Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 4 | |
4:1 | И рече Господь къ Моисею, глаголя: |
4:2 См.: 🔗Лев. 5:15 | рцы къ сыномъ Израилевымъ, глаголя: душа аще согрѣшитъ предъ Господемъ не хотящи от всѣхъ повелѣнiй Господнихъ, ихже не лѣть есть творити, и сотворитъ едино что от нихъ: |
4:3 | аще убо архiерей помазанный согрѣшитъ, во еже людемъ согрѣшити, и да приведетъ о грѣсѣ своемъ, имже согрѣшилъ, телца от говядъ непорочна Господеви о грѣсѣ: |
4:4 | и да приведетъ телца къ дверемъ скинiи свидѣнiя предъ Господа, и да возложитъ руку свою на главу телца предъ Господемъ, и да заколетъ телца предъ Господемъ: |
4:5 См.: 🔗Лев. 6:30 | и вземъ жрецъ помазанный совершенъ руками от крове телца, и да внесетъ ю въ скинiю свидѣнiя, |
4:6 См.: 🔗Лев. 8:11 🔗Лев. 14:7 | и да омочитъ жрецъ перстъ въ крови, и да покропитъ от крове седмижды перстомъ предъ Господемъ, у завѣсы святыни: |
4:7 | и да возложитъ жрецъ от крове телчи на роги олтаря ѳимiама сложенiя иже предъ Господемъ, иже есть въ скинiи свидѣнiя, и всю кровь телчу да излiетъ у стояла олтаря всесожженiй, иже есть у дверiй скинiи свидѣнiя, |
4:8 См.: 🔗Лев. 2:9 | и весь тукъ телца, иже о грѣсѣ, да отъиметъ от него, тукъ покрывающiй утробу, и весь тукъ иже на утробѣ, |
4:9 См.: 🔗Исх. 29:13 🔗Лев. 3:4 | и обѣ почки, и тукъ иже на нихъ, иже есть на стегнахъ, и препонку, яже на печени, съ почками отъиметъ е, |
4:10 См.: 🔗Лев. 3:5 | якоже отъемлется оное от телца жертвы спасенiя, и да вознесетъ жрецъ на олтарь приношенiя: |
4:11 См.: 🔗Лев. 8:17 🔗Чис. 19:5 | и кожу телчу, и всю его плоть со главою, и съ крайними частми, и со утробою, и съ мотылы: |
4:12 См.: 🔗Лев. 6:11 🔗Евр. 13:11 | и да изнесутъ всего телца внѣ полка на мѣсто чисто, идѣже изсыпаютъ пепелъ, и да сожгутъ его на дровахъ огнемъ: на мѣстѣ изсыпанiя пепела да сожженъ будетъ. |
4:13 См.: 🔗Лев. 9:7 🔗Чис. 15:24 | Аще же весь сонмъ сыновъ Израилевыхъ согрѣшитъ не хотящь, и утаится глаголъ от лица сонма, и сотворятъ едину от всѣхъ заповѣдiй Господнихъ, еяже не лѣть есть творити, и согрѣшатъ, |
4:14 | и увѣстся имъ грѣхъ, имже согрѣшиша въ немъ: и да приведетъ сонмъ телца от воловъ непорочна о грѣсѣ, и приведетъ и предъ двери скинiи свидѣнiя: |
4:15 | и да возложатъ старцы сонма руки своя на главу телца предъ Господемъ, и да заколютъ телца предъ Господемъ, |
4:16 | и да внесетъ жрецъ помазанный от крове телчи въ скинiю свидѣнiя, |
4:17 См.: 🔗Лев. 8:11 🔗Лев. 14:7 | и да омочитъ жрецъ перстъ свой въ крови телчи, и да покропитъ седмижды предъ Господемъ, предъ завѣсою святыни: |
