Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 | Призови же, аще кто тя услышитъ, или аще кого от святыхъ ангелъ узриши. |
5:2 | Безумнаго бо убиваетъ гнѣвъ, заблуждшаго же умерщвляетъ рвенiе. |
5:3 См.: 🔗Пс. 36:35 | Азъ же видѣхъ безумныхъ укореняющихся, но абiе поядено бысть ихъ жилище. |
5:4 | Далече да будутъ сынове ихъ от спасенiя, и да сотрутся при дверехъ хуждшихъ, и не будетъ изъимаяй. |
5:5 | Яже бо они собраша, праведницы поядятъ, сами же от золъ не изъяти будутъ: изможденна буди крѣпость ихъ. |
5:6 | Не имать бо от земли изыти трудъ, ни от горъ прозябнути болѣзнь: |
5:7 См.: 🔗Иов. 14:1 | но человѣкъ раждается на трудъ, птенцы же суповы высоко парятъ. |
5:8 | Обаче же азъ помолюся богови, Господа же всѣхъ Владыку призову, |
5:9 См.: 🔗Иов. 9:10 🔗Пс. 71:18 | творящаго велiя и неизслѣдимая, славная же и изрядная, имже нѣсть числа: |
5:10 См.: 🔗Иов. 36:27 🔗Пс. 146:8 | дающаго дождь на землю, посылающаго воду на поднебесную: |
5:11 | возносящаго смиренныя на высоту и погибшыя воздвизающаго во спасенiе: |
5:12 | расточающаго совѣты лукавыхъ, да не сотворятъ руцѣ ихъ истины. |
5:13 См.: 🔗1Кор. 3:19 | Уловляяй премудрыхъ въ мудрости ихъ, совѣтъ же коварныхъ разори. |
5:14 См.: 🔗Втор. 28:29 | Во дни обыметъ ихъ тма, въ полудне же да осяжутъ якоже въ нощи, |
5:15 | и да погибнутъ на брани: немощный же да изыдетъ изъ руки сильнаго. |
5:16 | Буди же немощному надежда, неправеднаго же уста да заградятся. |
5:17 | Блаженъ же человѣкъ, егоже обличи Богъ, наказанiя же Вседержителева не отвращайся: |
5:18 См.: 🔗Втор. 32:39 | той бо болѣти творитъ и паки возставляетъ: порази, и руцѣ его изцѣлятъ: |
5:19 См.: 🔗Пс. 90:10 🔗Ис. 43:2 | шестижды от бѣдъ изметъ тя, въ седмѣмъ же не коснеттися зло: |
5:20 См.: 🔗Пс. 32:19 | во гладѣ избавитъ тя от смерти, на брани же изъ руки желѣза изрѣшитъ тя: |
5:21 См.: 🔗Пс. 54:22 🔗Прит. 26:22 | от бича языка скрыетъ тя, и не убоишися от золъ находящихъ: |
5:22 | неправеднымъ и беззаконнымъ посмѣешися, от дивiихъ же звѣрей не убоишися, |
5:23 См.: 🔗Пс. 90:12 🔗Ис. 11:6 | зане съ каменiемъ дивiимъ завѣтъ твой: звѣрiе бо дивiи примирятся тебѣ. |
5:24 | Потомъ уразумѣеши, яко въ мирѣ будетъ домъ твой, жилище же храмины твоея не имать согрѣшити: |
5:25 | уразумѣеши же, яко много сѣмя твое, и чада твоя будутъ яко весь злакъ селный: |
5:26 | внидеши же во гробъ якоже пшеница созрѣлая во время пожатая, или якоже стогъ гумна во время свезенный. |
5:27 | Се, сiя сице изслѣдихомъ: сiя суть, яже слышахомъ: ты же разумѣй себѣ, аще что сотворилъ еси. |