Третья книга Ездры, глава 16 неканонич.

	Язык: Церковнослав. (дореф.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 16
16:1	Горе тебѣ, Вавилоне и Асіа! горе тебѣ, Египте и сиріа!
16:2	Препояшитеся вретищемъ и власяницами и плачите сыновъ вашихъ и болѣзнуйте, яко при­­ближися сокрушенiе ва­ше:
16:3	посланъ есть на васъ мечь, и кто есть, иже от­вратитъ его?
16:4	посланъ есть на васъ огнь, и кто есть, иже угаситъ его?
16:5	послана суть на васъ злая, и кто есть, иже от­метнетъ я?
16:6	еда от­женетъ кто льва алчуща въ лѣсъ? или угаситъ огнь во хврастiи скоро, егда начнетъ воз­гарати?
16:7	еда от­разитъ кто стрѣлу от­ стрѣлца крѣпкаго испущен­ную?
16:8	Господь крѣпкiй посылаетъ злая, и кто есть, иже от­женетъ я?
16:9	изыде огнь от­ гнѣва его, и кто есть, иже угаситъ его?
16:10	блеснетъ молнiею, и кто не убо­ит­ся? воз­гремитъ, и кто не ужаснет­ся?
16:11	Господь воспретитъ, и кто до основанiя не сокрушит­ся от­ лица его?
16:12	Земля сотрясеся и основанiя ея, море волнует­ся изъ глубины, и волны его воз­мутят­ся и рыбы его от­ лица Господня и от­ славы силы его.
16:13	Понеже крѣпка десница его, яже лукъ напряже: стрѣлы его остры, яже от­ него посылают­ся, не оскудѣютъ, егда начнутъ посылатися въ концы земли.
16:14	Се, посылают­ся злая и не воз­вратят­ся, дондеже прiидутъ на землю.
16:15	Огнь воз­гарает­ся и не угаснетъ, дондеже скончаетъ основанiя земли.
16:16	Имже образомъ не воз­вращает­ся стрѣла послана от­ сильнаго стрѣлца, тако не воз­вратят­ся злая, яже послана будутъ на землю.
16:17	Горе мнѣ, горе мнѣ! кто мя избавитъ во дни тыя?
16:18	Начало болѣзней, и многа стенанiя: начало глада, и многи погибели: начало браней, и убоят­ся власти: начало золъ, и вострепещутъ вси.
16:19	Во время же то что сотворю, егда прiидутъ злая?
16:20	Се, гладъ и казнь, и скорбь и тѣснота, послани суть бичи во исправленiе:
16:21	и во всѣхъ сихъ не обратят­ся от­ беззаконiй сво­ихъ, ни биенiя памят­ст­вовати будутъ всегда.
16:22	Се, будетъ обилiе ни во чтоже на земли, тако яко воз­мнятъ себѣ быти управленъ миръ, и тогда воз­растутъ злая на земли, мечь, гладъ и велико смятенiе.
16:23	От глада бо мнози, иже обитаютъ на земли, погибнутъ, и мечь изгубитъ прочихъ, иже останутъ от­ глада.
16:24	И мертвiи яко мотыла извержени будутъ, и не будетъ, иже утѣшитъ ихъ: опустѣетъ бо земля, и гради ея разорени будутъ.
16:25	Не останет­ся, иже воз­дѣлаетъ землю и иже посѣетъ на ней.
16:26	Древеса дадутъ плоды, и кто объиметъ я?
16:27	гроздiе созрѣетъ, и кто потопчетъ е? будетъ бо мѣстъ великое опустѣнiе.
16:28	Восхощетъ бо человѣкъ человѣка видѣти, или гласъ его слышати,
16:29	зане останутъ от­ града десять, и два от­ нивы, иже сокрыют­ся въ густыхъ дубравахъ и въ разсѣлинахъ камен­ныхъ.
16:30	Имже образомъ оставляют­ся въ масличiихъ и на всяцѣмъ древѣ три или четыри маслины,
16:31	или якоже въ виноградѣ обранѣмъ гроздiе оставляют­ся от­ тѣхъ, иже при­­лѣжно виноградъ обираютъ:
16:32	тако оставят­ся во днехъ онѣхъ три или четыри от­ изслѣду­ю­щихъ домы ихъ мечемъ.
16:33	И оставлена будетъ земля пуста, и нивы ея состарѣют­ся, и путiе ея и вся стези ея тернiемъ зарастутъ, зане не пройдутъ человѣцы по нимъ.
16:34	Восплачутъ дѣвы не имущыя обручниковъ, восплачутъ жены не имѣющыя мужей, восплачутъ дщери ихъ не имѣющыя помощи:
16:35	обручницы ихъ въ брани скончают­ся, и мужiе ихъ во гладѣ истребят­ся.
16:36	Слышите сiя и познайте я, раби Господни.
16:37	Се, слово Господне, прiимите е: не вѣруйте богомъ, о нихже рече Господь:
16:38	се, при­­ближают­ся злая и не умедлятъ.
16:39	Имже образомъ бременатая егда родитъ въ девятый месяцъ сына сво­его, при­­ближающуся часу рожденiя ея, прежде часовъ двухъ или трiехъ болѣзни обдержатъ чрево ея, и исходящу младенцу от­ чрева, не закоснятъ ни на едину черту:
16:40	тако не укоснятъ злая про­изыти на землю, и вѣкъ воз­стенетъ, и болѣзни обымутъ и.
