Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 11 | |
11:1 | И царь Египетскiй собра силу многу аки песокъ, иже вскрай моря, и корабли многи: и искаше обладати царство Александрово лестiю и приложити е къ царству своему. |
11:2 | И изыде въ сирію словесы мирными, и отверзаху ему иже от градовъ и срѣтаху его, яко заповѣдь бѣ Александра царя срѣтати его, зане бяше тесть его. |
11:3 | Егда же вхождаше во грады, Птоломей поставляше силы на стражу въ коемждо градѣ. |
11:4 См.: 🔗1Мак. 10:84 | Егда же приближися ко азоту, показаша ему капище дагоново сожжено, и азотъ и окрестныя грады его разорены, и тѣлеса повержена, и побiеныхъ, ихже поби во брани: сметаша бо я въ купы ихъ при пути его. |
11:5 | И повѣдаша царю, яже сотвори Ионаѳанъ, еже бы возненавидѣти его. и умолча царь. |
11:6 | И срѣте Ионаѳанъ царя во Иоппіи со славою, и цѣловаста другъ друга и почиста ту. |
11:7 | И иде Ионаѳанъ со царемъ даже до рѣки нарицаемыя Елевѳера, и возвратися во Иерусалимъ. |
11:8 | Царь же Птоломей огосподствова грады приморскими даже до селевкіи приморскiя и размышляше на Александра совѣты лукавы. |
11:9 | И посла старѣйшинъ къ димитрiю царю, глаголя: прiиди, составимъ между нама завѣтъ, и дамъ тебѣ дщерь мою, юже имать Александръ, и царствовати имаши во царствiи отца твоего: |
11:10 | раскаяхся бо давъ ему дщерь мою, искаше бо мя убити. |
11:11 | И похули его ради похотѣнiя царства его. |
11:12 | И отъявъ дщерь свою, даде ю димитрiю и отчуждися от Александра, и явися вражда ихъ. |
11:13 | И вниде Птоломей во Антiохію и возложи двѣ дiадимы на главу свою, Асійскую и Египетскую. |
11:14 | Александръ же царь бѣ въ киликіи во времена она, понеже отметахуся иже от мѣстъ оныхъ. |
11:15 | И слыша Александръ и прiиде нань бранiю: и изведе Птоломей силу, и срѣте его рукою крѣпкою, и прогна его. |
11:16 | И побѣже Александръ во Аравію защититися тамо: царь же Птоломей вознесеся. |
11:17 | И усѣкну завдiиль Аравитинъ главу Александрову и посла Птоломею. |
11:18 | И царь Птоломей умре въ третiй день, и сущiи въ твердынехъ погибоша от сущихъ въ твердынехъ. |
11:19 | И воцарися димитрiй въ лѣто сто шестьдесятъ седмое. |
11:20 | Во дни оны собра Ионаѳанъ сущихъ от Иудеи, да воюютъ краеградiе, еже во Иерусалимѣ, и сотвори на оное миханы многи. |
11:21 | И идоша нѣцыи ненавидящiи языка ихъ, мужiе беззаконницы, ко царю димитрiю и возвѣстиша ему, яко Ионаѳанъ обстоитъ краеградiе. |
11:22 | И слышавъ разгнѣвася: егда же слыша, скоро прiиде во Птолемаиду и написа ко Ионаѳану, да не обстоитъ краеградiя, но да идетъ во срѣтенiе ему тщателно во Птолемаиду, еже бесѣдовати съ нимъ. |
11:23 | Егда же услыша Ионаѳанъ, повелѣ обстояти, и избра от старѣйшинъ Израилевыхъ и иереевъ, и вдадеся въ бѣдство: |
11:24 | и взявъ злато и сребро и ризы и ины дары многи, иде ко царю во Птолемаиду и обрѣте благодать предъ нимъ. |
11:25 | И клеветаху на него нѣцыи беззаконнiи от языка [его]. |
