Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 56 | |
56:1 См.: 🔗Прем. 1:1 | Сiя глаголетъ Господь: сохраните судъ и сотворите правду, приближися бо спасенiе мое прiити и милость моя открытися. |
56:2 | Блаженъ мужъ творяй сiя, и человѣкъ держайся ихъ, и храняй субботы не оскверняти, и блюдый руцѣ свои не творити неправды. |
56:3 См.: 🔗Втор. 23:3 🔗Еф. 2:19 | Да не глаголетъ иноплеменникъ приложивыйся ко Господеви: еда отлучитъ мя Господь от людій своихъ? и да не глаголетъ каженикъ, яко азъ есмь древо сухо. |
56:4 См.: 🔗Ис. 58:13 | Сiя глаголетъ Господь каженикомъ: елицы сохранятъ субботы моя и изберутъ, яже азъ хощу, и содержатъ завѣтъ мой, |
56:5 | дамъ имъ въ дому моемъ и во оградѣ моей мѣсто именито, лучшее от сыновъ и дщерей, имя вѣчно дамъ имъ, и не оскудѣетъ: |
56:6 | и иноплеменникомъ приложившымся Господеви работати ему и любити имя Господне, еже быти ему въ рабы и рабыни, и вся снабдящыя субботы моя не оскверняти и держащыя завѣтъ мой, |
56:7 | введу я въ гору святую мою и возвеселю я въ дому молитвы моея: всесожженiя ихъ и жертвы ихъ будутъ прiятны на требницѣ моемъ: домъ бо мой домъ молитвы наречется всѣмъ языкомъ, |
56:8 См.: 🔗Ин. 10:16 🔗Еф. 2:13 | глаголетъ Господь, собираяй разсѣяныя Израилевы, яко соберу къ нему соборъ. |
56:9 См.: 🔗Иер. 7:33 | Вси звѣрiе дивiи, прiидите, ядите, вси звѣрiе дубравнiи. |
56:10 | Видите, яко вси ослѣпоша, не разумѣша смыслити, вси пси нѣміи не возмогутъ лаяти, видяще сны на ложи, любяще дремати, |
56:11 См.: 🔗Иер. 6:13 🔗Иер. 8:10 | и пси безстуднiи душею, не вѣдяще сытости: и суть лукави, не вѣдяще смысла, вси путемъ своимъ послѣдоваша, кійждо уклонишася въ лихоимство свое, от перваго и до послѣдняго. |
56:12 | Прiидите, да возмемъ вино и наполнимся пiянства, и будетъ яко днесь, тако и заутра, и много множае. |