Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 6 | |
6:1 | Что убо речемъ? Пребудемъ ли во грѣсѣ, да благодать преумножится? Да не будетъ. |
6:2 См.: 🔗1Пет. 2:24 🔗Гал. 6:14 | Иже бо умрохомъ грѣху, како паки оживемъ о немъ {како еще жити будемъ въ немъ}? |
6:3 См.: 🔗Гал. 3:27 | [Зач. 91.] Или не разумѣете, яко елицы во Христа Иисуса крестихомся, въ смерть Его крестихомся? |
6:4 | Спогребохомся убо Ему крещенiемъ въ смерть, да якоже воста Христосъ от мертвыхъ славою Отчею, тако и мы во обновленiи жизни ходити начнемъ {да ходимъ}. |
6:5 См.: 🔗Рим. 8:11 🔗1Кор. 6:14 | Аще бо сообразни {снасаждени} быхомъ подобiю смерти Его, то и воскресенiя будемъ, |
6:6 См.: 🔗Гал. 5:24 | сiе вѣдяще, яко ветхiи нашъ человѣкъ съ Нимъ распятся, да упразднится тѣло грѣховное, яко ктому не работати намъ грѣху: |
6:7 См.: 🔗1Пет. 4:1 | умерый бо свободися от грѣха. |
6:8 См.: 🔗Кол. 3:5 🔗2Тим. 2:11 | Аще же умрохомъ со Христомъ, вѣруемъ, яко и живи будемъ съ Нимъ, |
6:9 См.: 🔗1Кор. 15:54 🔗Евр. 9:28 | вѣдяще, яко Христосъ воста от мертвыхъ, ктому уже не умираетъ: смерть Имъ ктому не обладаетъ. |
6:10 См.: 🔗Лк. 20:38 | Еже бо умре, грѣху умре единою: а еже живетъ, Богови живетъ. |
6:11 См.: 🔗Гал. 2:19 | [Зач. 92.] Такожде и вы помышляйте себе мертвыхъ убо быти грѣху, живыхъ же Богови, о Христѣ Иисусѣ Господѣ нашемъ. |
6:12 | Да не царствуетъ убо грѣхъ въ мертвеннѣмъ вашемъ тѣлѣ, во еже послушати его въ похотехъ его: |
6:13 См.: 🔗Рим. 12:1 🔗Гал. 2:20 | ниже представляйте уды вашя оружiя неправды грѣху: но представляйте себе Богови яко от мертвыхъ живыхъ, и уды вашя оружiя правды Богови. |
6:14 См.: 🔗Рим. 5:20 | Грѣхъ бо вами да не обладаетъ: нѣсте бо подъ закономъ, но подъ благодатiю. |
6:15 См.: 🔗Гал. 2:17 | Что убо? согрѣшимъ ли, зане нѣсмы подъ закономъ, но подъ благодатiю, да не будетъ. |
6:16 | Не вѣсте ли, яко емуже представляете себе рабы въ послушанiе, раби есте, егоже послушаете, или грѣха въ смерть, или послушанiя въ правду? |
6:17 | Благодаримъ убо Бога, яко бѣсте раби грѣху, послушасте же от сердца, въ оньже и предастеся образъ ученiя. |
6:18 | [Зач. 93.] Свобождшеся же от грѣха, поработистеся правдѣ. |
6:19 | Человѣческо глаголю, за немощь плоти вашея. Якоже бо представисте уды вашя рабы нечистотѣ и беззаконiю въ беззаконiе, тако нынѣ представите уды вашя рабы правдѣ во святыню. |
6:20 | Егда бо раби бѣсте грѣха, свободни бѣсте от правды. |
6:21 См.: 🔗Рим. 1:26 🔗Рим. 7:5 | Кій убо тогда имѣсте плодъ? О нихже нынѣ стыдитеся, кончина бо онѣхъ, смерть. |
6:22 | Нынѣ же свобождшеся от грѣха, порабощшеся же Богови, имате плодъ вашъ во святыню, кончину же жизнь вѣчную. |
6:23 См.: 🔗Рим. 2:7 🔗Рим. 5:12 | Оброцы бо грѣха, смерть: дарованiе же Божiе животъ вѣчный о Христѣ Иисусѣ Господѣ нашемъ. |