11:26 | И сотвори ему царь, якоже сотвориша ему, иже прежде его быша, и возвыси его предъ всѣми други своими, |
11:27 | и постави его началника священству, и елика ина имѣяше прежде честная, и сотвори его въ первыхъ друзѣхъ быти. |
11:28 | И моли Ионаѳанъ царя сотворити Иудею безданну, и три топархiи, и самарію, и обѣща ему триста талантъ. |
11:29 | И угодно бысть царю, и написа Ионаѳану епистолiи о всѣхъ сихъ, имѣющыя образъ сицевый: |
11:30 | царь димитрiй брату Ионаѳану радоватися и языку Иудейскому: |
11:31 | списанiе епистолiи, юже писахомъ ласѳену сроднику нашему о васъ, писахомъ и къ вамъ, да вѣсте: |
11:32 | царь димитрiй ласѳену отцу радоватися: |
11:33 | языку Иудейску другомъ нашымъ и сохраняющымъ яже къ намъ праведная судихомъ благосотворити, ради благопрiятства ихъ къ намъ: |
11:34 | уставихомъ убо имъ предѣлы иудейскiя и три страны, Аферему, лидду и рамаѳемъ, иже приложишася Иудеи от самаріи, и вся надлежащая къ нимъ, всѣмъ жрущымъ во Иерусалимѣ, вмѣсто царскихъ, ихже взимаше царь от нихъ первѣе на всяко лѣто от житъ земли и от овощей древесныхъ, |
11:35 См.: 🔗1Мак. 10:29 | и ина надлежащая намъ отнынѣ десятинъ и даней надлежащихъ намъ, и соли точила, и принадлежащихъ намъ вѣнцевъ, |
11:36 | вся щедро оставляемъ имъ, и ничтоже от сихъ отъимется отнынѣ и въ вѣчное время: |
11:37 | нынѣ убо прилѣжите сотворити сихъ списанiе, и да дастся Ионаѳану и да положится въ горѣ святѣй въ мѣстѣ честнѣ. |
11:38 | И видѣ димитрiй царь, яко утишися земля предъ нимъ, и ничто ему противится, и отпусти вся вои своя коегождо въ мѣсто свое, кромѣ чуждихъ силъ, ихже собра от острововъ языческихъ, и враждоваху ему вся силы отцевъ его. |
11:39 | Трифонъ же бѣ от Александровыхъ первѣе, и видѣ, яко вся силы ропщутъ на димитрiа, и иде ко Емалкую Аравитину, иже воспита Антiоха дѣтище Александрово: |
11:40 | и прилѣжаше ему, яко да дастъ ему е, да воцаритъ вмѣсто отца его: и возвѣсти ему, елика сотвори димитрiй, и вражду, еюже враждуютъ нань силы его, и пребысть ту дни многи. |
11:41 | И посла Ионаѳанъ ко димитрiю царю, да ижденетъ сущихъ во краеградiи изъ Иерусалима и иже въ твердынехъ: бяху бо воююще Израиля. |
11:42 | И посла димитрiй ко Ионаѳану глаголя: не токмо сiя сотворю тебѣ и языку твоему, но и славою прославлю тя и языкъ твой, аще благовременство получу: |
11:43 | нынѣ убо право сотвориши, аще послеши ми мужей споборающихъ, яко отступиша вси вои мои. |
11:44 | И посла ему Ионаѳанъ три тысящы мужей сильныхъ крѣпостiю во Антiохію, и прiидоша ко царю, и возвеселися царь о пришествiи ихъ. |
11:45 | И собрашася иже от града въ средину града сто двадесять тысящъ мужей и совѣщахуся убити царя. |
11:46 | И бѣжа царь во дворъ, и объяша иже бѣху от града пути градскiя, и начаша битися. |
11:47 | И призва царь Иудеовъ на помощь, и собрашася вси вкупѣ къ нему: и расточишася вси по граду, |
11:48 | и убиша во градѣ въ той день сто тысящъ мужей, и сожгоша градъ, и взяша корысти многи во онъ день и избавиша царя. |
