Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 14 | |
14:1 См.: 🔗Прит. 12:4 🔗Прит. 24:3 | Мудрыя жены создаша домы: безумная же раскопа рукама своима. |
14:2 См.: 🔗Иов. 12:24 | Ходяй право боится Господа: развращаяй же пути своя обезчестится. |
14:3 См.: 🔗Иак. 3:5 🔗Прит. 12:6 | Изъ устъ безумныхъ жезлъ досажденiя: устнѣ же мудрыхъ хранятъ я. |
14:4 | Идѣже нѣсть воловъ, ясли чисты: а идѣже жита многа, явна волу крѣпость. |
14:5 См.: 🔗Исх. 23:1 🔗Прит. 12:17 | Свидѣтель вѣренъ не лжетъ: разжизаетъ же ложная свидѣтель неправеденъ. |
14:6 См.: 🔗Сир. 1:30 | Взыщеши премудрости у злыхъ, и не обрящеши: чувство же у мудрыхъ удобно. |
14:7 | Вся противна [суть] мужеви безумну: оружiе же чувствiя устнѣ премудры. |
14:8 См.: 🔗Пс. 138:24 | Премудрость коварныхъ уразумѣетъ пути ихъ: буйство же безумныхъ въ заблужденiи. |
14:9 | Домове беззаконныхъ требуютъ очищенiя, домове же праведныхъ прiятни. |
14:10 | Сердце мужа чувственно печаль души его: егда же веселится, не примѣшается досажденiю. |
14:11 См.: 🔗Прит. 12:7 | Домове нечестивыхъ исчезнутъ, селенiя же право творящихъ пребудутъ. |
14:12 См.: 🔗Прит. 16:25 | Есть путь, иже мнится человѣкомъ правъ быти, послѣдняя же его приходятъ во дно ада. |
14:13 | Ко веселиемъ не примѣшавается печаль: послѣдняя же радости въ плачь приходятъ. |
14:14 См.: 🔗Ис. 3:10 | Путій своихъ насытится дерзосердый, от размышленiй же своихъ мужъ благъ. |
14:15 См.: 🔗Рим. 16:18 🔗1Ин. 4:1 | Незлобивый вѣру емлетъ всякому словеси, коварный же приходитъ въ раскаянiе. |
14:16 См.: 🔗Пс. 110:10 | Премудръ убоявся уклонится от зла, безумный же на себе надѣявся смѣшавается со беззаконнымъ. |
14:17 См.: 🔗Прит. 12:16 | Острояростный безъ совѣта творитъ, мужъ же мудрый многая терпитъ. |
14:18 См.: 🔗Еф. 5:15 | Раздѣляютъ безумнiи злобу, коварнiи же удержатъ чувство. |
14:19 См.: 🔗Ис. 60:14 | Поползнутся зліи предъ благими, и нечестивiи послужатъ предъ дверьми праведныхъ. |
14:20 См.: 🔗Прит. 19:7 | Друзiе возненавидятъ друговъ убогихъ: друзiе же богатыхъ мнози. |
14:21 | Безчестяй убогiя согрѣшаетъ, милуяй же нищыя блаженъ. |
14:22 | Заблуждающiи [неправедницы] дѣлаютъ злая, милость же и истину дѣлаютъ благіи. Не вѣдятъ милости и вѣры дѣлателiе злыхъ: милостыни же и вѣры у дѣлателей благихъ. |
14:23 См.: 🔗Прит. 12:11 | Во всяцѣмъ пекущемся есть изобилiе: любосластный же и безпечальный въ скудости будетъ. |
14:24 См.: 🔗Прит. 10:16 🔗Прит. 27:22 | Вѣнецъ премудрыхъ богатство ихъ, житiе же безумныхъ зло. |
14:25 См.: 🔗Прит. 12:17 | Избавитъ от злыхъ душу свидѣтель вѣренъ, разжизаетъ же лживая лестный. |
14:26 См.: 🔗Прит. 18:11 | Во страсѣ Господни упованiе крѣпости, чадомъ же своимъ оставитъ утвержденiе [мира]. |
14:27 См.: 🔗Прит. 10:17 🔗2Цар. 22:6 | Страхъ Господень источникъ жизни, творитъ же укланятися от сѣти смертныя. |
14:28 | Во мнозѣ языцѣ слава царю: во оскудѣнiи же людстѣ сокрушенiе сильному. |
14:29 См.: 🔗Прит. 19:11 | Долготерпѣливъ мужъ многъ въ разумѣ, малодушный же крѣпко безуменъ. |
14:30 | Кроткiй мужъ сердцу врачь: моль же костемъ сердце чувственно. |
14:31 См.: 🔗Прит. 17:5 🔗Мф. 25:36 | Оклеветаяй убогаго раздражаетъ сотворшаго и, почитаяй же его милуетъ нищаго. |
14:32 | Во злобѣ своей отринется нечестивый: надѣяйжеся на Господа своимъ преподобiемъ праведенъ. |
14:33 | Въ сердцы блазѣ мужа почіетъ премудрость, въ сердцы же безумныхъ не познавается. |
14:34 См.: 🔗Прит. 11:11 🔗Прем. 5:24 | Правда возвышаетъ языкъ: умаляютъ же племена грѣси. |
14:35 См.: 🔗Лк. 7:2 🔗Рим. 13:3 | Прiятенъ цареви слуга разумный, своимъ же благообращенiемъ отъемлетъ безчестiе. |