16:41	Слышите слово, людiе мо­и, уготовайтеся на брань, и во злыхъ тако будите, якоже при­­шелцы земли:
16:42	продаяй аки бѣгаяй, а купуяй аки погубляяй,
16:43	торгуяй аки плода не прiемляй, и созидаяй аки той, иже обитати не имать:
16:44	сѣяй, яко иже не пожнетъ: тако иже виноградъ рѣжетъ, яко не имый обирати его:
16:45	иже посягаютъ, тако аки чадъ не сотворятъ: и иже не посягаютъ, тако яко вдовицы.
16:46	Того ради, иже трудят­ся, вотще трудят­ся:
16:47	плоды бо ихъ иноплемен­ницы пожнутъ и имѣнiя ихъ расхитятъ, и домы превратятъ и сыновъ ихъ плѣнятъ, ибо во плѣненiи и гладѣ родятъ чада своя.
16:48	И иже куплю дѣютъ хищенiемъ, коль долго украшаютъ грады и домы своя, и одержанiя и лица своя,
16:49	толико паче воз­ненавижду ихъ за грѣхи ихъ, рече Господь.
16:50	Якоже ненавидитъ блудница жену мудру и добру зѣло,
16:51	тако воз­ненавидитъ правда неправду, егда украшает­ся, и клевещетъ на ню въ лице, егда прiидетъ иже защищаетъ изыскующаго всякъ грѣхъ на земли:
16:52	сего ради не уподобляйтеся ей, ни дѣломъ ея.
16:53	Яко еще мало, и возмет­ся беззаконiе от­ земли, а правда воцарит­ся надъ вами.
16:54	Да не глаголетъ грѣшникъ, яко не согрѣши, понеже углiе огнен­ное воз­горит­ся на главѣ его, иже глаголетъ: не согрѣшихъ предъ Господемъ Богомъ и славою его.
16:55	Се, Господь вѣсть вся дѣла человѣческая и начинанiя ихъ, и помышленiя ихъ и сердца ихъ.
16:56	Рече бо: да будетъ земля, и бысть: да будетъ небо, и бысть.
16:57	И словомъ его звѣзды сотворены суть, и знаетъ число звѣздъ:
16:58	иже испытуетъ бездны и сокровища ихъ, иже измѣрилъ есть море и зачатiе его,
16:59	иже заключи море посредѣ водъ и повѣси землю на водахъ словомъ сво­имъ,
16:60	иже простре небо яко камару, на водахъ основа е,
16:61	иже положи въ пустыни источники водныя и на верху горъ езера, во испущенiе рѣкъ изъ высокаго камене, да напаяютъ землю,
16:62	иже сотвори человѣка и положи сердце его посредѣ тѣла, и вложи ему духъ и животъ и разумъ
16:63	и дыханiе Бога Вседержителя, иже сотвори вся и испытуетъ вся сокровен­ная въ сокровен­ныхъ земли:
16:64	той знаетъ начинанiе ва­ше, и яже мыслите въ сердцахъ вашихъ согрѣшающе и хотяще утаити грѣхи вашя.
16:65	Сего ради Господь испытуяй испыта вся дѣла ваша и обличитъ васъ всѣхъ,
16:66	и вы посрамлени будете, егда про­изыдутъ грѣси ваши предъ человѣки, и беззаконiя предстанутъ, яже обвиняти будутъ въ день той.
16:67	Что сотворите, или како сокрыете грѣхи вашя предъ Богомъ и ангелы его?
16:68	Се, судiя Богъ, бойтеся его, останитеся от­ грѣхъ вашихъ и забудите беззаконiя ваша уже творити ихъ во вѣкъ, и Богъ изведетъ васъ и избавитъ от­ всякiя скорби.
16:69	Се бо, воз­гарает­ся огнь на васъ, языцы мнози, и восхитятъ нѣкiихъ от­ васъ и заколютъ на жертву идоломъ:
16:70	и иже со­изволятъ имъ, будутъ имъ въ посмѣхъ и въ поношенiе и въ попранiе.
16:71	Будетъ бо мѣстомъ мѣсто, и от­ сосѣднихъ градовъ востанутъ мнози на боящихся Господа.
16:72	Будутъ аки неистови, ни когоже щадяще на расхищенiе и запустѣнiе еще боящымся Господа:
16:73	ибо опустошатъ и расхитятъ стяжанiя ихъ и изъ домовъ ихъ изженутъ я.
16:74	Тогда явит­ся искушенiе избран­ныхъ мо­ихъ, якоже злато, еже искушает­ся от­ огня.
16:75	Слышите, воз­люблен­нiи мо­и, рече Господь: се, предъ вами суть дніе скорби, и от­ сихъ избавлю васъ.
16:76	Не бойтеся, ни сумнѣвайтеся, яко Богъ предводитель вашъ есть.
16:77	И иже хранитъ заповѣди и повелѣнiя моя, рече Господь Богъ, да не преотягчатъ васъ грѣси ваши, ниже превзыдутъ беззаконiя ваша.
16:78	Горе иже стисняют­ся от­ грѣхъ сво­ихъ и покрывают­ся беззаконiи сво­ими:
16:79	имже образомъ нива стисняет­ся от­ дубравы, и тернiемъ покрывает­ся стезя ея, еюже не проходитъ человѣкъ, и исторгает­ся, и посылает­ся на сожженiе огню. Конецъ книзѣ третiей ездры: имать въ себѣ главъ 16.