Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 9 | |
9:1 | [Зач. 34.] И мимоидый видѣ человѣка слѣпа от рождества. |
9:2 | И вопросиша Его ученицы Его, глаголюще: Равви, кто согрѣши, сей ли, или родителя его, яко слѣпъ родися? |
9:3 | Отвѣща Иисусъ: ни сей согрѣши, ни родителя его, но да явятся дѣла Божiя на немъ: |
9:4 См.: 🔗Ин. 4:34 🔗Ин. 12:35 | Мнѣ подобаетъ дѣлати дѣла Пославшаго Мя, дондеже день есть: прiидетъ нощь, егда никтоже можетъ дѣлати: |
9:5 | егда въ мiрѣ есмь, свѣтъ есмь мiру. |
9:6 См.: 🔗Ин. 11:37 | Сiя рекъ, плюну на землю, и сотвори бренiе от плюновенiя, и помаза очи бренiемъ слѣпому, |
9:7 См.: 🔗Неем. 3:15 | и рече ему: иди, умыйся въ купѣли Силоамстѣ, еже сказается, посланъ. Иде убо, и умыся, и прiиде видя. |
9:8 | Сосѣди же и иже бяху видѣли его прежде, яко слѣпъ бѣ, глаголаху: не сей ли есть сѣдяй и просяй? |
9:9 | Овiи глаголаху, яко сей есть: иніи же глаголаху, яко подобенъ ему есть. Онъ [же] глаголаше, яко азъ есмь. |
9:10 | Глаголаху же ему: како ти отверзостѣся очи? |
9:11 | Отвѣща онъ и рече: Человѣкъ нарицаемый Иисусъ бренiе сотвори, и помаза очи мои, и рече ми: иди въ купѣль Силоамлю и умыйся. Шедъ же и умывся, прозрѣхъ. |
9:12 | Рѣша убо ему: кто {гдѣ} Той есть? Глагола: не вѣмъ. |
9:13 | Ведоша [же] его къ фарисеомъ, иже бѣ иногда слѣпъ. |
9:14 | Бѣ же суббота, егда сотвори бренiе Иисусъ и отверзе ему очи. |
9:15 | Паки же вопрошаху его и фарисее, како прозрѣ. Онъ же рече имъ: бренiе положи мнѣ на очи, и умыхся, и вижу. |
9:16 См.: 🔗Ин. 7:43 | Глаголаху убо от фарисеи нѣцыи: нѣсть Сей от Бога Человѣкъ, яко субботу не хранитъ. Овiи глаголаху: како можетъ человѣкъ грѣшенъ сицева знаменiя творити? И распря бѣ въ нихъ. |
9:17 | Глаголаху [убо] слѣпцу паки: ты что глаголеши о Немъ, яко отверзе очи твои? Онъ же рече, яко пророкъ есть. |
9:18 | Не яша убо вѣры Иудее о немъ, яко слѣпъ бѣ и прозрѣ, дондеже возгласиша родителя того прозрѣвшаго |
9:19 | и вопросиша я, глаголюще: сей ли есть сынъ ваю, егоже вы глаголете, яко слѣпъ родися? како убо нынѣ видитъ? |
9:20 | Отвѣщаста [же] имъ родителя его и рѣста: вѣмы, яко сей есть сынъ наю и яко слѣпъ родися: |
9:21 | како же нынѣ видитъ, не вѣмы: или кто отверзе ему очи, мы не вѣмы: самъ возрастъ имать, самого вопросите, самъ о себѣ да глаголетъ. |
9:22 См.: 🔗Ин. 12:42 | Сiя рекоста родителя его, яко боястася Жидовъ: уже бо бяху сложилися Жидове, да, аще кто Его исповѣсть Христа, отлученъ от сонмища будетъ: |
9:23 | сего ради родителя его рекоста, яко возрастъ имать, самого вопросите. |
9:24 | Возгласиша же вторицею человѣка, иже бѣ слѣпъ, и рѣша ему: даждь славу Богу: мы вѣмы, яко Человѣкъ Сей грѣшенъ есть. |
9:25 | Отвѣща убо онъ и рече: аще грѣшенъ есть, не вѣмъ: едино вѣмъ, яко слѣпъ бѣхъ, нынѣ же вижу. |
9:26 | Рѣша же ему паки: что сотвори тебѣ? Како отверзе очи твои? |
9:27 | Отвѣща имъ: рекохъ вамъ уже, и не слышасте: что паки хощете слышати? Еда и вы ученицы Его хощете быти? |
9:28 | Они же укориша его и рѣша ему: ты ученикъ еси Того: мы же Моисеовы есмы ученицы: |
9:29 См.: 🔗Исх. 3:6 | мы вѣмы, яко Моисеови глагола Богъ: Сего же не вѣмы, откуду есть. |
9:30 | Отвѣща человѣкъ и рече имъ: о семъ бо дивно есть, яко вы не вѣсте, откуду есть, и отверзе очи мои: |
9:31 | вѣмы же, яко грѣшники Богъ не послушаетъ: но аще кто Богочтецъ есть и волю Его творитъ, того послушаетъ: |
9:32 См.: 🔗Ис. 42:7 | от вѣка нѣсть слышано, яко кто отверзе очи слѣпу рождену: |
9:33 | аще не бы былъ Сей от Бога, не моглъ бы творити ничесоже. |
9:34 | Отвѣщаша и рѣша ему: во грѣсѣхъ ты родился еси весь, и ты ли ны учиши? И изгнаша его вонъ. |
9:35 | Услыша Иисусъ, яко изгнаша его вонъ: и обрѣтъ его, рече ему: ты вѣруеши ли въ Сына Божiя? |
9:36 | Отвѣща онъ и рече: и кто есть, Господи, да вѣрую въ Него? |
9:37 | Рече же ему Иисусъ: и видѣлъ еси Его, и глаголяй съ тобою Той есть. |
9:38 | Онъ же рече: вѣрую, Господи. И поклонися Ему. |
9:39 См.: 🔗Мф. 11:25 🔗2Кор. 3:14 | [Зач. 35.] И рече Иисусъ: на судъ Азъ въ мiръ сей прiидохъ, да невидящiи видятъ, и видящiи слѣпи будутъ. |
9:40 | И слышаша от фарисей сiя сущiи съ Нимъ, и рѣша Ему: еда и мы слѣпи есмы? |
9:41 См.: 🔗Ин. 15:22 | Рече имъ Иисусъ: аще бысте слѣпи были, не бысте имѣли грѣха: нынѣ же глаголете, яко видимъ: грѣхъ убо вашъ пребываетъ. |