвавъ единоязычныхъ сво­ихъ и священ­никовъ, предъ олтаремъ ставъ, при­­зва сущихъ от­ краеградiя
15:32	и показа имъ сквернаго никанора главу и руку хульникову, юже простре на храмъ святый Вседержителевъ воз­носяся:
15:33	и языкъ нечестиваго никанора от­рѣзавъ, рече, яко на раздробленiе птицамъ имать дати, и сiя въ воз­мездiе безумiя противу храма повѣси.
15:34	Вси же на небо благословиша Господа явленаго, рекуще: благословенъ сохранивый мѣсто свое не осквернено.
15:35	Повѣси же никанорову главу на краеградiи во извѣстное всѣмъ и явное Господни помощи знаменiе.
15:36	И узакониша вси общимъ совѣтомъ никакоже оставити безъ празднованiя день сей: 37имѣти же праздникъ сей въ третiй­на­де­сять день втораго­на­де­сять месяца, иже глаголет­ся сирійскимъ гласомъ Адаръ, предъ единымъ днемъ мардохеева дне.
15:37	38И сiя убо, яже о никанорѣ, имѣют­ся сице: и от­ тѣхъ временъ одержанъ бысть градъ от­ Еврей, и азъ здѣ оставляю слово.
15:38	39И аще убо благо и при­­лично сочиненiю, сего и самъ хотѣхъ: аще же малоцѣн­но и мѣрно, сiе по воз­можности мо­ей бѣ.
15:39	40Якоже бо вино особно пити, такожде и воду паки, сопротивно есть: но имже образомъ вино съ водою смѣшен­ное сладко и веселую благодать совершаетъ, такожде и сочиненiе [и украшенiе] слова веселитъ слухи чтущихъ исторiю. Здѣ же да будетъ и конецъ. Конецъ книзѣ вторѣй маккавейстѣй: имать въ себѣ главъ 15.