Евангелие от Иоанна, глава 14

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 14
14:1	[Зач. 47.] Да не смущает­ся сердце ва­ше: вѣруйте въ Бога, и въ Мя вѣруйте:
14:2	въ дому Отца Мо­его обители многи суть: аще ли же ни, реклъ быхъ вамъ: иду уготовати мѣсто вамъ:
14:3 См.: 🔗Ин. 17:24 🔗1Фес. 4:17	и аще {аще пойду и} уготовлю мѣсто вамъ, паки прiиду и по­иму вы къ Себѣ, да, идѣже есмь Азъ и вы будете:
14:4	и аможе Азъ иду, вѣсте, и путь вѣсте.
14:5	Глагола Ему Ѳома: Господи, не вѣмы, камо идеши: и како можемъ путь вѣдѣти?
14:6 См.: 🔗Ис. 35:8 🔗Ин. 1:14 🔗Ин. 6:33 🔗Ин. 8:32 🔗Ин. 10:28 🔗Ин. 11:25 🔗1Ин. 5:20 🔗Еф. 1:13	Глагола ему Иисусъ: Азъ есмь путь и истина и животъ: никтоже прiидетъ ко Отцу, токмо Мною:
14:7	аще Мя бысте знали, и Отца Мо­его знали бысте [убо]: и от­селѣ познасте Его, и видѣсте Его.
14:8	Глагола Ему Филиппъ: Господи, покажи намъ Отца, и довлѣетъ намъ.
14:9	Глагола ему Иисусъ: толико время съ вами есмь, и не позналъ еси Мене, Филиппе? Видѣвый Мене видѣ Отца: и како ты глаголеши: покажи намъ Отца?
14:10	Не вѣруеши ли, яко Азъ во Отцѣ, и Отецъ во Мнѣ есть? [Зач. 48.] Глаголы, яже Азъ глаголю вамъ, о Себѣ не глаголю: Отецъ же во Мнѣ пребываяй, Той творитъ дѣла:
14:11	вѣруйте Мнѣ, яко Азъ во Отцѣ, и Отецъ во Мнѣ: аще ли же ни, за та дѣла вѣру имите Ми.
14:12	Аминь, аминь глаголю вамъ: вѣруяй въ Мя, дѣла, яже Азъ творю, и той сотворитъ, и болша сихъ сотворитъ: яко Азъ ко Отцу Мо­ему гряду:
14:13 См.: 🔗Мф. 7:7 🔗Мк. 11:24 🔗Лк. 11:9 🔗Ин. 15:7 🔗Ин. 16:23 🔗Иак. 1:6	и еже аще что просите [от­ Отца] во имя Мое, то сотворю, да прославит­ся Отецъ въ Сынѣ:
14:14	[и] аще чесо просите во имя Мое, Азъ сотворю.
14:15	Аще любите Мя, заповѣди Моя соблюдите,
14:16	и Азъ умолю Отца, и иного Утѣшителя дастъ вамъ, да будетъ съ вами въ вѣкъ,
14:17 См.: 🔗Ин. 16:13 🔗1Кор. 2:14	Духъ истины, Егоже мiръ не можетъ прiяти, яко не видитъ Его, ниже знаетъ Его: вы же знаете Его, яко въ васъ пребываетъ и въ васъ будетъ.
14:18	Не оставлю васъ сиры: прiиду къ вамъ:
14:19 См.: 🔗Ин. 11:25 🔗1Фес. 4:14	еще мало, и мiръ ктому не увидитъ Мене, вы же увидите Мя, яко Азъ живу, и вы живи будете:
14:20	въ той день уразумѣете вы, яко Азъ во Отцѣ Мо­емъ, и вы во Мнѣ, и Азъ въ васъ.
14:21	[Зач.] Имѣяй заповѣди Моя и соблюдаяй ихъ, той есть любяй Мя: а любяй Мя воз­любленъ будетъ Отцемъ Мо­имъ, и Азъ воз­люблю его, и явлюся ему Самъ.
14:22	Глагола Ему Иуда не Искарiотскiй: Господи, и что бысть, яко намъ хощеши явитися, а не мiрови?
14:23 См.: 🔗Зах. 2:10 🔗1Кор. 3:16 🔗Отк. 3:20	Отвѣща Иисусъ и рече ему: аще кто любитъ Мя, слово Мое соблюдетъ: и Отецъ Мой воз­любитъ его, и къ нему прiидема, и обитель у него сотворима:
14:24 См.: 🔗Ин. 12:49	не любяй Мя словесъ Мо­ихъ не соблюдаетъ: и слово, еже слышасте, нѣсть Мое, но послав­шаго Мя Отца.
14:25	Сiя глаголахъ вамъ въ васъ сый:
14:26 См.: 🔗Ин. 15:26	Утѣшитель же, Духъ Святый, Егоже послетъ Отецъ во имя Мое, той вы научитъ всему, и воспомянетъ вамъ вся, яже рѣхъ вамъ.
14:27 См.: 🔗Флп. 4:7	Миръ оставляю вамъ, миръ Мой даю вамъ: не якоже мiръ даетъ, Азъ даю вамъ. [Зач. 49.] Да не смущает­ся сердце ва­ше, ни устрашаетъ.
14:28	Слышасте, яко Азъ рѣхъ вамъ: иду и прiиду къ вамъ. Аще бысте любили Мя, воз­радовалися бысте [убо], яко рѣхъ: иду ко Отцу: яко Отецъ Мой болiй Мене есть.
14:29	И нынѣ рѣхъ вамъ, прежде даже не будетъ, да, егда будетъ, вѣру имете.
14:30 См.: 🔗Ин. 12:31 🔗Ин. 16:11	Ктому не много глаголю съ вами: грядетъ бо сего мiра князь, и во Мнѣ не имать ничесоже.
14:31 См.: 🔗Ин. 10:18 🔗Евр. 10:7	Но да разумѣетъ мiръ, яко люблю Отца, и якоже заповѣда Мнѣ Отецъ, тако творю: востаните, идемъ от­сюду.