11:49 | И видѣша иже бяху от града, яко одержаша Иудее градъ, якоже хотѣша, и изнемогоша мысльми своими, и возопиша ко царю съ моленiемъ, глаголюще: |
11:50 | даждь намъ десницу, и да престанутъ Иудее ратовати насъ и градъ. |
11:51 | И повергоша оружiя своя и сотвориша миръ. И прославишася Иудее предъ царемъ и предъ всѣми иже во царствiи его, и возвратишася во Иерусалимъ имѣюще корысти многи. |
11:52 | И сѣде димитрiй царь на престолѣ царства своего, и упокоися земля предъ нимъ. |
11:53 | И солга вся елика рече, и отчуждися Ионаѳана, и не воздаде ему по благотворениемъ, яже воздаде ему, и оскорби его зѣло. |
11:54 | По сихъ же возвратися трифонъ и Антiохъ съ нимъ отрочищь юный: и воцарися и возложи дiадиму. |
11:55 | И собрашася къ нему вси вои, ихже расточи димитрiй, и ратоваша противу его, и побѣже и побѣжденъ бысть. |
11:56 | И взя трифонъ звѣри и одержа Антiохію. |
11:57 | И писа Антiохъ юный Ионаѳану, глаголя: уставляю тебѣ архiерейство и поставляю тебе надъ четырми странами, и будеши въ друзѣхъ царскихъ. |
11:58 | И посла ему сосуды златыя и служенiе, и даде ему власть пити изъ злата и быти въ порфирѣ и имѣти гривну злату. |
11:59 | И Симона брата его постави воеводою от страны тира даже до предѣлъ Египта. |
11:60 | И изыде Ионаѳанъ и прохождаше объ ону страну рѣки и во градѣхъ, и собрашася къ нему вся силы сирскiя въ помощь, и прiиде во Аскалонъ, и срѣтоша его честно от града. |
11:61 | И иде оттуду въ Газу, и заключишася иже въ Газѣ, и обстояше ю, и пожже окрестныя грады ея огнемъ, и плѣни я. |
11:62 | И молиша Ионаѳана иже от Газы, и даде имъ десницу, и взя сыны началниковъ ихъ въ залогъ, и посла ихъ во Иерусалимъ, и пройде страну даже до Дамаска. |
11:63 | И слыша Ионаѳанъ, яко суть началницы димитриевы въ Кадисѣ, иже въ Галилеи, съ силою многою, хотяще изринути его от страны. |
11:64 | И срѣтеся съ ними, брата же своего Симона остави во странѣ. |
11:65 | И ополчися Симонъ на веѳсуру, и ратоваша ю дни многи, и заключи ю. |
11:66 | И просиша у него десницу прiяти, и даде имъ, и изгна ихъ оттуду, и взя градъ, и постави въ немъ стражу. |
11:67 | Ионаѳанъ же и полкъ его прiидоша къ водѣ геннисаръ: |
11:68 | и идоша утро рано на поле насоръ, и се, полкъ иноплеменниковъ срѣте его на поли, и поставиша нань ловителство въ горахъ, сами же срѣтоша отсупротиву. |
11:69 | Ловителе же восташа от мѣстъ своихъ и составиша рать, |
11:70 | и побѣгоша иже со Ионаѳаномъ вси, и ни единъ остася от нихъ, токмо маттаѳіа сынъ Авессаломовъ, и Иуда сынъ халфіевъ, началницы воинскихъ силъ. |
11:71 | И растерза Ионаѳанъ ризы своя, и возложи землю на главу свою, и помолися: |
11:72 | и обратися на нихъ бранiю и побѣди ихъ, и бѣгоша. |
11:73 | И видѣша свои бѣжавшiи от него, и обратишася къ нему, и гнаша съ нимъ даже до Кадиса, даже до полка ихъ, и ополчишася тамо. |
11:74 | И падоша от иноплеменникъ въ день той три тысящы мужей. и возвратися Ионаѳанъ во Иерусалимъ. |