Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 9 | |
9:1 | И слыша димитрiй, яко паде никаноръ и силы его во брани, и приложи вакхида и алкима паки послати во Иудею, и десный рогъ съ ними. |
9:2 | И идоша путемъ, иже [ведетъ] въ Галгалы, и ополчишася на месалоѳъ, иже есть во Арвилѣхъ, и взяша его, и побиша душъ человѣческихъ много. |
9:3 | И въ месяцъ первый лѣта сто пятьдесятъ втораго, приступиша воини ко Иерусалиму, |
9:4 | и восташа и идоша въ верею въ двадесяти тысящахъ мужей и двѣ тысящы конниковъ. |
9:5 | Иуда же бѣ ополченъ во Елаасѣ, и три тысящы мужей избранныхъ съ нимъ. |
9:6 | И видѣша множество силъ, яко многи суть, и устрашишася зѣло: и избѣгоша мнози от полка, и не остася от нихъ токмо осмь сотъ мужей. |
9:7 | И видѣ Иуда, яко расточися полкъ его, и брань оскорбляше его: и сокрушися сердцемъ, яко не имѣяше времене собрати ихъ, |
9:8 | и ослабѣ и рече оставшымъ: востанемъ и взыдемъ на супостаты нашя, аще можемъ ратовати противу ихъ. |
9:9 | И отвращаху его рекуще: не можемъ, но спасемъ токмо душы своя нынѣ, и возвратимся со братiею нашею, и ополчимся на нихъ: мы же мали. |
9:10 | И рече Иуда: не буди ми сотворити вещь сiю, еже бѣжати от нихъ: и аще приближися время наше, умремъ мужественно ради братiи нашея и не оставимъ вины славѣ нашей. |
9:11 | И воздвижеся сила от полка и ста во срѣтенiе имъ, и разлучишася конницы на двѣ части, и пращницы и стрѣлцы предъидяху силѣ, и предподвижницы вси сильнiи. |
9:12 | Вакхидъ же бѣ на деснѣмъ розѣ, и приближися полкъ от двою страну, и возглашаху трубами. |
9:13 | И вострубиша, иже бяху от страны Иудины, и тіи трубами: и поколебася земля от гласа ополченiй. и бысть брань сражена от утра даже до вечера. |
9:14 | И видѣ Иуда, яко вакхидъ и крѣпость полка въ десныхъ: и собрашася къ нему вси крѣпцыи сердцемъ: |
9:15 | и сотреся десный рогъ от нихъ, и гнаше вслѣдъ ихъ даже до горы азота. |
9:16 | И сущiи въ лѣвѣмъ розѣ видѣша, яко сотреся десный рогъ, и обратишася по стопамъ Иудинымъ и сущихъ съ нимъ созади. |
9:17 | И отягчися брань, и падоша язвени мнози от сихъ и от тѣхъ: |
9:18 | и Иуда паде, прочiи же бѣжаша. |
9:19 | И взяста Ионаѳанъ и Симонъ Иуду брата своего и погребоста его во гробѣ отецъ его въ модинѣ. |
9:20 | И плакашася о немъ и рыдаше его весь Израиль плачемъ велiимъ, и сѣтоваху дни многи и рекоша: |
9:21 См.: 🔗2Цар. 1:19 | како паде сильный спасаяй Израиля? |
9:22 | Прочая же словесъ и браней Иудиныхъ и благихъ мужествъ, ихже сотвори, и величества его, не суть писана: многа бо бяху зѣло. |
9:23 | И бысть по преставленiи Иудинѣ, проникоша беззаконнiи во всѣхъ предѣлѣхъ Израилевыхъ, и прозябоша вси дѣлающiи беззаконiе. |
9:24 | Во дни оны бысть гладъ великъ зѣло, и отступи страна съ ними. |
9:25 | И избра вакхидъ нечестивыхъ мужей и постави ихъ господiями страны. |
9:26 | И искаху и испытаху друговъ Иудиныхъ и привождаху тѣхъ къ вакхиду: и мстяше имъ и посмѣвашеся имъ. |
9:27 | И бысть скорбь велика во Израили, яже не бысть от дній, въ нихже не явися пророкъ во Израили. |
9:28 | И собрашася вси друзи Иудины и рекоша Ионаѳану: |
9:29 | отнелѣже братъ твой Иуда скончася, и мужъ подобенъ ему нѣсть изыти противу враговъ и вакхида и враждующихъ языку нашему: |
9:30 | нынѣ убо тебе днесь избрахомъ, еже быти вмѣсто его намъ въ началника и вожда, еже ратовати во брани нашей. |
9:31 | И прiя Ионаѳанъ во время оно началство и воста вмѣсто Иуды брата своего. |
9:32 | И позна вакхидъ и искаше его убити. |
9:33 | И позна Ионаѳанъ и Симонъ братъ его и вси иже съ нимъ [бяху], и побѣгоша въ пустыню Ѳекуе, и ополчишася при водѣ рва Асфара. |
9:34 | И позна вакхидъ въ день субботъ, и прейде самъ и вси вои его объ ону страну Иордана. |
9:35 | И посла Ионаѳанъ брата своего вожда народу и моли наватеовъ друговъ своихъ представити имъ приготовленiе ихъ многое. |
9:36 | И изыдоша сынове Иамвріины от мидавы, и яша Иоанна и вся елика имѣ, и отидоша имуще та. |
9:37 | По словесѣхъ же сихъ возвѣстиша Ионаѳану и Симону брату его, яко сынове Иамвріины творятъ бракъ великiй и ведутъ невѣсту от Надаваѳа, дщерь единаго от великихъ вельможъ Ханаанскихъ, съ гордостiю велiею. |
