Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 | Пророчествова же Аггей пророкъ и захарiа сынъ аддовъ прорицанiе ко Иудеомъ, иже бяху во Иудеи и Иерусалимѣ, во имя Бога Израилева на нихъ. |
5:2 См.: 🔗1Пар. 3:19 🔗Мф. 1:12 | Тогда востаста зоровавель сынъ Салаѳiилевъ и иисусъ сынъ Иоседековъ и начаста здати домъ Божiй, иже во Иерусалимѣ: и съ нима пророцы Божiи помогающе има. |
5:3 См.: 🔗2Езд. 6:4 | Въ то время прiиде къ нимъ Ѳаѳанай князь сущiй за рѣкою и саѳарвузанай и сослужителiе ихъ, и сiя рекоша имъ: кто даде вамъ власть созидати домъ сей и стѣны сiя возставляти? |
5:4 | Тогда сiя рекоша имъ: кая суть имена мужей созидающихъ градъ сей? |
5:5 См.: 🔗Зах. 4:10 | И очи Божiи на плѣненiе Иудино, и не возбраниша имъ, дондеже посланiе къ дарiю отнесено, и тогда послася съ писмоносцемъ о семъ. |
5:6 | Изъявленiе посланiя, еже посла Ѳаѳанай князь объ онъ полъ рѣки и саѳарвузанай и сослужителiе ихъ Афарсахее, иже бяху за рѣкою, дарiю царю: |
5:7 | словесы послаша къ нему, и сiя писана въ немъ: дарiю царю миръ всякъ: |
5:8 См.: 🔗Втор. 10:17 | вѣдомо да будетъ царю, яко ходихомъ во Иудейскую страну къ дому Бога великаго, и той созидается каменiемъ избраннымъ, и древа ставятся въ стѣнахъ, дѣло же то со тщанiемъ строится и благопоспѣшается въ рукахъ ихъ: |
5:9 | тогда вопросихомъ старѣйшинъ тѣхъ и тако рекохомъ имъ: кто даде вамъ власть домъ сей созидати и стѣны сiя возставляти? |
5:10 | и о именѣхъ ихъ вопросихомъ ихъ, да возвѣстимъ тебѣ, яко да напишемъ тебѣ имена мужей, иже суть началницы ихъ: |
5:11 См.: 🔗3Цар. 6:1 | и сицева словеса отвѣщаша намъ глаголюще: мы есмы раби Бога небесе и земли, и созидаемъ домъ, иже бысть устроенъ прежде сего за лѣта многа, и царь Израилевъ великiй созда его и соверши его имъ: |
5:12 См.: 🔗2Пар. 36:16 🔗4Цар. 24:20 | егда же прогнѣваша отцы наши Бога небеснаго, предаде ихъ въ руки навуходоносора царя Вавилонскаго халдеанина, и домъ сей разори и люди преведе въ Вавилонъ: |
5:13 См.: 🔗2Пар. 36:22 🔗1Езд. 1:1 | но въ лѣто первое кира царя, киръ царь Вавилонскiй постави повелѣнiе, да домъ Божiй сей созиждется, |
5:14 См.: 🔗1Езд. 1:7 | и сосуды дому Божiя златыя и сребряныя, яже навуходоносоръ взя изъ дому, иже во Иерусалимѣ, и отнесе я въ храмъ Вавилонскiй, изнесе тыя киръ царь от храма Вавилонскаго и даде ихъ Саванасару хранителю, иже надъ сокровищемъ, |
5:15 | и рече ему: вся сосуды сiя возми и иди, и постави ихъ въ дому, иже есть во Иерусалимѣ, на мѣсто ихъ: |
5:16 См.: 🔗1Езд. 1:8 | тогда Саванасаръ той прiиде и постави основанiе дому Божiя во Иерусалимѣ, и от того времене даже донынѣ созидается, и еще не совершенъ есть: |
5:17 | и нынѣ аще [видится] царю благо, да посмотритъ въ дому сокровища царя Вавилонскаго, да увѣси, яко от царя кира бысть повелѣнiе созидати домъ Божiй сей, иже во Иерусалимѣ, и увѣдавъ о семъ царь да послетъ къ намъ. |