Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 17 | |
17:1 | Да не пожреши Господеви Богу твоему телца или овчате, на немже есть порокъ, всякъ глаголъ золъ: яко мерзость Господеви Богу твоему есть. |
17:2 См.: 🔗Втор. 13:6 | Аще же обрящется у тебе во единѣмъ от градовъ твоихъ, яже Господь Богъ твой даетъ тебѣ, мужъ или жена, иже сотворитъ лукавое предъ Господемъ Богомъ твоимъ, преступити завѣтъ Его: |
17:3 См.: 🔗Втор. 4:19 🔗Иер. 8:2 | и шедше послужатъ богомъ инымъ и поклонятся имъ, солнцу, или лунѣ, или всякому яже от красоты небесныя, ихже не повелѣхъ тебѣ: |
17:4 | и возвѣстится тебѣ, и взыщеши зѣло, и се, истинно бысть слово, мерзость сотворися сiя во Израили: |
17:5 | да изведеши человѣка того, или жену ту, иже сотвориша дѣло злое сiе, предъ двери, и побiете ихъ каменiемъ, и да умрутъ. |
17:6 | При двою свидѣтелехъ или при трехъ да умретъ: умираяй да не умретъ при единѣмъ свидѣтели: |
17:7 См.: 🔗Втор. 13:9 🔗1Кор. 5:13 | и рука свидѣтелей да будетъ на немъ въ первыхъ, умертвити его, и рука всѣхъ людій послѣжде: и измите злое от васъ самѣхъ. |
17:8 См.: 🔗2Пар. 19:10 | Аще же неудоборѣшимо слово у тебе въ судѣ между кровiю и кровiю, и между судомъ и судомъ, и между язвою и язвою, и между прѣнiемъ и прѣнiемъ, словеса судная въ градѣхъ твоихъ, и воставъ взыдеши на мѣсто, еже изберетъ Господь Богъ твой призвати имя Его тамо: |
17:9 | и прiидеши къ жерцемъ левитомъ, и къ судiи, иже будетъ въ тыя дни, и взыскавше возвѣстятъ тебѣ судъ: |
17:10 | и сотвориши по словеси, еже возвѣстятъ тебѣ от мѣста, еже изберетъ Господь Богъ твой призывати имя Его тамо, и да сохраниши зѣло творити вся, елика законоположатся тебѣ: |
17:11 См.: 🔗Втор. 5:32 🔗Втор. 28:14 | по закону и по суду, егоже рекутъ тебѣ, сотвориши, да не уклонишися от словесе, еже извѣстятъ тебѣ, ни на десно, ни на лѣво. |
17:12 См.: 🔗3Цар. 18:26 | И человѣкъ, иже сотворитъ въ гордости, еже не послушати жерца предстоящаго служити во имя Господа Бога твоего, или судiи, иже въ тыя дни будетъ, да умретъ человѣкъ той, и да измеши злое от Израиля: |
17:13 | и вси людiе услышавше убоятся, и не будутъ нечествовати ктому. |
17:14 | Аще же внидеши въ землю, юже Господь Богъ твой даетъ тебѣ въ жребiй, и прiимеши ю, и вселишися на ней, и речеши: поставлю князя надъ собою, якоже и прочiи языцы, иже окрестъ мене: |
17:15 | поставляя да поставиши надъ собою князя, егоже изберетъ Господь Богъ твой, от братiи твоея да поставиши надъ собою князя, не возможеши поставити надъ собою князя человѣка чуждаго, яко не братъ твой есть. |
17:16 | Обаче да не умножитъ себѣ коней, ниже да возвратитъ людій во Египетъ, яко да не умножитъ себѣ коней: Господь же рече вамъ: не приложите возвратитися путемъ симъ ктому: |
17:17 См.: 🔗2Цар. 5:13 | и да не умножитъ себѣ женъ, да не превратится сердце его: и сребра и злата да не умножитъ себѣ зѣло. |
17:18 См.: 🔗3Цар. 1:13 | И будетъ егда сядетъ на престолѣ власти своея, да напишетъ себѣ второзаконiе сiе въ книзѣ от жерцевъ левитовъ, |
17:19 См.: 🔗Пс. 118:12 🔗Мф. 5:19 | и будетъ съ нимъ, и да чтетъ ю во вся дни житiя своего, да научится боятися Господа Бога своего и хранити вся заповѣди сiя и оправданiя сiя, творити я: |
17:20 См.: 🔗Пс. 130:2 🔗Нав. 1:7 | да не возвысится сердце его от братiи его, да не преступитъ от заповѣдiй ни на десно, ни на лѣво, яко да будетъ многа лѣта во власти своей, той и сыны его съ нимъ, въ сынѣхъ Израилевыхъ. |