Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 16 | |
16:1 | [Зач. 80.] Глаголаше же ко ученикомъ Своимъ: человѣкъ нѣкiй бѣ богатъ, иже имяше приставника: и той оклеветанъ бысть къ нему, яко расточаетъ имѣнiя его. |
16:2 | И пригласивъ его рече ему: что се слышу о тебѣ? Воздаждь отвѣтъ о приставленiи домовнѣмъ: не возможеши бо ктому дому строити. |
16:3 | Рече же въ себѣ приставникъ дому: что сотворю, яко господь мой отъемлетъ строенiе дому от мене? Копати не могу, просити стыжуся: |
16:4 | разумѣхъ, что сотворю, да егда отставленъ буду от строенiя дому, прiимутъ мя въ домы своя. |
16:5 | И призвавъ единаго когождо от должникъ господина своего, глаголаше первому: колицѣмъ долженъ еси господину моему? |
16:6 | Онъ же рече: сто мѣръ {вать [βάτος, т. е. мѣръ]} масла. И рече ему: прiими писанiе твое, и сѣдъ скоро напиши пятьдесятъ. |
16:7 | Потомъ же рече другому: ты же колицѣмъ долженъ еси? Онъ же рече: сто мѣръ пшеницы. И глагола ему: прiими писанiе твое, и напиши осмьдесятъ. |
16:8 | И похвали господь дому строителя неправеднаго, яко мудрѣ сотвори: яко сынове вѣка сего мудрѣйши паче сыновъ свѣта въ родѣ своемъ суть. |
16:9 См.: 🔗Мф. 6:19 🔗Мф. 19:21 | И Азъ вамъ глаголю: сотворите себѣ други от мамоны неправды, да, егда оскудѣете, прiимутъ вы въ вѣчныя кровы. |
16:10 См.: 🔗Мф. 25:21 | [Зач. 81.] Вѣрный въ малѣ, и во мнозѣ вѣренъ есть: и неправедный въ малѣ, и во мнозѣ неправеденъ есть. |
16:11 | Аще убо въ неправеднѣмъ имѣнiи вѣрни не бысте, во истиннѣмъ кто вамъ вѣру иметъ? |
16:12 | И аще въ чужемъ вѣрни не бысте, ваше кто вамъ дастъ? |
16:13 См.: 🔗Мф. 6:24 | Никій же рабъ можетъ двѣма господинома работати: ибо или единаго возненавидитъ, а другаго возлюбитъ: или единаго держится, о друзѣмъ же нерадѣти начнетъ: не можете Богу работати и мамонѣ. |
16:14 См.: 🔗1Тим. 6:10 | Слышаху же сiя вся и фарисее, сребролюбцы суще, ругахуся Ему. |
16:15 См.: 🔗1Цар. 16:7 🔗Иер. 11:20 | И рече имъ: [Зач. 82.] вы есте оправдающе себе предъ человѣки, Богъ же вѣсть сердца ваша: яко, еже есть въ человѣцѣхъ высоко, мерзость есть предъ Богомъ. |
16:16 См.: 🔗Мф. 11:12 | Законъ и пророцы до Иоанна: оттолѣ Царствiе Божiе благовѣствуется, и всякъ въ не нудится {съ нуждею входитъ}. |
16:17 См.: 🔗Ис. 40:8 | Удобѣе же есть небу и земли прейти, неже от закона единой чертѣ погибнути. |
16:18 См.: 🔗Втор. 24:1 🔗Мф. 19:9 | Всякъ пущаяй жену свою и приводя ину, прелюбы дѣетъ: и женяйся пущеною от мужа, прелюбы творитъ. |
16:19 | [Зач. 83.] Человѣкъ же нѣкiй бѣ богатъ, и облачашеся въ порфиру и виссонъ, веселяся на вся дни свѣтло. |
16:20 | Нищь же бѣ нѣкто, именемъ Лазарь, иже лежаше предъ враты его гноенъ |
16:21 | и желаше насытитися от крупицъ падающихъ от трапезы богатаго: но и пси приходяще облизаху гной его. |
16:22 | Бысть же умрети нищему, и несену быти Ангелы на лоно Авраамле: умре же и богатый, и погребоша его. |
16:23 | И во адѣ возвѣдъ очи свои, сый въ мукахъ, узрѣ Авраама издалеча, и Лазаря на лонѣ его: |
16:24 | и той возглашь рече: отче Аврааме, помилуй мя, и посли Лазаря, да омочитъ конецъ перста своего въ водѣ и устудитъ языкъ мой: яко стражду во пламени семъ. |
16:25 См.: 🔗Иов. 21:7 | Рече же Авраамъ: чадо, помяни, яко воспрiялъ еси благая твоя въ животѣ твоемъ, и Лазарь такожде злая: нынѣ же здѣ утѣшается, ты же страждеши: |
16:26 | и надъ всѣми сими между нами и вами пропасть велика утвердися, яко да хотящiи прейти отсюду къ вамъ не возмогутъ, ни иже оттуду, къ намъ преходятъ. |
16:27 | Рече же: молю тя убо, отче, да послеши его въ домъ отца моего: |
16:28 | имамъ бо пять братiй: яко да засвидѣтелствуетъ имъ, да не и тіи прiидутъ на мѣсто сiе мученiя. |
16:29 См.: 🔗Ин. 5:39 | Глагола ему Авраамъ: имутъ Моисеа и пророки: да послушаютъ ихъ. |
16:30 | Онъ же рече: ни, отче Аврааме: но аще кто от мертвыхъ идетъ къ нимъ, покаются. |
16:31 | Рече же ему: аще Моисеа и пророковъ не послушаютъ, и аще кто от мертвыхъ воскреснетъ, не имутъ вѣры. |