Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 13 | |
13:1 | И рече Господь къ Моисею глаголя: |
13:2 | освяти Ми всякаго первенца перворожденнаго, разверзающаго всякая ложесна въ сынѣхъ Израилевыхъ от человѣка до скота, яко Мнѣ есть. |
13:3 См.: 🔗Исх. 23:15 | Рече же Моисей къ людемъ: помните день сей, въ оньже изыдосте от земли Египетскiя, изъ дому работы: рукою бо крѣпкою изведе васъ Господь отсюду: и не ядите квасна, |
13:4 | понеже въ днешнiй день исходите въ месяцѣ плодовъ новыхъ: |
13:5 См.: 🔗Быт. 15:7 🔗Быт. 17:8 | и будетъ, егда введетъ тя Господь Богъ твой въ землю Хананейску и Хеттейску, и Аморрейску и Евейску, и Иевусейску и Гергесейску и Ферезейску, еюже клятся ко отцемъ твоимъ, дати тебѣ землю точащую млеко и медъ, и сотвориши службу сiю сего месяца: |
13:6 | шесть дній ядите опрѣсноки, въ седмый же день праздникъ Господу, |
13:7 См.: 🔗1Кор. 5:8 | опрѣсноки ядите седмь дній: да не явится тебѣ квасное, ниже будетъ тебѣ квасъ во всѣхъ предѣлѣхъ твоихъ, |
13:8 См.: 🔗Исх. 12:26 | и возвѣстиши сыну твоему въ день онъ, глаголя: сего ради сотворилъ Господь Богъ мнѣ, егда исхождахъ изъ Египта: |
13:9 См.: 🔗Втор. 6:8 🔗Втор. 11:18 | и будетъ тебѣ знаменiе на руцѣ твоей, и воспоминанiе предъ очима твоима, яко да будетъ законъ Господень во устѣхъ твоихъ, рукою бо крѣпкою изведе тя Господь Богъ изъ Египта: |
13:10 См.: 🔗Исх. 12:14 | и сохраните законъ сей по временомъ уставленымъ, от дній до дній, |
13:11 См.: 🔗Быт. 15:18 | и будетъ егда введетъ тя Господь Богъ твой въ землю Хананейску, якоже кляся отцемъ твоимъ, и дастъ ю тебѣ: |
13:12 См.: 🔗Исх. 13:2 | и отлучиши всякое разверзающее ложесна, мужескъ полъ Господу: всякое разверзающее ложесна от стадъ или от скотъ твоихъ, елика будутъ тебѣ, мужескъ полъ освятиши Господу: |
13:13 См.: 🔗Исх. 34:20 🔗Чис. 3:46 | всякое разверзающее утробу ослю премѣниши овцею: аще же не премѣниши, искупиши е: и всякаго первенца человѣча сыновъ твоихъ да искупиши: |
13:14 См.: 🔗Исх. 12:26 | аще же вопроситъ тя сынъ твой по сихъ, глаголя: что сiе? И речеши ему: яко рукою крѣпкою изведе насъ Господь изъ земли Египетскiя, изъ дому работы, |
13:15 См.: 🔗Исх. 4:23 🔗Исх. 12:29 | егда бо ожесточися фараонъ отпустити насъ, изби Господь всякаго первенца въ земли Египетстѣй, от первенца человѣча до первенца скотiя: сего ради азъ въ жертву приношу всякое разверзающее ложесна, мужескъ полъ Господу, и всякаго первенца сыновъ моихъ искуплю, |
13:16 См.: 🔗Втор. 6:8 | и будетъ въ знаменiе на руцѣ твоей, и непоколебимо предъ очесы твоими: рукою бо крѣпкою изведе тя Господь изъ Египта. |
13:17 См.: 🔗1Кор. 10:13 | Егда же отпусти фараонъ люди, не поведе ихъ Богъ путемъ земли Филистимскiя, яко близъ бяше, ибо рече Богъ: да не когда раскаются людiе, видѣвше рать, и возвратятся во Египетъ. |
13:18 См.: 🔗Пс. 77:52 | И обведе Богъ люди путемъ, иже въ пустыню къ Чермному морю. Пятаго же рода изыдоша сынове Израилевы от земли Египетскiя. |
13:19 См.: 🔗Быт. 50:25 🔗Нав. 24:32 | И взя Моисей кости Иосифовы съ собою: клятвою бо закля Иосифъ сыны Израилевы, глаголя: присѣщенiемъ присѣтитъ васъ Господь, и изнесете отсюду кости моя съ собою. |
13:20 См.: 🔗Чис. 33:6 | Воздвигшеся же сынове Израилевы от Сокхоѳа, ополчишася во Оѳомѣ при пустыни. |
13:21 | Богъ же вождаше ихъ, въ день убо столпомъ облачнымъ, показати имъ путь, нощiю же столпомъ огненнымъ, свѣтити имъ: |
13:22 | и не оскудѣ столпъ облачный во дни и столпъ огненный нощiю предъ всѣми людьми. |