Третья книга Ездры, глава 12 неканонич.

	Язык: Церковнослав. (дореф.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 12
12:1	И бысть, егда глаголаше левъ словеса сiя ко орлу, и видѣхъ:
12:2	и се, яже оста глава, и не явишася четыри крила оная, яже къ нему преидоша и воз­двигошася да цар­ст­вуютъ, и бяше цар­ст­во ихъ скудно и молвы полно.
12:3	И видѣхъ, и се, та не являхуся, и все тѣло орлее воз­жига­шеся, и устрашися земля зѣло, и азъ от­ молвы и ужаса ума и от­ велика страха воспрянухъ и рѣхъ духу мо­ему:
12:4	се, ты подалъ еси мнѣ то въ томъ, яко испытуеши пути вышняго:
12:5	се, еще утружденъ есмь душею и духомъ мо­имъ изнемогохъ зѣло, и ниже малая есть во мнѣ сила от­ множе­ст­ва боязни, еюже устрашихся нощи сея:
12:6	нынѣ убо помолюся вышнему, да мя укрѣпитъ даже до конца.
12:7	И рекохъ: Владыко Господи, аще обрѣтохъ благодать предъ очима тво­има, и аще оправданъ есмь предъ тобою паче многихъ, и аще истин­но взыде моленiе мое предъ лицемъ тво­имъ,
12:8	укрѣпи мя и яви мнѣ рабу тво­ему толкованiе и раздѣленiе видѣнiя грознаго сего, да совершен­нѣе утѣшиши душу мою:
12:9	достойна бо мене имѣлъ еси показати мнѣ времена послѣдняя. И рече ко мнѣ:
12:10	сiе есть толкованiе видѣнiя сего:
12:11	орла егоже видѣлъ еси восходяща от­ моря, то есть цар­ст­во, еже видѣно бысть въ видѣнiи данiила брата тво­его,
12:12	но нѣсть ему протолковано, яже азъ нынѣ тебѣ протолкую.
12:13	Се, дніе грядутъ, и востанетъ цар­ст­во на земли, и будетъ боязнь вящшая всѣмъ цар­ст­вомъ, яже быша прежде его:
12:14	цар­ст­вовати же будутъ на ней царiе два­на­де­сять, единъ по единому,
12:15	ибо вторый начнетъ цар­ст­вовати, и той одержитъ вящшее время паче два­на­де­ся­ти:
12:16	сiе есть толкованiе два­на­де­ся­ти крилъ, яже видѣлъ еси.
12:17	И егоже слышалъ еси гласъ, иже глаголаше, не от­ главъ его исходящь, но от­ средины тѣла его,
12:18	сiе есть толкованiе: яко послѣ времене цар­ст­ва того родят­ся рвенiя не мала, и бѣд­ст­вовати имать, яко да падетъ, и не падетъ тогда, но паки воз­ставит­ся въ свое начало:
12:19	а яже видѣлъ еси подкрилецъ осмь при­­лѣпляющихся криламъ его,
12:20	сiе есть толкованiе: востанутъ въ томъ осмь царей, ихже будутъ времена легка и лѣта скорая, и два убо от­ нихъ погибнутъ:
12:21	при­­ближающуся же времени среднему, четыри сохранят­ся во время, егда начнетъ при­­ближатися время его да скончает­ся, двое же на конецъ сохранят­ся.
12:22	А яко видѣлъ еси три главы покоящыяся,
12:23	сiе есть толкованiе: въ послѣдняя его воз­двигнетъ вышнiй три цар­ст­ва и при­­зоветъ въ ня многихъ, и пообладаютъ землею:
12:24	и иже обитаютъ на ней, съ трудомъ многимъ на всѣхъ, иже быша прежде сихъ, сего ради тіи названи суть главы орли:
12:25	сіи бо будутъ, иже воз­оглавятъ нечестiя его и иже совершатъ послѣдняя его.