9:38 | И помянуша Иоанна брата своего, и взыдоша, и скрышася подъ сѣнiю горы: |
9:39 | и воздвигнуша очи свои и видѣша, и се, плищь и уготованiе многое, и женихъ изыде и друзи его и братiя его бо срѣтенiе имъ съ тимпаны и мусикіами и оружiи многими: |
9:40 | и восташа на нихъ от засады иже при Ионаѳанѣ и убиша ихъ, и падоша язвени мнози, прочiи же бѣгоша въ гору: и взяша вся корысти ихъ. |
9:41 | И обратися бракъ въ сѣтованiе, и гласъ мусикіи ихъ въ плачь. |
9:42 | И отмстиша отмщенiе крове брата своего и возвратишася на брегъ Иорданскiй. |
9:43 | И слыша вакхидъ и прiиде въ день субботный даже до бреговъ Иорданскихъ съ силою многою. |
9:44 | И рече ко своимъ Ионаѳанъ: востанемъ нынѣ и ополчимся за душы нашя, нѣсть бо днесь якоже вчера и третiяго дне: |
9:45 | се бо, брань противу насъ и созади насъ: вода же Иорданская сюду и сюду, и блато и лѣсъ, и нѣсть мѣста, еже уклонитися: |
9:46 | нынѣ убо возопійте на небо, да избавитеся от рукъ враговъ вашихъ. и сразися брань. |
9:47 | И простре Ионаѳанъ руку свою убити вакхида, и уклонися от него вспять. |
9:48 | И вскочи Ионаѳанъ и иже съ нимъ во Иорданъ, и преплываху на объ ону страну, и не преидоша по нихъ Иордана. |
9:49 | И падоша от страны вакхидины дне онаго яко тысяща мужей. |
9:50 | И возвратися во Иерусалимъ и созда грады тверды во Иудеи, твердыню во иерихонѣ и яже во Еммаумѣ и веѳоронѣ, и Веѳили и Ѳемнаѳѣ, и фараѳонѣ и тефонѣ, со стѣнами высокими и вратами и заворами, |
9:51 | и постави стражу въ нихъ, еже враждовати Израилю: |
9:52 | и утверди градъ иже въ веѳсурѣ, и газару, и краеградiе, и постави въ нихъ силы и предложенiе брашенъ: |
9:53 | и взя сыны вождовъ страны въ залогъ и посади ихъ въ краеградiи во Иерусалимѣ подъ стражею. |
9:54 | И въ лѣто сто пятьдесятъ третiе месяца втораго, заповѣда алкимъ разорити стѣну двора святыхъ внутренняго, и разори дѣла пророковъ, и нача разоряти. |
9:55 | Во время оно пораженъ бысть алкимъ, и воспятишася дѣла его, и заградишася уста его, и разслабѣ и не можаше ктому глаголати слова и заповѣдати о домѣ своемъ. |
9:56 | И умре алкимъ во время оно съ мукою велiею. |
9:57 | И видѣ вакхидъ, яко умре алкимъ, и возвратися ко царю. и умолча земля Иудина лѣта два. |
9:58 | И совѣщаша вси беззаконницы рекуще: се, Ионаѳанъ и иже съ нимъ въ покои обитаютъ уповающе: нынѣ убо наведемъ вакхида, и поимаетъ ихъ всѣхъ во едину нощь. |
9:59 | И шедше совѣщашася съ нимъ. |
9:60 | И воста ити съ силою многою и посла епистолiи тай всѣмъ споборителемъ его, иже во Иудеи, да имутъ Ионаѳана и сущихъ съ нимъ. и не возмогоша, яко познася имъ совѣтъ ихъ. |
9:61 | И яша от мужей страны началниковъ злобы пятьдесятъ мужей и убиша ихъ. |
9:62 | И отъиде Ионаѳанъ и Симонъ и иже съ ними въ веѳвасію, яже въ пустыни, и созда разореная ея и укрѣпи ю. |
9:63 | И позна вакхидъ, и собра все множество свое, и сущымъ от Иудеи возвѣсти. |
9:64 | И шедъ ополчися на веѳвасію, и воеваше ю дни многи, и сотвори миханы. |
9:65 | И остави Ионаѳанъ Симона брата своего во градѣ, и изыде во страну, и изыде въ числѣ. |
9:66 | И порази одомира и братiю его и сыновъ фасиронихъ въ жилищихъ ихъ, и нача избивати и восходити въ силахъ. |
9:67 | Симонъ же и иже съ нимъ изыдоша изъ града и пожгоша миханы, |
9:68 | и ратоваху противу вакхида, и сотреся от нихъ, и озлобляху его зѣло, яко бѣ совѣтъ его и походъ его вотще. |
9:69 | И прогнѣвася яростiю на мужей беззаконныхъ, совѣтовавшихъ ему прiити во страну, и уби от нихъ многихъ, и совѣщася отити въ землю свою. |
9:70 | И позна Ионаѳанъ и посла къ нему старѣйшинъ составитимиръ съ нимъ и отдати имъ плѣнъ. |
9:71 | И прiя, и сотвори по словесемъ его, и клятся ему не искати ему зла во вся дни живота его. |
9:72 | И отдаде ему плѣнъ, егоже прежде плѣни от земли Иудины: и возвращься отъиде въ землю свою и не приложи ктому прiити въ предѣлы ихъ. |
9:73 | И преста мечь от Израиля. и обита Ионаѳанъ въ Махмасѣ: и нача Ионаѳанъ судити люди и истреби нечестивыхъ от Израиля. |