Третья книга Ездры, глава 14 неканонич.

	Язык: Церковнослав. (дореф.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 14
14:1	И бысть въ третiй день, и азъ сѣдяхъ подъ дубомъ, и се, гласъ изыде противу мене от­ купины и рече: ездро, ездро! И рекохъ:
14:2	се, азъ, Господи. И востахъ на нозѣ мо­и. И рече ко мнѣ:
14:3	от­крываяся от­кровенъ есмь на купинѣ и глаголахъ ко Моисею, егда служаху людiе мо­и во Египтѣ,
14:4 См.: 🔗Втор. 5:6	и послахъ его и изведохъ люди моя от­ Египта, и воз­ведохъ его на гору Синайску и держахъ его предъ собою дни многи,
14:5	И воз­вѣстихъ ему чудеса многа и показахъ ему временъ тайная и конецъ, и заповѣдахъ ему глаголя:
14:6	сiя во явленiе сотвориши словеса и сiя скрыеши:
14:7	и нынѣ тебѣ глаголю:
14:8	знаменiя, яже показахъ, и сонiя, яже видѣлъ еси, и толкованiя, яже ты вѣдѣлъ еси, въ сердцы тво­емъ положи я,
14:9	ты бо воспрiятъ будеши от­ всѣхъ, обратишися остатнiй съ совѣтомъ мо­имъ и съ подобными тво­ими, дондеже скончают­ся времена:
14:10	яко вѣкъ погуби юность свою, и времена при­­ближают­ся старѣтися:
14:11	на два­на­де­сять бо частей раздѣленъ есть вѣкъ, и про­идоша его десятая и полдесятыя части,
14:12	осташася же его послѣ полдесятыя части:
14:13	нынѣ убо устрой домъ твой и накажи люди твоя, и утѣши смирен­ныхъ ихъ и от­рецыся уже тлѣнiя,
14:14	и от­пусти от­ себе смертное помышленiе и от­верзи от­ себе тягости людскія, и извлецы уже от­ себе немощное есте­с­т­во и от­стави во едину страну смущающая тя помышленiя, и тщися преселитися от­ временъ сихъ:
14:15	яже бо видѣлъ еси нынѣ случив­шаяся злая, паки тѣхъ горшая сотворятъ:
14:16	колико бо изнеможетъ вѣкъ от­ старости, толико умножат­ся на обитающихъ злая:
14:17	удалибося далече истина, и при­­ближися лжа: уже бо тщит­ся прiити еже видѣлъ еси видѣнiе.
14:18	И овѣщахъ и рекохъ: предъ тобою, Господи:
14:19	се бо, азъ пойду, якоже повелѣлъ еси мнѣ, и накажу настоящыя люди: а иже родят­ся, кто научитъ я?
14:20	поставленъ бо есть вѣкъ во тмѣ: иже обитаютъ въ немъ, безъ свѣта:
14:21	понеже законъ твой сожженъ есть, того ради никтоже знаетъ, яже от­ тебе сотворена суть, или яже начнут­ся дѣла:
14:22	аще бо обрѣтохъ благодать предъ тобою, посли въ мя Духъ святъ, да напишу все, еже сотворено бысть въ вѣцѣ от­ начала, яже быша въ законѣ тво­емъ писана, да воз­могутъ человѣцы обрѣсти стезю, и иже восхотятъ жити въ послѣднихъ временѣхъ, да живутъ.
14:23	И от­вѣща ко мнѣ и рече: шедъ собери люди и речеши къ нимъ, да не ищутъ тебе дній четыредесять,
14:24	ты же уготови себѣ дщицъ много и воз­ми съ собою саріа, давріа, Салеміа, ехана и Асiеля, пять ихъ, иже уготовани суть къ писанiю скоро:
14:25	и прiидеши сѣмо, и азъ воз­жгу въ сердцы тво­емъ свѣтилникъ разума, и не угаснетъ, дондеже скончают­ся, яже начнеши писати:
14:26	и когда совершиши, нѣкая яв­с­т­вен­но да сотвориши, нѣкоторая мудрымъ сокровен­но предаси, въ заутрiи бо въ сей часъ начнеши писати.
14:27	И идохъ, якоже ми повелѣ, и собрахъ вся люди и рекохъ:
14:28	слыши, Израилю, словеса сiя:
14:29	стран­ствоваша отцы наши от­ начала во Египтѣ и избавлени суть от­толѣ,
14:30 См.: 🔗Втор. 4:6	и прiяша законъ жизни, егоже не сохраниша, егоже и вы по нихъ преступисте:
14:31	и дана вамъ есть земля въ жребiй, и земля Сiонъ, и отцы ваши и вы беззаконiе сотвористе и не содержасте путій, ихже повелѣ вамъ вышнiй:
14:32	а понеже праведный судiя есть, отъ­ялъ от­ васъ во время, еже дарова:
14:33	и нынѣ вы здѣ есте, и братiя ваша въ васъ суть:
14:34	аще убо повелите чув­ст­ву ва­шему и по­учите сердце ва­ше, живи содержани будете и по смерти милость наслѣдите:
14:35	судъ бо по смерти прiидетъ, егда паки оживемъ, и тогда праведныхъ имена явят­ся и нечестивыхъ дѣла покажут­ся:
14:36	ко мнѣ убо никтоже да при­­ступитъ нынѣ, ни взыщетъ мене даже до четыредесяти дній.
14:37	И прiяхъ пять мужей, якоже заповѣда мнѣ, и идохомъ въ поле и пребыхомъ ту.
14:38	И бысть въ заутрiи, и се, гласъ воз­зва мя глаголя: ездро! от­верзи уста твоя и пій, имже тя напою.
14:39	И от­верзохъ уста моя, и се, чаша полна подаяшеся мнѣ: и сiе, имже бѣ исполнена, бяше якоже вода, цвѣтъ же ея огню подобенъ.
14:40	И прiяхъ и пихъ: и тогда, егда пiяхъ, сердце мое мятяшеся разумомъ, и въ персехъ мо­ихъ воз­раста­ше премудрость, ибо духъ мой содержа­шеся памятiю:
14:41	и от­верста быша уста моя и не быша затворена ктому.
14:42	Вышнiй даде разумъ пятимъ мужемъ, и писаша, яже глаголахуся ужасы нощныя, ихже не вѣдяху.
14:43	Нощiю же ядяху хлѣбъ, азъ же во дни глаголахъ и нощiю не молчахъ.
14:44	И написаны суть за четыредесять дній книги двѣсти четыри.
14:45	И бысть егда совершишася четыредесять дній,
14:46	глагола вышнiй, рекій: первая, яже писалъ еси, въ явѣ постави, и да чтутъ достойнiи и недостойнiи:
14:47	послѣдняя же седмьдесятъ сохрани, да предаси ихъ мудрымъ от­ людій тво­ихъ:
14:48	въ тѣхъ бо есть корень разума, и премудрости источникъ, и вѣдѣнiя рѣка. И сотворихъ тако.