12:26	А яко видѣлъ еси главу болшую неявляющуюся, сiе есть толкованiе ея: яко единъ от­ нихъ на одрѣ сво­емъ умретъ, но обаче съ мученiемъ,
12:27	ибо два, иже пребудутъ, мечь ихъ поястъ:
12:28	единаго бо мечь поястъ сущихъ съ нимъ, но обаче и сей мечемъ на послѣдокъ падетъ.
12:29	А яже видѣлъ еси два подкрилiя восходящая на главу, яже есть о десную страну,
12:30	сiе есть толкованiе: сіи суть, ихже соблюде вышнiй въ конецъ свой, то есть цар­ст­во скудное и скорбей полно.
12:31	Якоже видѣлъ еси и льва, егоже видѣлъ еси от­ лѣса воз­будив­шася, рыкающа и глаголюща ко орлу, и обличающа его и неправды его всѣми словесы его, якоже слышалъ еси:
12:32	сей есть вѣтръ, егоже сохранилъ вышнiй на конецъ на нихъ и на нечестiя ихъ, и обличитъ тѣхъ и объявитъ предъ тѣми прелести ихъ,
12:33	поставитъ бо ихъ на судѣ живыхъ: и будетъ, егда обличитъ ихъ, тогда накажетъ ихъ:
12:34	ибо останокъ людій мо­ихъ избавитъ съ бѣдностiю, иже сохранени суть на концахъ мо­ихъ, и ублажитъ ихъ, дондеже прiидетъ конецъ день суда, о немже глаголахъ тебѣ от­ начала.
12:35	Сей сонъ, егоже видѣлъ еси, и сiя суть толкованiя.
12:36	Ты убо единъ достоинъ былъ еси знати тайну сiю вышняго:
12:37	напиши убо вся сiя въ книгу, яже видѣлъ еси, и положи я въ мѣстѣ сохран­нѣ,
12:38	и научиши симъ мудрыя от­ людій тво­ихъ, ихже сердца вѣси, яко могутъ прiяти и хранити тайны сiя:
12:39	ты же еще потерпи здѣ иныхъ дній седмь, да тебѣ показано будетъ все, еже изволит­ся вышнему показати тебѣ. И отъиде от­ мене.
12:40	И бысть, егда услыша весь народъ, яко про­идоша седмь дній, и азъ не воз­вратихся во градъ, и собрашася вси от­ меншаго даже до болшаго, и прiидоша ко мнѣ и рекоша ми, глаголюще:
12:41	что согрѣшили есмы тебѣ и что неправо содѣяхомъ на тя, яко оставляяй насъ сѣлъ еси на мѣстѣ томъ?
12:42	ты бо намъ остал­ся еси единъ от­ всѣхъ людій, якоже гроздъ от­ винограда и яко свѣтилникъ въ мѣстѣ мрачнѣ и яко при­­станище и корабль спасеный от­ бури:
12:43	или недоволна намъ суть злая, яже при­­ключают­ся?
12:44	аще убо ты насъ оставиши, коль лучше бы намъ было, аще быхомъ сожжени были и мы съ сожженiемъ Сiона?
12:45	ниже бо мы есмы лучши тѣхъ, иже тамо умроша. И плакаша гласомъ великимъ. И овѣщахъ къ нимъ и рекохъ:
12:46	уповай, Израилю, и не скорби ты, доме Иаковль:
12:47	есть бо память о васъ предъ вышнимъ, и крѣпкiй не забы васъ въ напасти:
12:48	азъ бо не оставихъ васъ, ни от­идохъ от­ васъ, но прiидохъ на сiе мѣсто, да помолюся о разоренiи Сiона, да взыщу милосердiе за смиренiе святыни ва­шея:
12:49	и нынѣ идите единъ кійждо въ домъ свой, и азъ прiиду къ вамъ по днехъ сихъ.
12:50	И отъиде народъ, якоже рекохъ ему, во градъ:
12:51	азъ же сѣдохъ на поли седмь дній, якоже ми повелѣ, и ядохъ токмо от­ цвѣтовъ селныхъ, и от­ травъ сотворена бысть мнѣ пища во днехъ тѣхъ.