Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 9 | |
9:1 | [Зач. 320.] Имѣяше убо первая скинiя {первый [завѣтъ]} оправданiя службы, святое же людское: |
9:2 См.: 🔗Исх. 40:1 | скинiя бо сооружена бысть первая, въ нейже свѣтилникъ и трапеза и предложенiе хлѣбовъ, яже глаголется святая. |
9:3 | По вторѣй же завѣсѣ скинiя глаголемая Святая святыхъ, |
9:4 | злату имущи кадилницу и ковчегъ завѣта окованъ всюду златомъ, въ немже стамна злата имущая манну, и жезлъ Аароновъ прозябшiй, и скрижали завѣта: |
9:5 См.: 🔗Исх. 25:18 | превышше же его херувими славы, осѣняющiи олтарь {очистилище}: о нихже не лѣть нынѣ глаголати подробну. |
9:6 | Симъ же тако устроенымъ, въ первую убо скинiю выну вхождаху священницы, службы совершающе: |
9:7 См.: 🔗Исх. 30:10 🔗Лев. 16:2 | во вторую же единою въ лѣто единъ архiерей, не безъ крове, юже приноситъ за себе и о людскихъ невѣжествiихъ. |
9:8 | [Зач. 321А.] Сiе являющу Духу Святому, яко не у явися святыхъ путь, еще первѣй скинiи имущей стоянiе. |
9:9 См.: 🔗Евр. 7:19 🔗Евр. 10:1 | Яже притча во время настоящее утвердися, въ неже дарове и жертвы приносятся, не могущыя по совѣсти совершити служащаго, |
9:10 | точiю въ брашнахъ и питiяхъ, и различныхъ омовенiихъ, и оправданiихъ плоти, даже до времене исправленiя належащая. |
9:11 См.: 🔗Евр. 10:1 | [Зач. 321Б.] Христосъ же пришедъ Архiерей грядущихъ благъ, болшею и совершеннѣйшею скинiею, нерукотворенною, сирѣчь, не сея твари, |
9:12 См.: 🔗Евр. 10:12 | ни кровiю козлею ниже телчею, но Своею Кровiю, вниде единою во святая, вѣчное искупленiе обрѣтый. |
9:13 См.: 🔗Лев. 16:14 🔗Чис. 19:4 | Аще бо кровь козляя и телчая и пепелъ юнчiй кропящiй оскверненыя освящаетъ къ плотстѣй чистотѣ: |
9:14 | кольми паче Кровь Христова, Иже Духомъ Святымъ Себе принесе непорочна Богу, очиститъ совѣсть нашу от мертвыхъ дѣлъ, во еже служити намъ Богу живу и истинну? |
9:15 См.: 🔗1Пет. 3:18 🔗Рим. 5:6 | И сего ради новому завѣту ходатай есть, да смерти бывшей, во искупленiе преступленiй бывшихъ въ первѣмъ завѣтѣ, обѣтованiе вѣчнаго наслѣдiя прiимутъ званнiи. |
9:16 | Идѣже бо завѣтъ, смерти нужно есть вноситися завѣщающаго, |
9:17 См.: 🔗Гал. 3:15 | завѣтъ бо въ мертвыхъ извѣстенъ есть: понеже ничесоже можетъ, егда живъ есть завѣщаваяй. |
9:18 | Тѣмже ни первый безъ крове обновленъ {утвержденъ} бысть. |
9:19 См.: 🔗Исх. 12:22 🔗Лев. 16:14 | Реченнѣй бо бывшей всяцѣй заповѣди по закону от Моисеа всѣмъ людемъ, прiемь кровь козлюю и телчую, съ водою и волною червленою и иссопомъ, самыя же тыя книги и вся люди покропи, |
9:20 См.: 🔗Исх. 24:8 | глаголя: сiя кровь завѣта, егоже завѣща къ вамъ Богъ. |
9:21 | И скинiю же и вся сосуды служебныя кровiю такожде покропи. |
9:22 | И отнюдъ кровiю вся {и едва не вся кровiю} очищаются по закону, и безъ кровопролитiя не бываетъ оставленiе. |
9:23 | Нужда убо бяше образомъ небесныхъ сими очищатися: самѣмъ же небеснымъ лучшими жертвами, паче сихъ. |
9:24 | [Зач. 322.] Не въ рукотворенная бо святая вниде Христосъ, противообразная истинныхъ, но въ самое небо, нынѣ да явится лицу Божiю о насъ, |
9:25 | ниже да многажды приноситъ Себе, якоже первосвященникъ входитъ во святая [святыхъ] по вся лѣта съ кровiю чуждею: |
9:26 | понеже подобаше бы Ему множицею страдати от сложенiя мiра: нынѣ же единою въ кончину вѣковъ, во отметанiе грѣха, жертвою Своею явися. |
9:27 См.: 🔗3Езд. 14:35 | И якоже лежитъ {опредѣлено есть} человѣкомъ единою умрети, потомъ же судъ, |
9:28 См.: 🔗1Пет. 3:18 🔗Рим. 5:6 | тако и Христосъ единою принесеся, во еже вознести многихъ грѣхи, второе безъ грѣха явится, ждущымъ Его во спасенiе. |