Книга пророка Иезекииля, глава 42

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 42
42:1 См.: 🔗Иез. 46:19	И введе мя во дворъ внѣшнiй на востоки, прямо вратъ яже къ сѣверу, и введе мя [внутрь], и се, преградъ пять держащыяся прочаго и держащыяся предѣла къ сѣверу,
42:2	противу лица ста лактей долгота къ сѣверу, а широта пятьдесятъ лактей,
42:3	расписаны якоже врата двора внутрен­няго, и якоже междустолпiя внѣшняго двора чинорасположены, прямоличны при­­творы три.
42:4	И прямо преградамъ проходъ десяти лактей въ широту, во внутрен­няя пути единаго лактя на сто лактей долгота, и двери ихъ къ сѣверу.
42:5	И проходи горничнiи такожде, яко изница­ше междустолпiе изъ него, от­ долнаго междустолпiя, и разстоянiе: сице междустолпiе и разстоянiе,
42:6	и сице при­­творы: понеже трегубы бяху и столповъ не имѣша, якоже столпи преградъ: того ради изницаху изъ нижнихъ и среднихъ от­ земли.
42:7	И свѣтъ внѣуду, якоже преграды двора внѣшняго, зрящыя противу преградамъ, яже къ сѣверу, долгота пятидесяти лактей.
42:8	Зане долгота преградъ зрящихъ во дворъ внѣшнiй бяше пятидесяти лактей, и тыя суть прямоличны тѣмъ: все же [бѣ] ста лактей.
42:9	Двери же преградъ тѣхъ входа, иже на востоки, еже входити ими от­ двора внѣшняго,
42:10	по свѣту сущаго въ началѣ прохода: и къ югу на лице юга, и прямо прочему, и прямо раздѣленiя, и преграды,
42:11	и проходъ противу лицу ихъ, по мѣрамъ преградъ яже къ сѣверу и по долготѣ ихъ и по широтѣ ихъ, и по всѣмъ исходомъ ихъ и по всѣмъ вращениемъ ихъ, и по свѣтомъ ихъ и по дверемъ ихъ,
42:12	преградъ яже къ югу, и по дверемъ от­ начала прохода аки къ свѣту разстоянiя трости, и на востокъ еже входити ими.
42:13 См.: 🔗Лев. 10:17 🔗Ис. 64:11	И рече ко мнѣ: преграды, яже къ сѣверу, и преграды, яже къ югу, сущыя противу лицу разстоянiй, сiя суть преграды святаго, въ нихже ядятъ жерцы сынове садуковы, иже при­­ступаютъ ко Господеви, святая святыхъ, и тамо положатъ святая святыхъ и жертву, и яже за грѣхи и яже за невѣдѣнiе, понеже мѣсто свято есть.
42:14 См.: 🔗Иез. 44:19	Да не входятъ тамо, кромѣ жерцевъ, и да не исходятъ от­ святаго во дворъ внѣшнiй, яко да присно святи будутъ при­­носящiи, и да не при­­касают­ся ризамъ ихъ, въ нихже служатъ, понеже свята суть, но да облекут­ся въ ризы ины, егда при­­касают­ся людемъ.
42:15	И совершися размѣренiе храма внутрьуду. И изведе мя по пути вратъ зрящихъ на востокъ, и размѣри подобiе храма окрестъ чинорасположенiемъ.
42:16	И ста созади вратъ зрящихъ на востокъ, и размѣри пять сотъ тростiю мѣрною.
42:17	И обратися на сѣверъ, и размѣри на лице сѣвера лактей пять сотъ тростiю мѣрною.
42:18	И обратися къ морю, и размѣри на лице моря пять сотъ лактей тростiю мѣрною.
42:19	И обратися на югъ, и размѣри противу югу пять сотъ тростiю мѣрною.
42:20 См.: 🔗Иез. 45:2	Четыри страны тоюжде тростiю: и расположи его, и ограду окрестъ ему, пять сотъ лактей [долготу] на востокъ, и пять сотъ лактей широту, еже разлучати между святыми и между предстѣнiемъ сущимъ въ чиноположенiи храма.