Книга Иудифи, глава 11 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 11
11:1	И рече къ ней Олофернъ: дерзай, жено, да не устрашаешися сердцемъ тво­имъ, зане азъ не озлобихъ человѣка, иже изволи служити царю навуходоносору всея земли:
11:2	и нынѣ людiе тво­и живущiи въ горней, аще бы не уничтожили мя, не воз­двиглъ быхъ копiя мо­его на нихъ, но они сами себѣ сотвориша сiя:
11:3	и нынѣ глаголи ми, чесо ради от­шла еси от­ нихъ и при­­шла еси къ намъ? при­­ходиши бо ко спасенiю: дерзай, въ нощь сiю жива будеши, и въ прочее:
11:4	нѣсть бо, иже обидитъ тя, но благо тебѣ сотворитъ, якоже бываетъ рабомъ господина мо­его царя навуходоносора.
11:5	И рече къ нему Иудиѳъ: прiими глаголы рабы тво­ея, и да проглаголетъ рабыня твоя предъ лицемъ тво­имъ, и не воз­вѣщу лжи госиодину мо­ему въ нощь сiю:
11:6	и аще имаши послѣдовати словесемъ рабыни тво­ея, совершен­но дѣло сотворитъ съ тобою Богъ, и не от­падетъ господинъ мой от­ начинанiй сво­ихъ:
11:7	живетъ бо царь навуходоносоръ всея земли, и живетъ держава его, иже посла тя во исправленiе всякiя души, яко не токмо человѣцы тебе ради послужатъ ему, но и звѣрiе польнiи и скоти и птицы небесныя крѣпостiю тво­ею живи будутъ о навуходоносорѣ и всемъ домѣ его:
11:8	слышахомъ бо премудрость твою и хитрости души тво­ея, и воз­вѣстися всей земли, яко ты единъ благъ во всемъ цар­ст­вѣ и силенъ въ разумѣ и чуденъ во ополченiихъ брани:
11:9	и нынѣ слово, еже изрече Ахiоръ въ засѣданiи тво­емъ, слышахомъ глаголы его, яко снабдѣша его мужiе града ветилуи, и воз­вѣсти имъ вся, елика изглагола онъ у тебе:
11:10	сего ради, владыко господине, да не преступаеши словесе его, но положи его въ тво­емъ сердцы, яко истин­но есть: не бо от­мщает­ся родъ нашъ, не превоз­могаетъ мечь на нихъ, аще не согрѣшатъ къ Богу сво­ему:
11:11	и нынѣ да не будетъ господинъ мой от­верженъ и недѣй­ст­вителенъ, и нападетъ смерть на лице ихъ, и постигнетъ ихъ согрѣшенiе, имже раздражатъ Бога сво­его, когда либо аще сотворятъ безмѣстiе:
11:12	понеже бо оскудѣша имъ брашна, и умалися вся вода, восхотѣша устремитися на скоты своя, и вся, елика опредѣли имъ Богъ въ законѣхъ сво­ихъ не ясти, умыслиша употребляти:
11:13	и начатки пшеницы, и десятины вiна и елеа, яже соблюдаху освятив­ше иереомъ предстоящымъ во Иерусалимѣ предъ лицемъ Бога на­шего, судиша иждивати, имже ниже руками подоба­ше при­­касатися кому от­ людій:
11:14	и послаша во Иерусалимъ, яко и тамо живущiи сотвориша сiя, да при­­несутъ имъ разрѣшенiе от­ старѣйшинъ:
11:15	и будетъ, егда воз­вѣстит­ся имъ, и сотворятъ, дадут­ся тебѣ въ погубленiе въ день той:
11:16	тѣмже азъ раба твоя, познав­ши сiя вся, от­бѣгохъ от­ лица ихъ: и посла мя Богъ творити съ тобою дѣла, о нихже ужаснет­ся вся земля, елицы аще услышатъ сiя,
11:17	зане раба твоя благо­честива есть и служащи нощiю и днемъ Богу небесе: и нынѣ пребуду у тебе, господине мой, и да исходитъ раба твоя въ нощи въ дебрь и молит­ся къ Богу: и воз­вѣститъ ми, егда сотворятъ согрѣшенiя своя:
11:18	и при­­шедши воз­вѣщу тебѣ, и изыдеши со всею силою тво­ею, и нѣсть, иже воспротивит­ся тебѣ от­ нихъ:
11:19	и поведу тя сквоз­ѣ Иудею, дондеже прiити прямо Иерусалима, и положу сѣдалище твое посредѣ его, и поженеши ихъ аки овцы, имже нѣсть пастыря, и не воз­скомлетъ песъ языкомъ сво­имъ противу тебе: зане мнѣ сiя речена суть по предвѣдѣнiю мо­ему и воз­вѣщена ми, и послана есмь воз­вѣстити тебѣ.
11:20	И угодна быша словеса ея предъ Олоферномъ и предъ всѣми слуги его, и дивишася о премудрости ея и рѣша:
11:21	нѣсть таковыя жены от­ конца даже до конца земли въ красотѣ лица и въ разумѣ словесъ.
11:22	И рече къ ней Олофернъ: благо сотвори Богъ пославый тя предъ людьми, еже быти въ рукахъ нашихъ державѣ, на уничижив­шихъ же господина мо­его погибели:
11:23	и нынѣ красна еси ты взоромъ тво­имъ и блага во словесѣхъ тво­ихъ: зане аще сотвориши, якоже глаголала еси, Богъ твой будетъ мой Богъ, и ты въ дому царя навуходоносора сядеши и будеши именита по всей земли.