Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 6 | |
6:1 См.: 🔗Иер. 5:17 | Лютѣ уничижающымъ Сiона и уповающымъ на гору самарійскую: объимаша начатки языковъ, и внидоша къ нимъ домъ Израилевъ. |
6:2 См.: 🔗Быт. 10:10 | Мимоидите халану вси и видите, и прейдите оттуду во Емаѳъ великiй и снидите оттуду въ геѳъ иноплеменниковъ, крѣпчайшыя от всѣхъ царствъ сихъ, аще болши суть предѣлы ихъ предѣлъ вашихъ? |
6:3 | Приходящiи въ день золъ, приближающiися и прикасающiися субботамъ лживымъ, |
6:4 | спящiи на одрѣхъ от костей слоновыхъ и ласкосердствующiи на постелехъ своихъ, ядущiи козлища от паствъ и телцы млекомъ питаемы от среды стадъ: |
6:5 | плещущiи ко гласу пищалей, аки стояща мнѣша, а не яко бѣжаща: |
6:6 См.: 🔗Быт. 40:23 | пiющiи процѣженое вино и первыми вонями мажущiися, и не страдаху ничесоже въ сокрушенiи Иосифовѣ. |
6:7 | Сего ради нынѣ плѣнницы будутъ от начала сильныхъ, и отъимется ржанiе конско от Ефрема. |
6:8 См.: 🔗Иер. 51:14 | Яко клятся Господь собою, глаголетъ Господь Богъ силъ: понеже гнушаюся азъ всею укоризною Иакова и села его возненавидѣхъ, и отвергу градъ со всѣми живущими въ немъ. |
6:9 | И будетъ, аще останутся десять мужей во единѣмъ дому, умрутъ, и останутся остаточнiи: |
6:10 | и возмутъ свои ихъ, и понудятся изнести кости ихъ изъ дому. И речетъ настоятелемъ дому: еще ли есть у тебе? И речетъ: нѣсть еще. И речетъ: молчи, не именованiя ради имене Господня. |
6:11 | Понеже, се, Господь заповѣдаетъ и побiетъ домъ великiй толченiемъ и домъ малый разсѣденiемъ. |
6:12 | Аще поженутъ въ каменiяхъ кони? и аще умолкнутъ въ женстѣмъ полу? яко обратисте на гнѣвъ судъ, и плодъ правды на горесть, |
6:13 | веселящiися ни о единѣмъ словѣ блазѣ, глаголющiи: не крѣпостiю ли нашею имамы роги? |
6:14 См.: 🔗Чис. 34:8 | Тѣмже, се, азъ воздвигну на вы, доме Израилевъ, языкъ, глаголетъ Господь Богъ силъ, и сокрушатъ васъ еже не внити во Емаѳъ и до водотечи западовъ. |