4:18 См.: 🔗Исх. 40:6 | и от крове да возложитъ жрецъ на роги олтаря ѳимiамовъ сложенiя, иже есть предъ Господемъ, иже есть въ скинiи свидѣнiя: и всю кровь да излiетъ у стояла олтаря приношенiй, иже есть у дверiй скинiи свидѣнiя, |
4:19 | и весь тукъ его да возметъ от него, и вознесетъ на олтарь: |
4:20 См.: 🔗Рим. 3:25 🔗Евр. 10:4 | и сотворитъ телцу сему, якоже сотвори телцу, иже о грѣсѣ, тако сотворится: и да помолится о нихъ жрецъ, и оставится имъ грѣхъ: |
4:21 | и да изнесутъ телца всего внѣ полка, и да сожгутъ телца, якоже сожгоша телца перваго: грѣхъ [бо] сонма есть. |
4:22 | Аще же князь согрѣшитъ, и сотворитъ едину от всѣхъ заповѣдiй Господа Бога своего, не хотя, иже не лѣть есть творити, и согрѣшитъ, и преступитъ, |
4:23 | и увѣстся ему грѣхъ, имже согрѣши въ немъ: да принесетъ даръ свой козла от козъ мужескъ полъ непороченъ грѣха ради, |
4:24 | и возложитъ руку свою на главу козла: и да заколютъ его на мѣстѣ, идѣже закалаютъ всесожженiя предъ Господемъ: о грѣсѣ [бо] есть: |
4:25 | и да возложитъ жрецъ от крове, яже о грѣсѣ, перстомъ на роги олтаря всесожженiй, и всю кровь его да излiетъ у стояла олтаря всесожженiй, |
4:26 См.: 🔗Лев. 3:3 🔗Лев. 5:13 | и весь тукъ его вознесетъ на олтарь, якоже тукъ жертвы спасенiя: и да помолится о немъ жрецъ грѣха ради его, и оставится ему. |
4:27 См.: 🔗Исх. 12:44 | Аще же душа едина согрѣшитъ не хотящи от людій земли, внегда сотворити едину от всѣхъ заповѣдiй Господнихъ, еже не лѣть есть творити, и согрѣшитъ, |
4:28 | и увѣстся ему грѣхъ, имже согрѣши въ немъ, и да принесетъ даръ свой козу от козъ женскъ полъ непорочну, да принесетъ грѣха ради, имже согрѣши: |
4:29 См.: 🔗Лев. 1:3 | и да возложитъ руку свою на главу грѣха своего: и заколютъ козу, яже грѣха ради, на мѣстѣ, идѣже закалаютъ всесожженiя: |
4:30 | и да возметъ жрецъ от крове ея перстомъ, и да возложитъ на роги олтаря всесожженiй, и всю кровь ея излiетъ у стояла олтаря: |
4:31 См.: 🔗Лев. 3:14 🔗Исх. 29:18 | и весь тукъ да отъиметъ, якоже отъемлется тукъ от жертвы спасенiя, и да вознесетъ жрецъ на олтарь въ воню благовонiя Господу: и да помолится жрецъ о немъ, и оставится ему. |
4:32 | Аще же овцу принесетъ даръ свой грѣха ради, женскъ полъ непороченъ да принесетъ ю: |
4:33 | и да возложитъ руку свою на главу яже о грѣсѣ, и да заколютъ ю грѣха ради на мѣстѣ, на немже закалаютъ всесожженiя [на мѣстѣ святѣ]: |
4:34 | и вземъ жрецъ от крове, яже о грѣсѣ, перстомъ своимъ, да возложитъ на роги олтаря всесожженiя: и всю кровь ея да излiетъ у стояла олтаря всесожженiя, |
4:35 См.: 🔗Лев. 5:13 🔗Лев. 16:18 | и весь тукъ ея да отъиметъ, якоже отъемлется тукъ овцы от жертвы спасенiя: и да возложитъ его жрецъ на олтарь на всесожженiе Господне: и да помолится за него жрецъ о грѣсѣ, имже согрѣши, и оставится ему. |